ചലനം, ചിന്തകൾ, വികാരങ്ങൾ, ഓർമ്മ എന്നിവയുൾപ്പെടെ എല്ലാ ശാരീരിക പ്രവർത്തനങ്ങളെയും മാനസിക പ്രക്രിയകളെയും മസ്തിഷ്കം നിയന്ത്രിക്കുന്നതിനാൽ, തലച്ചോറിന്റെ ആരോഗ്യം നിങ്ങളുടെ മൊത്തത്തിലുള്ള ആരോഗ്യത്തിന്റെ ഒരു നിർണായക ഘടകമാണ്. തലച്ചോറിന്റെ ആരോഗ്യം നിലനിർത്തുന്നതിൽ ഭക്ഷണക്രമം, വ്യായാമം, വിശ്രമം എന്നിവ പ്രധാന ഘടകങ്ങളാണെങ്കിലും, ജീവിതശൈലി ശീലങ്ങളും തലച്ചോറിന്റെ ആരോഗ്യത്തെ ബാധിക്കും. ചിലപ്പോൾ, ദോഷം വരുത്തുന്നില്ലെന്ന് നിങ്ങൾ വിശ്വസിക്കുന്ന ചില ശീലങ്ങൾ വൈജ്ഞാനിക തകർച്ചയ്ക്കും തലച്ചോറിന്റെ തകരാറുകൾക്കും കാരണമാകും.
തലച്ചോറിന് ദോഷം വരുത്തുന്ന 3 കാര്യങ്ങൾ
ഒരു ന്യൂറോളജിസ്റ്റ് എന്ന നിലയിൽ താൻ ഒഴിവാക്കുന്ന മൂന്ന് കാര്യങ്ങളെക്കുറിച്ച് ഡോ.ബിംഗ് അടുത്തിടെ ഇൻസ്റ്റഗ്രാം പോസ്റ്റിൽ വിശദീകരിച്ചു. മറ്റുള്ളവരും ഇത് ഒഴിവാക്കാൻ അദ്ദേഹം ആവശ്യപ്പെട്ടു. ദീർഘനേരം ഹെഡ്‌ഫോണുകൾ ഉപയോഗിക്കുകയോ അതുമായി ഉറങ്ങുകയോ ചെയ്യുക, മോണയുടെ ആരോഗ്യം അവഗണിക്കുക, കൂടുതൽ സമയം ടോയ്‌ലറ്റിൽ ഇരിക്കുക തുടങ്ങിയവ ഈ ശീലങ്ങളിൽ ഉൾപ്പെടുന്നു. അവ നിങ്ങളുടെ തലച്ചോറിനെ എങ്ങനെ ദോഷകരമായി ബാധിക്കുന്നുവെന്ന് നോക്കാം.
- കിടക്കയിൽ ഹെഡ്‌ഫോണുകൾ ഉപയോഗിക്കുക
കിടക്കയിൽ ഹെഡ്‌ഫോണുകൾ ഉപയോഗിക്കുന്നതിനെതിരെ ഡോ.ബിംഗ് മുന്നറിയിപ്പ് നൽകി. നിങ്ങൾ കിടക്കയിൽ ഹെഡ്‌ഫോണുകൾ ഉപയോഗിക്കുന്ന ആളുകളിൽ ഒരാളാണെങ്കിൽ, നിങ്ങൾ പ്ലേ ചെയ്യുന്ന ശബ്ദം നിശബ്ദമായിരിക്കണമെന്നും ഉച്ചത്തിലായിരിക്കരുതെന്നും ഉറപ്പാക്കുക. കാരണം ഉച്ചത്തിലുള്ള ശബ്ദങ്ങൾ അകത്തെ ചെവിയിലെ രോമകോശങ്ങളെ നശിപ്പിക്കുകയും കാലക്രമേണ കേൾവിക്കുറവിനും ഡിമെൻഷ്യയ്ക്കും സാധ്യത വർധിപ്പിക്കുകയും ചെയ്യും.
മാത്രമല്ല, ദീർഘനേരം ഇയർബഡുകളും ഹെഡ്‌ഫോണുകളും ധരിക്കുന്നത് ഈർപ്പവും ബാക്ടീരിയയും കുമിഞ്ഞുകൂടാൻ കാരണമാകും. ഇത് ചെവിയിൽ അണുബാധ ഉണ്ടാകാനുള്ള സാധ്യത വർധിപ്പിക്കും. ഉറക്കത്തിൽ ഉച്ചത്തിലുള്ള ശബ്ദങ്ങൾ കേൾക്കുകയാണെങ്കിൽ, അത് ആഴത്തിലുള്ള ഉറക്കത്തെ തടസ്സപ്പെടുത്തുകയും വിഷവസ്തുക്കളെ പുറന്തള്ളുന്ന തലച്ചോറിന്റെ രാത്രികാല ശുചീകരണ ചക്രമായ ലിംഫറ്റിക് സിസ്റ്റത്തെ തടസപ്പെടുത്തുകയും ചെയ്യും.
- മോണയുടെ ആരോഗ്യം അവഗണിക്കുക
അടുത്തതായി, മോണയുടെ ആരോഗ്യം അവഗണിക്കുന്നതിനെതിരെ ന്യൂറോളജിസ്റ്റ് ഉപദേശിച്ചു. “എല്ലാ രാത്രിയും ഞാൻ ഫ്ലോസ് ചെയ്യുന്നു, വാട്ടർ ഫ്ലോസ് ചെയ്യുന്നു, തുടർന്ന് ബ്രഷ് ചെയ്യുന്നു, കാരണം സമീപകാല പഠനങ്ങൾ കാണിക്കുന്നത് മോണയുടെ ആരോഗ്യം ഒരാളുടെ തലച്ചോറിന്റെ ആരോഗ്യവുമായി ബന്ധപ്പെട്ടിരിക്കാമെന്നാണ്.”
- 5 മിനിറ്റിൽ കൂടുതൽ ടോയ്‌ലറ്റിൽ ഇരിക്കുക
അവസാനമായി, ന്യൂറോളജിസ്റ്റ് 5 മിനിറ്റിൽ കൂടുതൽ ടോയ്‌ലറ്റിൽ ഇരിക്കരുതെന്ന് ഉപദേശിച്ചു. “കൂടുതൽ നേരം ഇരിക്കുന്നതും ആയാസപ്പെടുന്നതും നിങ്ങളുടെ കാലുകളിൽ രക്തം കെട്ടിനിൽക്കാനും രക്തസമ്മർദം കുറയാനും ഇടയാക്കും. നിങ്ങളുടെ തലച്ചോറിലേക്ക് ആവശ്യത്തിന് രക്തം പോകാത്തത് ബോധരഹിതനാക്കും.” ഒരിക്കലും ടോയ്‌ലറ്റിൽ കൂടുതൽ സമയം ചെലവഴിക്കരുതെന്ന് അദ്ദേഹം മുന്നറിയിപ്പ് നൽകി.
