ഡൽഹി: അടുത്തിടെ പുറത്തുവന്ന ഐസിഎംആറിന്റെ പഠനത്തിൽ കേരളീയരുടേയും ഗോവക്കാരുടേയും ആഹാരത്തിൽ പ്രോട്ടീൻ ആവശ്യത്തിനില്ലെന്ന് റിപ്പോർട്ട്. പ്രായപൂർത്തിയായ 18,090 പേരിൽ നടത്തിയ പഠന റിപ്പോർട്ടാണ് പുറത്തു വന്നിരിക്കുന്നത്. പ്രമേഹവും അമിതവണ്ണവും ഒക്കെ കേരളീയരുടെ ഭക്ഷണശൈലിയിൽ നിന്ന് ഉണ്ടാകുന്നതാണെന്നും പഠനം പറയുന്നു.
കാർബോ ഹൈഡ്രേറ്റുകളുടെ അമിത ഉപഭോഗം ടൈപ്പ് 2 പ്രമേഹം (T2D), അമിതവണ്ണം എന്നിവയ്ക്കുള്ള സാധ്യത വർധിപ്പിക്കുന്നുവെന്ന് പഠനം പറയുന്നു. ദക്ഷിണേന്ത്യൻ മേഖലയിലെ 87 ശതമാനം പേരും ശുദ്ധീകരിച്ച ധാന്യങ്ങളാണ് ആഹാരത്തിൽ ഉൾപ്പെടുത്തുന്നത്. അന്നജ(കാർബോഹൈഡ്രേറ്റ്)ത്തിന്റെ പ്രധാനസ്രോതസ്സാണ് ധാന്യങ്ങൾ.
കേരളത്തിൽ പ്രോട്ടീൻ ഉൾപ്പെടുന്ന ഭക്ഷണം ഏറ്റവും കുറഞ്ഞ തോതിലാണ് ഉപയോഗിക്കുന്നത്. ആകെ കേരളീയരുടെ ശരീരത്തിലെത്തുന്ന ഊർജത്തിന്റെ 5.7 ശതമാനം മാത്രമാണ് പ്രോട്ടീനിലൂടെ എത്തുന്നത്. ഗോവക്കാരിലാവട്ടെ 5.9 ശതമാനവും. ദേശീയ തലത്തിൽ പ്രോട്ടീൻ ഉപഭോഗം 12 ശതമാനമാണ്. എന്നാൽ ഇതും ദേശീയ ഭക്ഷണ മാർഗനിർദേശങ്ങൾ(നാഷണൽ ഡയറ്ററി ഗൈഡ്ലൈൻ) ശുപാർശ ചെയ്യുന്ന 15 ശതമാനത്തെക്കാൾ കുറവാണ്.
വെളുത്ത അരി, പൊടിച്ച ധാന്യങ്ങൾ, പഞ്ചസാര തുടങ്ങിയ ഗുണമേന്മയില്ലാത്ത ഭക്ഷണമാണ് കേരളീയരുടെ ശരീരത്തിലേക്ക് കൂടുതലായി എത്തുന്നത്. ഇതോടൊപ്പം ഉയർന്ന പൂരിത കൊഴുപ്പ്, കുറഞ്ഞ പ്രോട്ടീൻ എന്നിവയും ഭക്ഷണത്തിൽ പ്രധാനമായും ഉൾപ്പെടുന്നു. രാജ്യത്താകെ പരിശോധിച്ചാലും ജനങ്ങളുടെ അന്നജ ഉപഭോഗവും ശരിയായ രീതിയിലല്ലെന്ന് പഠനം പറയുന്നു. രാജ്യത്ത് ഊർജ ഉപഭോഗത്തിന്റെ 62.3% കാർബോഹൈഡ്രേറ്റിൽ നിന്നാണ്. ഇത് ലോകത്തിലെ ഏറ്റവും ഉയർന്ന നിരക്കാണ്.
രാജ്യത്തെ സംസ്ഥാനങ്ങളെ ആറു മേഖലകളായി തിരിച്ചാണ് ഇന്ത്യൻ കൗൺസിൽ ഓഫ് മെഡിക്കൽ റിസർച്ച് – ഇന്ത്യ ഡയബെറ്റിസ് സർവേ (ഐസിഎംആർ-ഇന്ത്യബി) എന്ന പഠനം നടത്തിയത്. ഇതിൽ നാലാം ഘട്ടത്തിൻ്റെ ഭാഗമായി 2018- 19 കാലയളവിൽ കേരളം ഉൾപ്പടെയുള്ള സംസ്ഥാനങ്ങളിൽ പഠനം നടന്നു. കേരളം ഉൾപ്പെടുന്ന ദക്ഷിണമേഖലയിലെ ഭക്ഷണരീതികളെക്കുറിച്ചുള്ള പഠനത്തിലാണ് പ്രോട്ടീൻ കുറവിനെക്കുറിച്ച് വ്യക്തമാക്കുന്നത്.
ഈ പ്രതിസന്ധി നേരിടുന്നതിനായി ICMR–INDIAB പഠനം ശുപാർശ ചെയ്യുന്ന ഭക്ഷണരീതിയിലെ മാറ്റങ്ങൾ ഇവയാണ്
സസ്യാഹാരം, പാലുത്പനങ്ങൾ, മുട്ട, മത്സ്യം, മാംസം എന്നിവ പ്രോട്ടീൻ ലഭിക്കുന്ന ഭക്ഷണങ്ങളാണ്. ഇവ പുതുതായി രോഗനിർണയം ചെയ്യുന്ന ടൈപ്പ് 2 ഡയബെറ്റിസ്, പ്രമേഹപൂർവാവസ്ഥ എന്നിവയ്ക്കുള്ള സാധ്യത കുറയ്ക്കും.
അന്നജം അടങ്ങിയ ഭക്ഷണങ്ങൾ 5 ശതമാനം കുറച്ച് പകരം ഇവ ഉപയോഗിക്കാനാണ് ഐസിഎംആറിന്റെ നിർദേശം.
പയറുവർഗ്ഗങ്ങളിൽ നിന്നും പയർ പരിപ്പുകളിൽ നിന്നുമുള്ള പ്രോട്ടീനും (Pulses and legumes protein) ഉൾപ്പെടുത്തണമെന്ന് പഠനം നിർദേശിക്കുന്നു.
പൂരിത കൊഴുപ്പ് കുറവായ ഭക്ഷ്യ എണ്ണകളുടെ (edible oils) ഉപയോഗം പ്രോത്സാഹിപ്പിക്കാനും പഠനം ശുപാർശ ചെയ്യുന്നു.
