ലോകമെമ്പാടുമുള്ള ഭക്ഷണക്രമങ്ങളിൽ ഏറ്റവും സാധാരണവും പോഷകസമൃദ്ധവുമായ ഭക്ഷണങ്ങളിൽ ഒന്നാണ് മുട്ട. പോഷകങ്ങളുടെ പവർഹൗസുകളാണവ. ഒരു വലിയ മുട്ടയിൽ ഏകദേശം 6-7 ഗ്രാം പ്രോട്ടീൻ, ഒമ്പത് അവശ്യ അമിനോ ആസിഡുകൾ, സമ്പന്നമായ വൈറ്റമിൻ എ, ഡി, ഇ, ബി 12 എന്നിവയും കോളിൻ, ല്യൂട്ടിൻ, സിയാക്സാന്തിൻ, അപൂരിത കൊഴുപ്പുകൾ എന്നിവയും അടങ്ങിയിരിക്കുന്നു.
ഏതു സമയത്തായാലും നിങ്ങളുടെ ഭക്ഷണത്തിൽ ഉൾപ്പെടുത്താവുന്ന ഒരു വിഭവമാണ് മുട്ട. പെട്ടെന്ന് ഉണ്ടാക്കാം എന്നത് കൊണ്ടു മാത്രമല്ല നല്ല ആരോഗ്യ ഗുണങ്ങളുണ്ട് എന്നതും മുട്ട തിരഞ്ഞെടുക്കാൻ കാരണമാകുന്നു. തവിട്ട്, വെള്ള എന്നീ നിറങ്ങളിലാണ് മുട്ട പൊതുവായി കാണപ്പെടുന്നത്. ഇവയിൽ ഏതാണ് കൂടുതൽ നല്ലത്?.
എല്ലാ മുട്ടയിലും ഒരേ അളവിലുളള പോഷകമാണ് അടങ്ങിയിരിക്കുന്നത്. നല്ല പോഷകഗുണവും എന്നാൽ അധികം കാലറിയില്ലാത്തതുമായ ഭക്ഷണമാണ് മുട്ട. ഫൊലൈറ്റ്, അയൺ, സിങ്ക്, വൈറ്റമിൻ ബി12, വൈറ്റമിൻ എ തുടങ്ങിയ ഗുണകരമായ ധാതുക്കൾ മുട്ടയിലുണ്ട്. കോഴിയുടെ ആരോഗ്യവും മുട്ടയുടെ പോഷകഗുണത്തെ ബാധിക്കുന്നുണ്ട്.
ആരോഗ്യവും ജൈവീകവുമാണെന്ന് കരുതി പലരും തവിട്ട് നിറത്തിലുളള മുട്ടയാണ് തിരഞ്ഞെടുക്കാറുളളത്. എന്നാൽ രണ്ടും ഒരേ തരത്തിലുളള പോഷകഗുണമാണ് നൽകുന്നത്. വെള്ളയേക്കാളും തവിട്ട് നിറത്തിലുളള മുട്ടയ്ക്ക് പൊതുവേ വില കൂടുതലാണ്. തവിട്ട് നിറത്തിലുളള മുട്ടയിടുന്ന കോഴി കൂടുതൽ വലുതും എന്നാൽ എണ്ണത്തിൽ കുറവും മുട്ടകൾ നൽകുന്നു എന്നതാണ് ഇതിനു കാരണം. നിങ്ങൾ ഒരു മിശ്രഭുക്കാണെങ്കിൽ നിറ വ്യത്യാസങ്ങളില്ലാതെ മുട്ട ഭക്ഷണത്തിൽ ഉൾപ്പെടുത്താവുന്നതാണ്.
മുട്ടയുടെ ആരോഗ്യ ഗുണങ്ങള്‍
- ഹൃദയ സംബന്ധമായ രോഗങ്ങളെ അകറ്റി നിർത്തുന്നു: ദിവസവും ഒരു മുട്ട കഴിക്കുന്ന ആളുകൾക്ക് ഹൃദയ സംബന്ധമായ അസുഖങ്ങൾ ഉണ്ടാകാനുള്ള സാധ്യത കുറവാണ്.
- തലച്ചോറിന്റെ ആരോഗ്യം നിലനിര്‍ത്തുന്നു: ഗര്‍ഭസ്ഥ ശിശുവിലും നവജാത ശിശുവിലും മസ്തിഷ്ക വികസനം സുഗമമാക്കുന്നതും വാർദ്ധക്യത്തിൽ ഓർമ്മശക്തി സഹായിക്കുന്നതുമായ കോളിൻ എന്ന പോഷകം മുട്ടയില്‍ അടങ്ങിയിരിക്കുന്നു.
- ശരീര ഭാരം നിയന്ത്രിക്കുന്നു: മുട്ട ശരീരത്തിലെ നല്ല കൊളസ്‌ട്രോളിന്റെ അളവ് മെച്ചപ്പെടുത്തുകയും ശരീരഭാരം നിയന്ത്രിക്കാൻ സഹായിക്കുകയും ചെയ്യുന്നു.
