ദൈനംദിന ദിനചര്യകൾ പലപ്പോഴും ദീർഘകാല ആരോഗ്യത്തിന് നിർണായകമാണ്. ഒരു ലളിതമായ ശീലം പിന്തുടരുന്നത് നിങ്ങൾ വിചാരിക്കുന്നതിലും വലിയ മാറ്റമുണ്ടാക്കും. എയിംസ്, ഹാർവാർഡ്, സ്റ്റാൻഫോർഡ് സർവകലാശാല എന്നിവിടങ്ങളിൽ പരിശീലനം നേടിയ, 25 വർഷത്തെ പരിചയസമ്പന്നനായ ഗ്യാസ്ട്രോഎൻട്രോളജിസ്റ്റും ഹെപ്പറ്റോളജിസ്റ്റുമായ ഡോ.സൗരഭ് സേഥിയുടെ അഭിപ്രായത്തിൽ, ഈ ശീലം ദൈനംദിന ജീവിതത്തിൽ ഉൾപ്പെടുത്തുന്നത് മൊത്തത്തിലുള്ള ആരോഗ്യവും ദീർഘായുസും വർധിപ്പിക്കും.
“ഏകദേശം 80,000 മുതിർന്നവരിൽ നടത്തിയ ഒരു വലിയ പഠനത്തിൽ നടത്തവും ദീർഘകാല ആരോഗ്യവും തമ്മിലുള്ള വ്യക്തമായ ബന്ധം കണ്ടെത്തി. ഒരു ദിവസം ഏകദേശം 10,000 ചുവടുകൾ നടക്കുന്നത് ഡിമെൻഷ്യയുടെ അപകടസാധ്യത ഗണ്യമായി കുറയ്ക്കുന്നതായി കണ്ടെത്തി. വേഗത്തിൽ നടന്നവർക്ക് ഇതിലും വലിയ ഫലം ലഭിച്ചു,” അദ്ദേഹം ഇൻസ്റ്റഗ്രാം പോസ്റ്റിൽ പറഞ്ഞു. ഒരു ദിവസം ഓരോ 2,000 ചുവടുകൾ നടക്കുമ്പോൾ അകാല മരണത്തിനുള്ള സാധ്യത ഏകദേശം 10% കുറയുന്നു എന്നാണ് മറ്റൊരു പഠനം വെളിപ്പെടുത്തിയത്.
ദിനചര്യയിൽ നടത്തം എങ്ങനെ ഉൾപ്പെടുത്താം
“നിങ്ങളുടെ ദിനചര്യയിൽ നടത്തം ഉൾപ്പെടുത്തുക. പടികൾ കയറുക, ഫോൺ വിളിക്കുമ്പോൾ നടക്കുക. ചെറിയ മാറ്റങ്ങൾ ജീവിതത്തിൽ വലിയ മാറ്റങ്ങൾ വരുത്തും. മൂന്ന് മിനിറ്റ് വേഗത്തിലുള്ള നടത്തവും മൂന്ന് മിനിറ്റ് പതിയെയുള്ള നടത്തവും മാറിമാറി ശീലിക്കുക. ഇത് ലളിതമാണ്, പക്ഷേ വളരെ ഫലപ്രദമാണ്. തലച്ചോറിന്റെ ആരോഗ്യം, ദീർഘായുസ്, മൊത്തത്തിലുള്ള ക്ഷേമം എന്നിവ മെച്ചപ്പെടുത്തുന്നതിനുള്ള ശക്തമായ ഉപകരണമായി നടത്തം മാറും,” അദ്ദേഹം അഭിപ്രായപ്പെട്ടു.
ഭക്ഷണശേഷമുള്ള നടത്തം
ആഹാരം കഴിച്ചതിനു ശേഷം നടക്കുന്നത് രക്തത്തിലെ പഞ്ചസാരയുടെ അളവിൽ ഗണ്യമായ സ്വാധീനം ചെലുത്തും. ഭക്ഷണത്തിനു ശേഷം 30 മിനിറ്റ് എങ്കിലും നടക്കുന്നത് ശരീരത്തിലെ പഞ്ചസാരയുടെ അളവ് നിയന്ത്രിക്കാൻ സഹായിക്കും. ഭക്ഷണം കഴിച്ചതിനു ശേഷം പഞ്ചസാരയുടെ അളവ് കൂടിയും കുറഞ്ഞും വളരെ പെട്ടെന്ന് വ്യതിയാനങ്ങൾ സംഭവിച്ചേക്കാം. ഭക്ഷണത്തിൽ നിന്നുള്ള ഗ്ലൂക്കോസ് വിഘടിക്കുന്നതിൻ്റെ ഭാഗമായാണ് ഇത് സംഭവിക്കുന്നത്. രക്തത്തിലെ പഞ്ചസാരയുടെ അളവ് ഒരുപക്ഷെ പെട്ടെന്നു വർധിച്ചേക്കാം.
കൂടാതെ ഗ്ലൂക്കോസിന് കോശങ്ങളിലേക്ക് എത്തിക്കുന്നതിനായി ഇൻസുലിൻ ഉത്പാദിപ്പിക്കപ്പെടുന്നു. അനങ്ങാതെ ഇരിക്കുമ്പോഴാണ് അതിൽ മാത്രം ശ്രദ്ധ കേന്ദ്രീകരിക്കുന്നത്. എന്നാൽ ചെറിയ ഒരനക്കം പോലും പേശികളെ സജീവമാക്കുന്നു. ഈ അവസരത്തിൽ അധിക ഊർജ്ജം ആവശ്യമായി വരികയും ശരീരം അതിനായി പ്രവർത്തിക്കുന്നു. രക്തത്തിലെ പഞ്ചസാരയുടെ അളവ് കുറയുന്നു.
