നിക്ഷേപങ്ങൾക്ക് ഉയർന്ന പലിശ നൽകുന്ന നിരവധി നിക്ഷേപ പദ്ധതികൾ നിലവിലുണ്ട്. ബാങ്കുകൾക്ക് പുറമേ പോസ്റ്റ് ഓഫീസും നിക്ഷേപങ്ങൾക്ക് ഉയർന്ന പലിശ വാഗ്‌ദാനം ചെയ്യുന്നുണ്ട്. അത്തരത്തിൽ തപാൽ വകുപ്പിന്റെ കീഴിലുളള മികച്ച നിക്ഷേപപദ്ധതിയാണ് പോസ്റ്റ് ഓഫീസ് ആർ ഡി അല്ലെങ്കിൽ റെക്കറിംഗ് ഡെപ്പോസിറ്റ്. പോസ്റ്റ് ഓഫീസ് നിക്ഷേപങ്ങളില്‍ ഏറെ പ്രിയപ്പെട്ട ഒന്നാണ് പോസ്റ്റ് ഓഫീസ് റിക്കറിംഗ് ഡെപ്പോസിറ്റുകള്‍. കേന്ദ്ര സര്‍ക്കാരിന്റെ പിന്തുണയുള്ളതിനാൽ നിക്ഷേപങ്ങൾ സുരക്ഷിതമാണ്.
വെറും 100 രൂപയിൽ ഒരു അക്കൗണ്ട് തുടങ്ങാം
പോസ്റ്റ് ഓഫീസ് ആർഡി സ്കീം വ്യക്തികളെ നിശ്ചിത കാലയളവിൽ സ്ഥിരമായി പ്രതിമാസ നിക്ഷേപം നടത്താനും കൂട്ടുപലിശയിലൂടെ സമ്പത്ത് വർധിപ്പിക്കാനും സഹായിക്കും. നിക്ഷേപകർക്ക് പ്രതിമാസം കുറഞ്ഞത് 100 രൂപ നിക്ഷേപിച്ച് അക്കൗണ്ട് തുടങ്ങാം. മെച്യൂരിറ്റി കാലയളവ് 5 വർഷമാണ്, 10 വർഷം വരെ നീട്ടാനുള്ള ഓപ്ഷനുമുണ്ട്. പ്രായപൂർത്തിയാകാത്തവരുടെ പേരിലും അക്കൗണ്ടുകൾ തുറക്കാം. ഇത്തരം കേസുകളിൽ, അക്കൗണ്ട് നിയന്ത്രിക്കുന്നത് മാതാപിതാക്കളായിരിക്കും. ചെറിയ തുകകൾ പതിവായി നിക്ഷേപിക്കാൻ ആഗ്രഹിക്കുന്ന, ശമ്പള വ്യവസ്ഥയിൽ ജോലി ചെയ്യുന്നവർക്ക് ഈ സ്കീം അനുയോജ്യമായിരിക്കും.
8 ലക്ഷം എങ്ങനെ നേടാം?
ഈ പദ്ധതിയിൽ പ്രതിമാസം 5000 രൂപയുടെ നിക്ഷേപം നടത്താനാണ് തീരുമാനിക്കുന്നതെങ്കിൽ ദിവസവും 166 രൂപ മാറ്റിവയ്ക്കാൻ ശ്രമിക്കുക. അഞ്ച് വർഷം പദ്ധതിയിൽ നിക്ഷേപിക്കുകയാണെങ്കിൽ ആകെ നിക്ഷേപം 3,00,000 രൂപയാകും. പലിശ മാത്രമായി കിട്ടുക 56,830 രൂപയാണ്. അങ്ങനെ നിങ്ങളുടെ ആകെ നിക്ഷേപം 3,56,830 രൂപയാകും. അഞ്ച് വർഷം കൂടി തുടരുകയാണെങ്കിൽ ആകെ നിക്ഷേപം 8,54,272 രൂപയാകും. പലിശ മാത്രം കിട്ടുക 2,54,272 രൂപയാണ്.
പോസ്റ്റ് ഓഫീസ് ആർഡിയുടെ പ്രത്യേകത
സുരക്ഷിത നിക്ഷേപമാണിത്. ഈ പദ്ധതിക്ക് ഇന്ത്യാ ഗവൺമെന്റിന്റെ പിന്തുണയുണ്ട്, അതിനാൽ തന്നെ ഈ നിക്ഷേപം അപകടരഹിതവും സുരക്ഷിതവുമാണ്. നിക്ഷേപകർക്ക് പ്രതിമാസം 100 രൂപ മുതൽ ആരംഭിക്കാം. ഒരാളുടെ സാമ്പത്തിക നിലയ്ക്കു അനുസരിച്ച് നിക്ഷേപ തുക കൂട്ടുകയുമാവാം. മൂന്നു മാസം കൂടുമ്പോൾ പലിശ കൂടും. അതിനാൽ കാലക്രമേണ ഉയർന്ന വരുമാനത്തിലേക്ക് നയിക്കുന്നു. നിക്ഷേപകർക്ക് ഒന്നിലധികം അക്കൗണ്ടുകൾ തുറക്കാം. കുട്ടികളുടെ പേരിലും അക്കൗണ്ട് തുറക്കാം. ജോയിന്റ് അക്കൗണ്ടുകളിൽ മൂന്നു വ്യക്തികളെ വരെ അനുവദിക്കാനാവും.
ഒരു പോസ്റ്റ് ഓഫീസ് RD അക്കൗണ്ട് എങ്ങനെ ആരംഭിക്കാം?
അക്കൗണ്ട് തുറക്കാനായി അടുത്തുള്ള പോസ്റ്റ് ഓഫീസ് സന്ദർശിക്കുക. RD അപേക്ഷാ ഫോം പൂരിപ്പിക്കുക. ആദ്യ നിക്ഷേപത്തോടൊപ്പം രേഖകൾ സമർപ്പിക്കുക. സമ്പാദ്യവും പലിശയും ട്രാക്ക് ചെയ്യുന്നതിന് ഒരു പാസ്ബുക്ക് ലഭിക്കും. തിരിച്ചറിയൽ രേഖ (ആധാർ കാർഡ്, പാൻ കാർഡ്, വോട്ടർ ഐഡി), മേൽവിലാസം തെളിയിക്കുന്ന രേഖ (യൂട്ടിലിറ്റി ബിൽ, പാസ്പോർട്ട്, ഡ്രൈവിംഗ് ലൈസൻസ്), രണ്ട് പാസ്പോർട്ട് സൈസ് ഫോട്ടോകൾ, പ്രാരംഭ നിക്ഷേപ തുക എന്നിവയാണ് ഒരു അക്കൗണ്ട് തുറക്കാൻ ആവശ്യമായ രേഖകൾ.
