ഒരു സൂപ്പർഫുഡ് ആണ് അവക്കാഡോ. കുട്ടികൾക്കു മുതൽ മുതിർന്നവർക്കു വരെ സുരക്ഷിതമായി കഴിക്കാവുന്ന പഴം. സ്മൂത്തികൾ, സാലഡുകൾഎന്നിങ്ങനെ പോഷക സമ്പുഷ്ടമായ ഈ പഴം വിവിധ രൂപത്തിൽ ഭക്ഷണത്തിൽ ഉൾപ്പെടുത്താവുന്നതാണ്. തലച്ചോറിന്റെ പ്രവർത്തനം, ഹൃദയാരോഗ്യം, ഗർഭകാലം ആരോഗ്യം എന്നിങ്ങനെ അവക്കാഡോയുടെ ആരോഗ്യ ഗുണങ്ങൾ ഏറെയാണ്.
ഈ പഴത്തിന്റെ ആരോഗ്യ ഗുണങ്ങളെക്കുറിച്ച് ഡോ. ദിവ്യ വോറ ഇൻസ്റ്റഗ്രാം പോസ്റ്റിൽ വിശദീകരിച്ചിട്ടുണ്ട്. അവക്കാഡോ തലച്ചോറിനെ ഉത്തേജിപ്പിക്കുന്നതും പ്രമേഹത്തിനെതിരെ പോരാടുന്നതുമായ ഒരു സൂപ്പർഫ്രൂട്ടാണ്. ഇത് ഗർഭകാലത്തെ ആരോഗ്യത്തെ പിന്തുണയ്ക്കുന്നതിനൊപ്പം അൽഷിമേഴ്സ് സാധ്യത കുറയ്ക്കാനും സഹായിക്കുമെന്ന് അവർ പറഞ്ഞു.
മോണോസാച്ചുറേറ്റഡ് കൊഴുപ്പുകൾ
ഡോ. വോറ മോണോസാച്ചുറേറ്റഡ് കൊഴുപ്പുകളെ ശരീരത്തിന് ആവശ്യമായ നല്ലതും ആരോഗ്യകരവുമായ കൊഴുപ്പുകൾ എന്നാണ് വിശേഷിപ്പിച്ചത്. ഈ ആരോഗ്യകരമായ കൊഴുപ്പുകൾ രക്തയോട്ടത്തിനും, അതായത് എല്ലാ അവയവങ്ങളിലേക്കും രക്തം നന്നായി എത്തിക്കുന്നതിനും, തലച്ചോറിന്റെ ആരോഗ്യം വർധിപ്പിക്കുന്നതിനും അൽഷിമേഴ്സ് രോഗ സാധ്യത കുറയ്ക്കാൻ പോലും സഹായിക്കുന്നു. ഇതിനുപുറമെ, മോണോസാച്ചുറേറ്റഡ് കൊഴുപ്പുകൾ ഇൻസുലിൻ റെസിസ്റ്റൻസും പ്രമേഹവും തടയാൻ സഹായിക്കുന്നു. ഇത് അൽഷിമേഴ്സ് രോഗത്തിനുള്ള മറ്റൊരു അപകട ഘടകമാണ്.
ഫോളേറ്റ്
ഡോ. വോറയുടെ അഭിപ്രായത്തിൽ, അവക്കാഡോകളിൽ വിറ്റാമിൻ ബി9 അടങ്ങിയിട്ടുണ്ട്. ഇത് സാധാരണയായി ഫോളേറ്റ് എന്നറിയപ്പെടുന്നു. “ഇതിൽ ഉയർന്ന അളവിൽ ഫോളേറ്റ് ഉണ്ട്, ഇത് ഡിഎൻഎ നന്നാക്കലിനും തലച്ചോറിന്റെ ആരോഗ്യത്തിനും നല്ലതാണ്.” പുതിയ കോശങ്ങൾ സൃഷ്ടിക്കുന്നതിനും ആരോഗ്യകരമായ ചുവന്ന രക്താണുക്കൾ ഉത്പാദിപ്പിക്കുന്നതിനും ആരോഗ്യകരമായ ഗർഭധാരണത്തെ പിന്തുണയ്ക്കുന്നതിനും ഫോളേറ്റ് നിർണായകമാണെന്ന് മെഡിക്കൽ ന്യൂസ് ടുഡേ റിപ്പോർട്ട് ചെയ്യുന്നു. ജനന വൈകല്യങ്ങൾ തടയാനും മാനസികാവസ്ഥ നിയന്ത്രിക്കാനും അവക്കാഡോകൾ സഹായിക്കുന്നു.
ഒമേഗ-3 ഫാറ്റി ആസിഡുകൾ
ഈ പഴത്തിൽ ഒമേഗ-3 ഫാറ്റി ആസിഡുകൾ അടങ്ങിയിട്ടുണ്ട്, ഇത് ഹൃദയാരോഗ്യത്തിന് വളരെ നല്ലതാണ്. ഇവ രക്തസമ്മർദം നിയന്ത്രിക്കാനും വീക്കം കുറയ്ക്കാനും സഹായിക്കുന്നു.
