രാവിലെ ഉറക്കം ഉണർന്ന ഉടൻ ചായയോ കാപ്പിയോ കുടിക്കാനാണ് ഭൂരിഭാഗം പേരും ഇഷ്ടപ്പെടുന്നത്. ഒരു കപ്പ് ചായയോ കാപ്പിയോ കുടിക്കാതെ കിടക്കയിൽനിന്നും പോലും എഴുന്നേൽക്കാൻ ചിലർക്ക് മടിയാണ്. പലരുടെയും പ്രഭാത ദിനചര്യയിൽ ഇവയ്ക്ക് അത്രയധികം പ്രധാന സ്ഥാനമുണ്ട്.
ചായയും കാപ്പിയും ഏറ്റവും ജനപ്രിയമായ തിരഞ്ഞെടുപ്പുകളിൽ ഒന്നാണെങ്കിലും അവയ്ക്ക് ചില ദോഷ ഫലങ്ങളുണ്ട്. ഇവയ്ക്ക് പകരം മറ്റു ചില പാനീയങ്ങൾ പ്രഭാത ദിനചര്യയിൽ ഉൾപ്പെടുത്തുന്നത് ആരോഗ്യത്തിന് വളരെയധികം നേട്ടങ്ങൾ നൽകും. 5 ആരോഗ്യകരമായ പ്രഭാത പാനീയങ്ങൾ ഏതൊക്കെയെന്ന് നോക്കാം.
- നാരങ്ങ വെള്ളം
വൈറ്റമിൻ സി, ആന്റിഓക്‌സിഡന്റുകൾ എന്നിവയാൽ സമ്പന്നമായ നാരങ്ങ വെള്ളം ദഹനത്തെ പിന്തുണയ്ക്കുകയും പിത്തരസത്തിന്റെ ഉത്പാദനത്തെ ഉത്തേജിപ്പിക്കുകയും ചെയ്യുന്നു. ഇത് മൊത്തത്തിലുള്ള കുടലിന്റെ പ്രവർത്തനത്തെ സഹായിക്കുന്നു. ആമാശയത്തിലെ പിഎച്ച് ബാലൻസ് നിലനിർത്താനും പതിവായുള്ള മലവിസർജനം സുഗമമാക്കാനും സഹായിക്കും.
- ജീരക വെള്ളം
ആരോഗ്യകരമായ കുടൽ ബാക്ടീരിയകളുടെ വളർച്ചയ്ക്ക് സഹായിന്നു. ആന്റി-ഇൻഫ്ലമേറ്ററി ഘടകങ്ങളും ജീരകത്തിൽ അടങ്ങിയിരിക്കുന്നു. ജീരക വെള്ളം ദഹന എൻസൈം പ്രവർത്തനം വർധിപ്പിക്കുകയും, വയറു വീർക്കുന്നതിൽ നിന്ന് ആശ്വാസം നൽകുകയും, പോഷക ആഗിരണം ഉറപ്പാക്കുകയും ചെയ്യുന്നു.
- നെല്ലിക്ക ജ്യൂസ്
പോളിഫെനോളുകളും വൈറ്റമിൻ സിയും കൊണ്ട് സമ്പുഷ്ടമായ നെല്ലിക്ക ജ്യൂസ് കുടൽ പാളിയെ സ്ഥിരപ്പെടുത്തുകയും ആസിഡ് ഉത്പാദനം നിയന്ത്രിക്കുകയും ചെയ്യുന്നു. ഇതിന്റെ ആന്റിഓക്‌സിഡന്റുകൾ പ്രതിരോധശേഷി വർധിപ്പിക്കുകയും ഓക്‌സിഡേറ്റീവ് സമ്മർദം കുറയ്ക്കുകയും ചെയ്യുന്നു. ഇത് കുടലിന്റെ ആരോഗ്യത്തിന് ഗുണം ചെയ്യും.
- കറ്റാർ വാഴ ജ്യൂസ്
കറ്റാർ വാഴയ്ക്ക് ആന്റി ഇൻഫ്ലാമേറ്ററി ഗുണങ്ങളുണ്ട്. ഇത് മലബന്ധം ഒഴിവാക്കാൻ സഹായിച്ചേക്കാം. മ്യൂക്കോസൽ ടിഷ്യുവിന്റെ നന്നാക്കലിനെ ഉത്തേജിപ്പിക്കുകയും ഇറിറ്റബിൾ ബവൽ സിൻഡ്രോം (ഐബിഎസ്) ലക്ഷണങ്ങളെ ലഘൂകരിക്കാൻ സഹായിക്കുകയും ചെയ്യും.
- സൈലിയം ഹസ്ക് ചേർത്ത ചൂടുവെള്ളം
മലവിസർജനം സുഗമമാക്കുകയും കുടൽ വീക്കം കുറയ്ക്കുകയും ചെയ്യുന്നു.
ചായയ്ക്കും കാപ്പിക്കും പകരം ഈ പാനീയങ്ങൾ എന്തിന് കുടിക്കണം?
ഈ ആരോഗ്യകരമായ പാനീയങ്ങൾ ശരീരത്തിലെ ജലാംശം വർധിപ്പിക്കുകയും, കാപ്പി, ചായ എന്നിവയുമായി ബന്ധപ്പെട്ട അസിഡിറ്റി, നിർജ്ജലീകരണം, ആസക്തി എന്നിവ ഒഴിവാക്കുകയും ചെയ്യുന്നു. ഈ പാനീയങ്ങൾ ഉപയോഗിച്ച് ദിവസം ആരംഭിക്കുന്നത് ദഹന പ്രക്രിയകൾ സുഗമമാക്കുകയും സൂക്ഷ്മാണുക്കൾക്ക് ആരോഗ്യകരമായ അന്തരീക്ഷം സൃഷ്ടിക്കുകയും ചെയ്യും.
