ആർത്തവവിരാമം അഥവാ മെനോപോസ് എന്നത് സ്ത്രീകളുടെ ജീവിതത്തിലെ സ്വാഭാവികമായ ഒരു ഘട്ടമാണ്. സാധാരണയായി 45 വയസ്സിനു ശേഷമാണ് ഈ മാറ്റങ്ങൾ കണ്ടുതുടങ്ങുന്നത് എന്നാണ് പൊതുവെയുള്ള ധാരണ. എന്നാൽ, ചില ഘടകങ്ങൾ കാരണം മുപ്പതുകളിൽ തന്നെ ആർത്തവ വിരാമ ലക്ഷണങ്ങൾ ഉണ്ടാകാമെന്ന് ആരോഗ്യ വിദഗ്ധർ ചൂണ്ടിക്കാട്ടുന്നു.
ഫിറ്റ്നസ് കോച്ചായ ഗുർപ്രീത് ഗ്രോവർ പറയുന്നതനുസരിച്ച്, ആർത്തവവിരാമത്തിലേക്കുള്ള മാറ്റം പെട്ടെന്നുണ്ടാകുന്ന ഒന്നല്ല. മുപ്പതുകളുടെ പകുതിയോടെ തന്നെ ശരീരത്തിൽ ഈസ്ട്രജൻ, പ്രൊജസ്റ്ററോൺ ഹോർമോണുകളുടെ അളവിൽ നേരിയ വ്യതിയാനങ്ങൾ കണ്ടുതുടങ്ങും. ഈ ഘട്ടത്തിൽ ശ്രദ്ധിച്ചില്ലെങ്കിൽ താഴെ പറയുന്ന പ്രശ്നങ്ങൾ ഭാവിയിൽ സങ്കീർണ്ണമായേക്കാം.
മെറ്റബോളിസം കുറയുന്നു: ശരീരത്തിന്റെ ഉപാപചയ പ്രവർത്തനങ്ങൾ സാവധാനത്തിലാകുകയും അമിതഭാരം കൂടാൻ സാധ്യതയേറുകയും ചെയ്യുന്നു.
പേശികളുടെ ബലം കുറയുന്നു: മുപ്പതുകൾ മുതൽ പേശികളുടെ അളവ് കുറഞ്ഞു തുടങ്ങും.
എല്ലുകളുടെ ആരോഗ്യം: എല്ലുകളുടെ സാന്ദ്രത കുറയുന്നത് ഭാവിയിൽ ഓസ്റ്റിയോപോറോസിസ് പോലുള്ള അസുഖങ്ങളിലേക്ക് നയിക്കാം.
മുൻകൂട്ടിയുള്ള തയ്യാറെടുപ്പുകൾ എങ്ങനെ?
ആർത്തവവിരാമ കാലഘട്ടം സുഗമമാക്കാൻ മുപ്പതുകളിൽ തന്നെ ചില ജീവിതശൈലീ മാറ്റങ്ങൾ വരുത്തേണ്ടതുണ്ട്. വ്യായാമം ശീലമാക്കുക. വെറും നടത്തം മാത്രം പോരാ, പേശികൾക്ക് ബലം നൽകുന്ന ‘സ്ട്രെങ്ത് ട്രെയിനിംഗ്’ ജീവിതത്തിന്റെ ഭാഗമാക്കണം. ഇത് മെറ്റബോളിസം നിലനിർത്താനും എല്ലുകളുടെ ആരോഗ്യം സംരക്ഷിക്കാനും സഹായിക്കും. പ്രോട്ടീൻ അടങ്ങിയ ഭക്ഷണങ്ങൾ, നാരുകൾ, ആരോഗ്യകരമായ കൊഴുപ്പുകൾ എന്നിവ ഭക്ഷണത്തിൽ ഉൾപ്പെടുത്തുക. കുറഞ്ഞ കൊഴുപ്പുള്ള സമീകൃതാഹാരം ഹൃദ്രോഗ സാധ്യത കുറയ്ക്കും. കൃത്യസമയത്തുള്ള ഉറക്കം, മാനസിക സമ്മർദ്ദം കുറയ്ക്കാനുള്ള വഴികൾ എന്നിവ ഹോർമോൺ നില കൃത്യമായി നിലനിർത്താൻ സഹായിക്കും.
നേരത്തെയുള്ള ആർത്തവവിരാമം
ചിലരിൽ പാരമ്പര്യമായ കാരണങ്ങൾ കൊണ്ടോ, പുകവലി, മറ്റ് രോഗങ്ങൾ എന്നിവ കൊണ്ടോ 45 വയസ്സിനു മുൻപേ ആർത്തവവിരാമം സംഭവിക്കാറുണ്ട്. ഇത് ഹൃദയാരോഗ്യത്തെയും എല്ലുകളുടെ ബലത്തെയും ബാധിച്ചേക്കാം. അതുകൊണ്ട് തന്നെ, ശരീരം നൽകുന്ന സൂചനകൾ (ഉദാഹരണത്തിന്: മാസമുറയിലെ വ്യത്യാസങ്ങൾ, ഉറക്കമില്ലായ്മ, അമിതമായ ഉത്കണ്ഠ) മുൻകൂട്ടി തിരിച്ചറിഞ്ഞ് വിദഗ്ധ ഉപദേശം തേടേണ്ടത് അത്യാവശ്യമാണ്.
മെനോപോസ് എന്നത് പ്രായമാകുമ്പോൾ മാത്രം ചിന്തിക്കേണ്ട ഒന്നല്ല. മുപ്പതുകളിൽ നിങ്ങൾ എടുക്കുന്ന തീരുമാനങ്ങളും പിന്തുടരുന്ന ശീലങ്ങളുമാണ് നിങ്ങളുടെ പിൽക്കാല ജീവിതത്തിന്റെ ആരോഗ്യം നിശ്ചയിക്കുന്നത്. ശരിയായ ഭക്ഷണവും വ്യായാമവും വഴി ഈ മാറ്റങ്ങളെ ആത്മവിശ്വാസത്തോടെ നേരിടാൻ സ്ത്രീകൾക്ക് സാധിക്കും.
