ശസ്ത്രക്രിയയ്ക്ക് മുൻപ് മദ്യം കഴിക്കരുതെന്ന് ഡോക്ടർമാർ കർശനമായി നിർദ്ദേശിക്കാറുണ്ട്. ടെൻഷൻ കുറയ്ക്കാനോ, പേശീവേദന ഒഴിവാക്കാനോ തലേദിവസം അൽപം മദ്യം കഴിക്കുന്നത് നിരുപദ്രവകരമാണെന്ന് നിങ്ങൾ കരുതുന്നുണ്ടാവാം. എന്നാൽ, അനസ്തേഷ്യ മരുന്നുകൾ ശരീരത്തിൽ പ്രവർത്തിക്കുന്ന രീതിയെ മദ്യം ബാധിക്കും. ഇത് അനസ്തേഷ്യയുടെ ഫലങ്ങളെ ദോഷകരമായി ബാധിക്കാനും രോഗിക്ക് അപകടകരമാക്കാനും സാധ്യതയുണ്ട്.
അനസ്തീസിയോളജിസ്റ്റും ഇന്റർവെൻഷണൽ പെയിൻ മെഡിസിൻ സ്പെഷ്യലിസ്റ്റുമായ ഡോ.കുനാൽ സൂദ് ശസ്ത്രക്രിയക്ക് മുമ്പ് മദ്യം ഒഴിവാക്കേണ്ടതിന്റെ പ്രാധാന്യം വിശദീകരിച്ചിട്ടുണ്ട്. മദ്യപാനം അനസ്തേഷ്യയുമായി എങ്ങനെ പ്രതികരിക്കുന്നുവെന്നും, എന്തുകൊണ്ട് ഡോക്ടർമാരോട് സത്യസന്ധത പുലർത്തണമെന്നും അദ്ദേഹം എടുത്തുപറയുന്നു.
ശസ്ത്രക്രിയക്ക് മുമ്പ് മദ്യം ഒഴിവാക്കാൻ പറയുന്നതിന്റെ പ്രധാന കാരണങ്ങൾ ഇവയാണ്:
- അനസ്തേഷ്യയുടെ അളവ് കൂടാൻ സാധ്യത
മദ്യവും അനസ്തേഷ്യ മരുന്നുകളും കേന്ദ്ര നാഡീവ്യൂഹത്തിൽ സമാനമായ പാതകളിലൂടെയാണ് പ്രവർത്തിക്കുന്നത്. മദ്യം ശരീരത്തിൽ നിലനിൽക്കുമ്പോൾ, അത് അനസ്തേഷ്യയുടെ സാധാരണ ഡോസുകളുടെ ഫലത്തെ കുറയ്ക്കുന്നു. ഇത് കാരണം, മതിയായ മയക്കം ലഭിക്കുന്നതിന് അനസ്തീസിയോളജിസ്റ്റിന് സാധാരണയിലും കൂടുതൽ അളവിൽ മരുന്ന് നൽകേണ്ടി വരും.
- മയക്കം പ്രവചനാതീതമാകുന്നു
ശരീരത്തിൽ മദ്യമുള്ളപ്പോൾ അനസ്തീസിയ നൽകുന്നത് സങ്കീർണ്ണമാക്കുന്നു. കാരണം, മരുന്നുകളോടുള്ള പ്രതികരണം വ്യത്യാസപ്പെടാം. അമിതമായ ലഹരിയിലാണെങ്കിൽ, ചിലപ്പോൾ അനസ്തേഷ്യയുടെ അളവ് കുറയ്ക്കേണ്ടി വരും. ഇത് അമിതമായ മയക്കം, ശ്വാസമെടുക്കാനുള്ള ബുദ്ധിമുട്ട്എന്നിവ വർധിപ്പിക്കും. മദ്യം എയർവേ റിഫ്ലെക്സുകളെ ദുർബലപ്പെടുത്തുകയും വയറ്റിലെ ദഹനപ്രക്രിയയെ മന്ദഗതിയിലാക്കുകയും ചെയ്യുന്നതിനാൽ, ശസ്ത്രക്രിയക്ക് മുമ്പുള്ള എയർവേ മാനേജ്മെന്റ് കൂടുതൽ അപകടകരമാകും.
- രക്തസമ്മർദ്ദം അതിവേഗം കുറയുന്നു
മദ്യം രക്തക്കുഴലുകൾ വികസിപ്പിക്കാൻ കാരണമാവുകയും രക്തസമ്മർദ്ദം കുറയ്ക്കുകയും ചെയ്യുന്നു. അനസ്തേഷ്യ നൽകുന്നതിന്റെ ഫലവും ഇതേപോലെ രക്തസമ്മർദ്ദം കുറയ്ക്കുന്നതാണ്. ഈ രണ്ട് ഘടകങ്ങളും ഒരുമിക്കുമ്പോൾ, രോഗിയുടെ രക്തസമ്മർദ്ദം പെട്ടെന്നും അതിരൂക്ഷമായും കുറയാൻ സാധ്യതയുണ്ട്.
- രക്തസ്രാവവും മുറിവുണങ്ങുന്നതിലെ കാലതാമസവും
ശരീരത്തിന്റെ രോഗശാന്തി പ്രതികരണങ്ങളെയും പ്രതിരോധശേഷിയെയും മദ്യം പ്രതികൂലമായി ബാധിക്കുന്നു. മദ്യം പ്ലേറ്റ്ലെറ്റിന്റെ പ്രവർത്തനത്തെയും രക്തം കട്ടപിടിക്കുന്ന പ്രക്രിയകളെയും തകരാറിലാക്കുന്നത് ശസ്ത്രക്രിയയ്ക്കിടെയുള്ള രക്തസ്രാവ സാധ്യത വർദ്ധിപ്പിക്കും. കൂടാതെ, ശസ്ത്രക്രിയക്ക് ശേഷമുള്ള മുറിവുണങ്ങൽ വൈകാനും അണുബാധകൾക്കുള്ള സാധ്യത കൂടാനും ഇത് കാരണമാകും.
നിങ്ങൾ കഴിഞ്ഞ 24 മണിക്കൂറിനുള്ളിൽ മദ്യപിക്കുകയോ മറ്റ് ലഹരിവസ്തുക്കൾ ഉപയോഗിക്കുകയോ ചെയ്തിട്ടുണ്ടെങ്കിൽ, അക്കാര്യം അനസ്തീസിയ ടീമിനെ കൃത്യമായി അറിയിക്കണം. ഇത് ഡോക്ടർമാർക്ക് ഡോസേജിൽ മാറ്റം വരുത്താനും, കൂടുതൽ സുരക്ഷിതമായ രീതികൾ തിരഞ്ഞെടുക്കാനും, സങ്കീർണ്ണതകൾ കുറയ്ക്കാനും സഹായിക്കും. ശസ്ത്രക്രിയക്ക് കുറഞ്ഞത് 24 മുതൽ 48 മണിക്കൂർ മുമ്പെങ്കിലും മദ്യം പൂർണ്ണമായും ഒഴിവാക്കണമെന്നാണ് മിക്ക ആരോഗ്യ മാർഗ്ഗനിർദ്ദേശങ്ങളും ശുപാർശ ചെയ്യുന്നത്.
