നമ്മുടെ തലച്ചോർ എല്ലാ ദിവസവും അക്ഷീണം പ്രവർത്തിക്കുന്നു. ഓർമ്മ, ശ്രദ്ധ, വികാരങ്ങൾ, തീരുമാനമെടുക്കൽ എന്നിങ്ങനെ എല്ലാം നിയന്ത്രിക്കുന്നത് തലച്ചോറാണ്. എന്നാൽ, തലച്ചോറിന്റെ പ്രവർത്തനത്തെ തകരാറിലാക്കുന്ന ചില ശീലങ്ങളുണ്ട്. 25 വർഷത്തിലേറെ പരിചയമുള്ള ന്യൂറോ സർജൻ ഡോ.റിച്ചാർഡ് വെയ്ന അടുത്തിടെ ഇൻസ്റ്റാഗ്രാം പോസ്റ്റിൽ തലച്ചോറിനെ തകരാറിലാക്കുന്ന 4 സാധാരണ ശീലങ്ങളെക്കുറിച്ച് വിശദീകരിക്കുകയും അവയുടെ ആരോഗ്യം എങ്ങനെ സംരക്ഷിക്കാമെന്നും പറഞ്ഞിരുന്നു.
തലച്ചോറിന്റെ ആരോഗ്യത്തെ പ്രതികൂലമായി ബാധിക്കുന്ന നാല് സാധാരണ ദൈനംദിന ശീലങ്ങൾ ഡോ.വെയ്ന എടുത്തു പറഞ്ഞിട്ടുണ്ട്.
- മോശം ഉറക്കം
ഉറക്കമില്ലായ്മ തലച്ചോറിന്റെ സ്വയം നന്നാക്കാനുള്ള കഴിവ് കുറയ്ക്കുന്നു. മതിയായ വിശ്രമം കിട്ടിയില്ലെങ്കിൽ തലച്ചോറിന് വിഷവസ്തുക്കളെ ഫലപ്രദമായി പുറന്തള്ളാനോ ഓർമ്മകൾ ഏകീകരിക്കാനോ കഴിയില്ല. ഇത് മൊത്തത്തിലുള്ള വൈജ്ഞാനിക പ്രവർത്തനത്തെ ബാധിക്കും.
- വ്യായാമം ഒഴിവാക്കുക
വ്യായാമം തലച്ചോറിലേക്കുള്ള രക്തയോട്ടം വർധിപ്പിക്കുന്നു, ഇത് ഓർമ്മശക്തിയും ശ്രദ്ധയും മെച്ചപ്പെടുത്തുന്നു. ശാരീരിക പ്രവർത്തനങ്ങൾ ശരീരത്തിന് മാത്രമല്ല, മാനസിക ക്ഷേമം നിലനിർത്തുന്നതിനും അത്യാവശ്യമാണ്.
- ഉയർന്ന സമ്മർദമുള്ള ജീവിതശൈലി
സമ്മർദം കോർട്ടിസോളിന്റെ അളവ് ഉയർത്തുന്നു, ഇത് തലച്ചോറിലെ കോശങ്ങളെ നശിപ്പിക്കും. ധ്യാനം, അല്ലെങ്കിൽ പകൽ സമയത്തെ ചെറിയ ഇടവേളകൾ എന്നിവയിലൂടെ സമ്മർദം നിയന്ത്രിക്കുന്നത് തലച്ചോറിന്റെ ആരോഗ്യം സംരക്ഷിക്കാൻ സഹായിക്കും.
- അൾട്രാ-പ്രോസസ്ഡ് ഡയറ്റുകൾ
പഞ്ചസാരയും ശുദ്ധീകരിച്ച കാർബോഹൈഡ്രേറ്റുകളും കൂടുതലുള്ള ഭക്ഷണക്രമം വീക്കം വർധിപ്പിക്കുകയും തലച്ചോറിന്റെ വാർധക്യത്തെ ത്വരിതപ്പെടുത്തുകയും ചെയ്യും. സംസ്കരിക്കാത്ത മുഴുവൻ ഭക്ഷണങ്ങളും സമീകൃത പോഷകാഹാരവും തിരഞ്ഞെടുക്കുന്നത് വീക്കം കുറയ്ക്കാനും ദീർഘകാല വൈജ്ഞാനിക പ്രവർത്തനത്തെ പിന്തുണയ്ക്കാനും സഹായിക്കും.
ഈ ശീലങ്ങളെക്കുറിച്ച് ശ്രദ്ധാലുവായിരിക്കുകയും ചെറുതും സ്ഥിരവുമായ മാറ്റങ്ങൾ വരുത്തുകയും ചെയ്യുന്നത് തലച്ചോറിന്റെ ആരോഗ്യം സംരക്ഷിക്കുന്നതിലും വൈജ്ഞാനിക ദീർഘായുസ് ഉറപ്പാക്കുന്നതിലും വളരെയധികം സഹായിക്കുമെന്ന് ഡോ.വെയ്ന പറഞ്ഞു
