വൈറ്റമിൻ സിയുടെ കലവറയായ ഓറഞ്ച്, ലോകമെമ്പാടുമുള്ളവരുടെ പ്രിയപ്പെട്ട പഴങ്ങളിൽ ഒന്നാണ്. മധുരവും നേരിയ പുളിയും ചേർന്ന ഈ സിട്രസ് പഴം രുചികരം മാത്രമല്ല, നിരവധി ആരോഗ്യ ഗുണങ്ങൾ നൽകുന്നുണ്ട്. ദിവസവും ഒരു ഓറഞ്ച് കഴിക്കുന്നത് ഒരു വ്യക്തിയുടെ ആരോഗ്യത്തെ മാറ്റിമറിക്കും. ദിവസവും ഒരു ഓറഞ്ച് കഴിക്കുന്നതിന്റെ 6 ഗുണങ്ങൾ ഇവയാണ്.
- തിളക്കവും ആരോഗ്യവുമുള്ള ചർമ്മം
വൈറ്റമിൻ സി കൂടുതലുള്ളവരിൽ, കുറവുള്ളവരെ അപേക്ഷിച്ച് ചുളിവുകൾ കുറവാണെന്ന് പഠനങ്ങൾ തെളിയിച്ചിട്ടുണ്ട്. ഓറഞ്ചിൽ വൈറ്റമിൻ സി അടങ്ങിയിട്ടുണ്ട്. ഇത് ചർമ്മത്തിന് ലഭിക്കുന്ന ഏറ്റവും ശക്തമായ ആന്റിഓക്സിഡന്റുകളിൽ ഒന്നാണ്. ഒരു ഇടത്തരം ഓറഞ്ച് മാത്രം കഴിക്കുന്നത് ദിവസേനയുള്ള വൈറ്റമിൻ സി ആവശ്യകതയുടെ 90% ത്തിലധികം നൽകുന്നു. ഓറഞ്ച് പതിവായി കഴിക്കുമ്പോൾ ചർമ്മത്തിന്റെ നിറവും തിളക്കവും മെച്ചപ്പെടുത്തുമെന്ന് തെളിയിക്കപ്പെട്ടിട്ടുണ്ട്.
- രോഗപ്രതിരോധശേഷി കൂടുന്നു
വെളുത്ത രക്താണുക്കളുടെ ഉത്പാദനത്തിന് വൈറ്റമിൻ സി അത്യന്താപേക്ഷിതമാണ്. ഇത് രോഗപ്രതിരോധ സംവിധാനത്തെ ശക്തിപ്പെടുത്തും. കോശങ്ങളുടെ അപചയം തടയുന്നതിനും കൊളാജന് സിന്തസിസ് പ്രോത്സാഹിപ്പിക്കുന്നതിനും പുറമേ രക്തസമ്മര്ദ്ദം കുറയ്ക്കാനും സ്ട്രെസ് ഹോര്മോണായ കോര്ട്ടിസോളിന്റെ അളവ് കുറയ്ക്കാനും വൈറ്റമിന് സി സഹായിക്കും.
- ഹൃദയാരോഗ്യത്തിന് ഗുണം ചെയ്യുന്നു
ഓറഞ്ച് കഴിക്കുന്നത് ഹൃദയത്തിന്റെ ആരോഗ്യത്തിന് മികച്ചതാണ്. ഓറഞ്ചിൽ അടങ്ങിയ പൊട്ടാസ്യം രക്തസമ്മർദ്ദം നിയന്ത്രിക്കാൻ സഹായിക്കുന്നു, ഇത് ഹൃദയാഘാതം, പക്ഷാഘാതം എന്നിവയ്ക്കുള്ള സാധ്യത കുറയ്ക്കുന്നു. ഓറഞ്ചിലെ ലയിക്കുന്ന നാരുകൾ ചീത്ത കൊളസ്ട്രോളിന്റെ അളവ് കുറയ്ക്കാൻ സഹായിക്കുന്നു.
- മെച്ചപ്പെട്ട ദഹനവും കുടലിന്റെ ആരോഗ്യവും
ഒരു ഇടത്തരം ഓറഞ്ചിൽ ഏകദേശം 2-3 ഗ്രാം ഭക്ഷണ നാരുകൾ അടങ്ങിയിട്ടുണ്ട്, കൂടുതലും ലയിക്കുന്ന നാരുകളുടെ രൂപത്തിലാണ്, പെക്റ്റിൻ. ഇത് ദഹനപ്രക്രിയയെ സുഗമമാക്കുകയും മലബന്ധം തടയുകയും ചെയ്യുന്നു. ഓറഞ്ചിൽ ഉയർന്ന ജലാംശം അടങ്ങിയിട്ടുണ്ട്. ഇത് ദഹനവ്യവസ്ഥയെ ജലാംശം നിലനിർത്താനും സുഗമമായി പ്രവർത്തിക്കാനും സഹായിക്കുന്നു. ജ്യൂസ് കുടിക്കുന്നതിനുപകരം മുഴുവൻ ഓറഞ്ച് കഴിക്കുന്നത് ദഹന ആരോഗ്യത്തിന് വളരെ പ്രധാനമാണ്.
- തലച്ചോറിന്റെ ആരോഗ്യം
ഓറഞ്ചിൽ സ്വാഭാവികമായും ഫ്ലേവനോയ്ഡുകൾ ധാരാളമുണ്ട്. ഫ്ലേവനോൺ അടങ്ങിയ ഓറഞ്ച് ജ്യൂസ് ദിവസവും കുടിക്കുന്ന പ്രായമായവരിൽ ശ്രദ്ധയും വൈജ്ഞാനിക പ്രവർത്തനത്തിൽ ഗണ്യമായ പുരോഗതിയും ഒരു പഠനത്തിൽ കണ്ടെത്തി. ഓറഞ്ച് മാനസികാരോഗ്യത്തിനും സഹായിച്ചേക്കാം. സിട്രസ് പഴങ്ങൾ പതിവായി കഴിക്കുന്ന ആളുകൾക്ക് വിഷാദരോഗ സാധ്യത കുറവാണെന്ന് 2024 ലെ ഒരു പഠനം കണ്ടെത്തി.
- ശരീര ഭാരം കുറയ്ക്കുന്നു
ഉയർന്ന ഫൈബർ അടങ്ങിയ ഓറഞ്ച് ശരീരഭാരം കുറയ്ക്കുന്നതിന് സഹായിക്കുന്നു. ഓറഞ്ചിൽ കാലറി കുറവാണെങ്കിലും നാരുകളും വെള്ളവും കൂടുതലാണ്. ഇത് സംതൃപ്തി നൽകുന്നു.
