വെണ്ടക്ക രാത്രി മുഴുവൻ കുതിർത്ത വെള്ളം നിരവധി ആരോഗ്യ ഗുണങ്ങൾ വാഗ്‌ദാനം ചെയ്യുന്നുണ്ട്. മെച്ചപ്പെട്ട കുടൽ ആരോഗ്യം മുതൽ മെച്ചപ്പെട്ട ജലാംശം വരെ അനവധി ആരോഗ്യ ഗുണങ്ങളുണ്ട്. ഒരു മാസം മുഴുവൻ എല്ലാ ദിവസവും വെണ്ടയ്ക്ക വെള്ളം കുടിക്കുമ്പോൾ യഥാർത്ഥത്തിൽ എന്താണ് സംഭവിക്കുന്നത്?.
- ദഹനം മെച്ചപ്പെട്ടേക്കാം
വെണ്ടക്കയിൽ സ്വാഭാവികമായും ലയിക്കുന്ന നാരുകളും മ്യൂസിലേജും അടങ്ങിയിട്ടുണ്ട്, ഇത് കുതിർക്കുമ്പോൾ പുറത്തുവരുന്ന ഒരു ജെൽ പോലുള്ള പദാർത്ഥമാണ്. ഈ മിശ്രിതം ദഹനനാളത്തെ ലൂബ്രിക്കേറ്റ് ചെയ്യാനും മലം മൃദുവാക്കാനും എളുപ്പത്തിലുള്ള മലവിസർജനത്തിനും സഹായിക്കും.
- കൂടുതൽ നേരം വയറു നിറഞ്ഞതായി തോന്നിയേക്കാം
അവയിലെ ലയിക്കുന്ന നാരുകൾ കട്ടിയുള്ള ഒരു ജെല്ലായി വികസിക്കുന്നു. രാവിലെ ഇത് കുടിക്കുന്നത് വയറു ശൂന്യമാകുന്നത് മന്ദഗതിയിലാക്കുകയും കൂടുതൽ നേരം വയറു നിറഞ്ഞതായി തോന്നുകയും ചെയ്യും. അതിരാവിലെ വിശപ്പ് നിയന്ത്രിക്കാനും അനാവശ്യമായ ലഘുഭക്ഷണം ഒഴിവാക്കാൻ സഹായിക്കാനും പരോക്ഷമായി ശരീരം ഭാരം കുറയ്ക്കാനുള്ള ലക്ഷ്യങ്ങളെ പിന്തുണയ്ക്കാനും സഹായിക്കും.
- രക്തത്തിലെ പഞ്ചസാരയുടെ അളവ് സ്ഥിരപ്പെടുത്തിയേക്കാം
വെണ്ടക്കയിലെ ഉയർന്ന അളവിലുള്ള ഭക്ഷണ നാരുകൾ പ്രമേഹത്തെ നിയന്ത്രിക്കാൻ സഹായിക്കും. വെണ്ടക്കയ്ക്ക് ഏകദേശം 20 എന്ന വളരെ കുറഞ്ഞ ഗ്ലൈസെമിക് സൂചിക ഉള്ളതിനാൽ പ്രമേഹമുള്ളവർക്ക് ഇതൊരു നല്ല ഓപ്ഷനാണ്. കുറച്ച് ആഴ്ചകൾ വെണ്ടക്ക വെള്ളം കുടിക്കുമ്പോൾ, ഭക്ഷണത്തിന് ശേഷം പെട്ടെന്നുള്ള സ്പൈക്കുകൾ കുറയ്ക്കാനും മികച്ച ഇൻസുലിൻ സംവേദനക്ഷമതയെ പിന്തുണയ്ക്കാനും ഇത് സഹായിച്ചേക്കാം.
- ചർമ്മം കുറച്ചുകൂടി വ്യക്തമാകും
വെണ്ടക്കയിൽ മഗ്നീഷ്യം, പൊട്ടാസ്യം തുടങ്ങിയ ധാതുക്കളും ആന്റിഓക്‌സിഡന്റുകളും വൈറ്റമിൻ സിയും അടങ്ങിയിട്ടുണ്ട്, ഇത് ചർമ്മത്തിന്റെ ആരോഗ്യത്തെ പിന്തുണയ്ക്കുന്നു. മെച്ചപ്പെട്ട ജലാംശം, മികച്ച ദഹനം, കൂടുതൽ സ്ഥിരതയുള്ള രക്തത്തിലെ പഞ്ചസാരയുടെ അളവ് എന്നിവ പലപ്പോഴും മുഖക്കുരു കുറയുന്നതിനും, മങ്ങൽ കുറയുന്നതിനും, നേരിയ സ്വാഭാവിക തിളക്കത്തിനും കാരണമാകുന്നു.
- ഊർജ നിലകൾ സ്ഥിരമാകുന്നു
വെണ്ടക്ക വെള്ളം ദഹനം സുസ്ഥിരമാക്കുന്നതിനും രക്തത്തിലെ പഞ്ചസാരയുടെ അളവ് നിയന്ത്രിക്കുന്നതിനും സഹായിക്കുന്നതിനാൽ, ദിവസം മുഴുവൻ നിങ്ങളുടെ ഊർജ നില കൂടുതൽ സ്ഥിരതയുള്ളതായി അനുഭവപ്പെടും. ഉച്ചകഴിഞ്ഞ് പെട്ടെന്ന് ഉയർച്ചയും താഴ്ചയും അനുഭവപ്പെടാനുള്ള സാധ്യത കുറവാണ്.
ആരൊക്കെ ശ്രദ്ധിക്കണം?
വെണ്ടക്ക വെള്ളം കുടിക്കുന്നതിന്റെ ഗുണങ്ങൾ ധാരാളമാണെങ്കിലും ദഹനപ്രശ്നങ്ങൾക്ക് സാധ്യതയുള്ളതിനാൽ ജാഗ്രത വേണം. അമിതമായ ഉപഭോഗം ഓക്കാനം അല്ലെങ്കിൽ ഛർദി പോലുള്ള അസ്വസ്ഥതകളിലേക്ക് നയിച്ചേക്കാം. വെണ്ടക്കയോട് അലർജിയുള്ളവർ ഈ വെള്ളം കുടിക്കുന്നത് ഒഴിവാക്കണം.
