പുരാതന കാലം മുതൽ തന്നെ ഔഷധ ഗുണങ്ങൾക്ക് പേരുകേട്ടതാണ് നെല്ലിക്ക. പല പഠനങ്ങളും നെല്ലിക്കയുടെ ആരോഗ്യ ഗുണങ്ങളെക്കുറിച്ച് തെളിവ് നൽകിയിട്ടുണ്ട്, പ്രത്യേകിച്ച് കൊളസ്ട്രോൾ നിയന്ത്രിക്കുന്നതിൽ. ആയുർവേദത്തിൽ നെല്ലിക്കയ്ക്ക് വളരെയധികം പ്രാധാന്യമുണ്ട്. പലവിധ ചികിത്സകൾക്കും നെല്ലിക്ക ഉപയോഗിക്കുന്നുണ്ട്. വൈറ്റമിനുകൾ, ധാതുക്കൾ, ആവശ്യ പോഷകങ്ങൾ എന്നിവയെല്ലാം നെല്ലിക്കയിലുണ്ട്.
നെല്ലിക്ക എൽഡിഎൽ ഓക്സിഡേഷൻ തടയുന്നു
എംബ്ലിക്കാനിൻ എ, ബി എന്നിവയുൾപ്പെടെയുള്ള പോളിഫെനോളുകളും, ശക്തമായ ആന്റിഓക്‌സിഡന്റ് ഗുണങ്ങളുള്ള പെഡൻകുലാജിനും നെല്ലിക്കയിൽ ധാരാളമായി അടങ്ങിയിട്ടുണ്ടെന്ന് ഒരു പഠനം പറയുന്നു. ഈ സംയുക്തങ്ങൾ ആതെറോസ്ക്ലെറോട്ടിക് പ്ലേക്കുകളുടെ വികസനത്തിലെ ഒരു നിർണായക ഘട്ടമായ എൽഡിഎൽ കൊളസ്ട്രോളിന്റെ ഓക്സിഡേഷൻ തടയാൻ സഹായിക്കുന്നു.
വീക്കം കുറയ്ക്കുന്നു
ഹൃദയ സംബന്ധമായ അസുഖങ്ങളുടെ ഒരു പ്രധാന ഘടകമാണ് വിട്ടുമാറാത്ത വീക്കം. സി-റിയാക്ടീവ് പ്രോട്ടീന്റെ അളവ് കുറയ്ക്കുന്നതിലൂടെ നെല്ലിക്കയ്ക്ക് വീക്കം കുറയ്ക്കാനുള്ള കഴിവുണ്ട്. വീക്കം കുറയ്ക്കുന്നത് ഹൃദയ പ്രവർത്തനങ്ങളെ സംരക്ഷിക്കാൻ സഹായിക്കുകയും ഹൃദ്രോഗം തടയുന്നതിന് കാരണമാവുകയും ചെയ്യും.
രക്തക്കുഴലുകളുടെ ആരോഗ്യം നിലനിർത്തുന്നതിന് നിർണായകമായ എൻഡോതെലിയൽ പ്രവർത്തനത്തെ നെല്ലിക്ക മെച്ചപ്പെടുത്തുന്നു. എൻഡോതെലിയൽ പ്രവർത്തനം വർധഇപ്പിക്കുന്നതിലൂടെ, ശരിയായ രക്തയോട്ടം ഉറപ്പാക്കാൻ നെല്ലിക്ക സഹായിക്കുകയും ഹൃദയ സംബന്ധമായ അസുഖങ്ങൾക്കുള്ള സാധ്യത കുറയ്ക്കുകയും ചെയ്യുന്നു.
നെല്ലിക്ക കഴിക്കേണ്ട രീതി എങ്ങനെ?
പലരും നെല്ലിക്ക പച്ചയ്ക്കോ അല്ലെങ്കിൽ പാചകം ചെയ്തോ, ജ്യൂസ് ആക്കിയോ കഴിക്കുന്നു. എന്നാൽ, നെല്ലിക്ക ഉപ്പിലിട്ട് കഴിക്കണം. വൈറ്റമിൻ സി, ഇരുമ്പ് എന്നിവയുടെ മികച്ച ആഗിരണത്തിനായി നെല്ലിക്ക ഉപ്പിലിട്ട് കഴിക്കണം. ഇങ്ങനെ ചെയ്യുന്നത് നെല്ലിക്കയുടെ ആരോഗ്യ ഗുണങ്ങൾ വർധിപ്പിക്കും
ഒരു ദിവസം എത്ര എണ്ണം കഴിക്കാം?
ഒരു ദിവസം മൂന്ന് ഉപ്പിലിട്ട നെല്ലിക്ക കഴിക്കാം. സാലഡുകളിൽ ചേർക്കാം, അല്ലെങ്കിൽ ജ്യൂസാക്കാം.
