ഇന്നത്തെ തിരക്കേറിയ ജീവിതത്തിൽ പതിവായി രക്തപരിശോധന നടത്തുന്നത് ആരോഗ്യം നിലനിർത്താനും ഏത് പ്രശ്‌നങ്ങളും നേരത്തേ കണ്ടെത്താനും സഹായിക്കും. രക്തസമ്മർദം പോലുള്ള ആരോഗ്യപ്രശ്നങ്ങൾ നേരത്തെ തിരിച്ചറിയുന്നത് ചികിത്സ വൈകുന്നതുമൂലമുള്ള ആരോഗ്യ അപകടങ്ങൾ മറികടക്കാൻ സഹായിക്കുന്നു. 24 വർഷത്തിലേറെ അനുഭവ പരിചയമുള്ള, ന്യൂഡൽഹിയിലെ പ്രമേഹരോഗ വിദഗ്ദ്ധനായ ഡോ. ബ്രിജ്മോഹൻ അറോറ ദീർഘവും ആരോഗ്യകരവുമായ ജീവിതത്തിലേക്ക് മുതൽക്കൂട്ടാകുന്ന ചില ശീലങ്ങളെക്കുറിച്ച് പറഞ്ഞിട്ടുണ്ട്.
ഡോക്ടറുടെ അഭിപ്രായത്തിൽ, ഈ ലളിതവും എന്നാൽ ശക്തവുമായ ശീലങ്ങൾ നീണ്ടുനിൽക്കുന്ന രോഗങ്ങളിൽ നിന്നും ഉയർന്ന ചികിത്സാ ചെലവുകളിൽ നിന്നും സംരക്ഷിക്കുകയും ആരോഗ്യകരവും സമ്പന്നവുമായ ഒരു വ്യക്തിയാക്കി നിങ്ങളെ മാറ്റുകയും ചെയ്യും. “ഈ ഏഴ് ശീലങ്ങൾ നിങ്ങളെ വർഷങ്ങളോളം രോഗങ്ങളിൽ നിന്ന് രക്ഷിക്കുകയും ആയിരക്കണക്കിന് രൂപയുടെ മെഡിക്കൽ ബില്ലുകളിൽ നിന്ന് രക്ഷിക്കുകയും ചെയ്യും,” ഇൻസ്റ്റഗ്രാം പോസ്റ്റിൽ ഈ ശീലങ്ങൾ പങ്കുവെച്ചുകൊണ്ട് ഡോ.അറോറ പറഞ്ഞു.
- പതിവ് രക്തപരിശോധനകൾ നടത്തുക
- പ്രമേഹത്തിന്റെയും ബിപിയുടെയും ടാർഗറ്റ് നമ്പറുകൾ അറിയുക
- ചികിത്സ വൈകിപ്പിക്കരുത്
- ഒരിക്കലും സ്വയം മരുന്ന് കഴിക്കരുത്
- കുറിപ്പടികൾ പാലിക്കുക
- അനാവശ്യമായ സപ്ലിമെന്റുകൾ ഒഴിവാക്കുക
- മരുന്നുകൾ കൃത്യമായും കൃത്യസമയത്തും കഴിക്കുക
ഈ ശീലങ്ങൾ എന്തുകൊണ്ട് പ്രധാനം?
ഡോക്ടറുടെ അഭിപ്രായത്തിൽ, പതിവ് പരിശോധനകൾ നിങ്ങളുടെ ആരോഗ്യം നിലനിർത്താനും എന്തെങ്കിലും പ്രശ്നങ്ങൾ ഉണ്ടെങ്കിൽ നേരത്തെ കണ്ടെത്താനും സഹായിക്കുമെങ്കിലും, നിങ്ങൾ ഒരിക്കലും സ്വയം മരുന്ന് കഴിക്കരുത്. ഗൂഗിളിനെയല്ല, നിങ്ങളുടെ ഡോക്ടറെ വിശ്വസിക്കുക, കാരണം സ്വയം മരുന്ന് ഗുണത്തേക്കാളേറെ ദോഷത്തിലേക്ക് നയിച്ചേക്കാമെന്ന് അദ്ദേഹം അഭിപ്രായപ്പെട്ടു.
നിങ്ങളുടെ ചികിത്സാ രീതിയിൽ ഉറച്ചുനിൽക്കുക. ആവശ്യമുള്ളപ്പോൾ മാത്രം സപ്ലിമെന്റുകൾ കഴിക്കണമെന്നും എല്ലായ്പ്പോഴും നിങ്ങളുടെ ഡോക്ടറെ സമീപിക്കണമെന്നും അദ്ദേഹം പറഞ്ഞു. മരുന്നുകൾ ഒരു ശീലമാക്കുക; നിർദ്ദേശിച്ചതുപോലെ അവ കഴിക്കുക. അതിലൂടെ നിങ്ങൾ കൂടുതൽ ആരോഗ്യവാനായ ഒരു വ്യക്തിയിലേക്കുള്ള പാതയിലാകുമെന്ന് ഡോ.അറോറ പറഞ്ഞു
