ഇഞ്ചിക്ക് ഇന്ത്യൻ അടുക്കളകളിൽ ഒരു ഔഷധത്തിന്റെ സ്ഥാനമുണ്ട്. ദഹനം മെച്ചപ്പെടുത്താനും ക്ഷീണം അകറ്റാനും സഹായിക്കുന്ന ഉത്തമമായ ഒറ്റമൂലിയാണ്. രാത്രി ഉറങ്ങാൻ കിടക്കുന്നതിന് മുൻപ് ഒരു ഗ്ലാസ് ഇഞ്ചി വെള്ളം കുടിക്കുന്നത് ദഹനത്തെയും മൊത്തത്തിലുള്ള ആരോഗ്യത്തെയും അത്ഭുതകരമായി മെച്ചപ്പെടുത്താൻ സഹായിക്കും. ഒരു മാസം സ്ഥിരമായി ഇഞ്ചി വെള്ളം കുടിക്കുമ്പോൾ ശരീരത്തിൽ ഉണ്ടാകുന്ന പ്രധാനപ്പെട്ട അഞ്ച് മാറ്റങ്ങൾ എന്തൊക്കെയാണെന്ന് നോക്കാം.
- ദഹനം കൂടുതൽ എളുപ്പമാകും
ഇഞ്ചിയിൽ ധാരാളമായി അടങ്ങിയിട്ടുള്ള ജിഞ്ചറോൾ ദഹന എൻസൈമുകളെ ഉത്തേജിപ്പിക്കുകയും ഭക്ഷണം വയറ്റിൽ നിന്ന് കടന്നുപോകുന്ന വേഗത കൂട്ടുകയും ചെയ്യുന്നു. ഒരു മാസത്തിനുള്ളിൽ ഗ്യാസ്, മലബന്ധം, വയറുവീർക്കൽ എന്നിവ കുറയുന്നത് ശ്രദ്ധയിൽപ്പെട്ടേക്കാം. കൂടാതെ, ഇഞ്ചിക്ക് കുടലിലെ നേരിയ വീക്കങ്ങൾ കുറയ്ക്കാൻ കഴിയുന്നതിനാൽ, രാവിലെ ഉണരുമ്പോൾ കൂടുതൽ സുഖകരവും ഉന്മേഷവുമുള്ളതായി അനുഭവപ്പെടും.
- വീക്കവും വേദനകളും കുറയും
ഇഞ്ചിയുടെ ശക്തമായ ആന്റി-ഇൻഫ്ലമേറ്ററി ഗുണങ്ങൾ, ദീർഘനേരം ഇരുന്നു ജോലി ചെയ്യുന്നതിനാലും വ്യായാമക്കുറവ് മൂലവും ഉണ്ടാകുന്ന ശരീരവേദനകളും പേശീവലിവുകളും കുറയ്ക്കാൻ സഹായിക്കും. ഇത് പേശീക്ഷീണം, ചെറിയ അസ്വസ്ഥതകൾ, കോശങ്ങളിലെ ഓക്സിഡേറ്റീവ് സമ്മർദ്ദം എന്നിവ കുറയ്ക്കുന്നതിന് സഹായകമാണ്.
- പ്രതിരോധശേഷി വർദ്ധിക്കും
ഇഞ്ചിയിൽ അടങ്ങിയിട്ടുള്ള ആന്റിഓക്സിഡന്റുകൾ ശരീരത്തിന്റെ പ്രതിരോധ സംവിധാനത്തെ ബലപ്പെടുത്താൻ സഹായിക്കുന്നു. ഒരു മാസം തുടർച്ചയായി ഇഞ്ചി വെള്ളം കുടിക്കുന്നത് തൊണ്ടയിലെ അസ്വസ്ഥത കുറയ്ക്കാനും, ജലദോഷം വരുന്നതിനു മുൻപുള്ള പ്രശ്നങ്ങളിൽ നിന്ന് ആശ്വാസം നൽകാനും സഹായിക്കും.
- രക്തത്തിലെ പഞ്ചസാരയുടെ അളവ് സ്ഥിരമായി നിലനിർത്താൻ സഹായിക്കും
രാത്രിയിൽ ഇഞ്ചി വെള്ളം കുടിക്കുന്നത് ഭക്ഷണം കഴിച്ച ശേഷമുള്ള രക്തത്തിലെ പഞ്ചസാരയുടെ വ്യതിയാനങ്ങൾ ഒരു പരിധി വരെ സ്ഥിരപ്പെടുത്താൻ സഹായിച്ചേക്കാം. ഇത് രാത്രി വൈകിയുള്ള ഭക്ഷണം കഴിക്കാനുള്ള താൽപര്യം കുറയ്ക്കുന്നതിനും, രാവിലെ ഉണരുമ്പോൾ കൂടുതൽ ഊർജ്ജസ്വലത തോന്നുന്നതിനും കാരണമാകും.
- നല്ല ഉറക്കം ലഭിക്കും
ഇഞ്ചി നേരിട്ട് ഉറക്കം നൽകുന്ന ഒരു ഘടകമല്ല, എങ്കിലും ദഹനപ്രശ്നങ്ങൾ ലഘൂകരിക്കുന്നതിലൂടെ ഇത് നല്ല ഉറക്കത്തെ സഹായിക്കും. വയറിന് സുഖം തോന്നുമ്പോൾ ശരീരം സ്വാഭാവികമായി വിശ്രമിക്കുകയും, വേഗത്തിൽ ഉറങ്ങാൻ സാധിക്കുകയും ചെയ്യും.
ഇഞ്ചി വെള്ളം എങ്ങനെ തയ്യാറാക്കാം?
അര ടീസ്പൂൺ മുതൽ ഒരു ടീസ്പൂൺ വരെ ഫ്രഷ് ഇഞ്ചി ചതച്ചതോ അല്ലെങ്കിൽ ഒരു ചെറിയ കഷ്ണം ഇഞ്ചി അരിഞ്ഞതോ എടുക്കുക. ഇത് ഒരു കപ്പ് വെള്ളത്തിൽ 5 മുതൽ 7 മിനിറ്റ് വരെ തിളപ്പിക്കുക. ശേഷം അരിച്ചെടുത്ത് ചെറുചൂടോടെ കുടിക്കുക. ചൂട് കുറഞ്ഞ ശേഷം ഒരു തുള്ളി തേൻ ചേർക്കാവുന്നതാണ് (നിർബന്ധമില്ല).
