ക്രെഡിറ്റ് കാർഡ് ഉപയോഗിച്ചുള്ള വാങ്ങലുകൾ രാജ്യത്ത് വളരെയധികം ഉയർന്നിട്ടുണ്ട്. കൂടുതൽ ബാങ്കുകൾ ആജീവനാന്ത സൗജന്യ കാർഡുകൾ നൽകുന്നത് ക്രെഡിറ്റ് കാർഡ് ഉപയോക്താക്കളുടെ എണ്ണം വർധിപ്പിച്ചിട്ടുണ്ട്. അത്യാവശ്യ സാഹചര്യങ്ങളിൽ കടം വാങ്ങാതെ ഉത്പന്നങ്ങൾ വാങ്ങിക്കാമെന്നതും പണം തിരിച്ചടയ്ക്കാൻ 45 ദിവസം സാവകാശം ലഭിക്കുന്നുവെന്നതും പലരെയും ആകർഷിക്കുന്നു.
എന്നാൽ, ക്രെഡിറ്റ് കാർഡുകളുടെ അമിത ഉപഭോഗം കടത്തിലേക്ക് നയിക്കും. ഉയർന്ന പലിശ നിരക്കുകൾക്കൊപ്പം ബാലൻസുകൾ തുടർച്ചയായി അടയ്ക്കാതെ സാമ്പത്തിക ഭദ്രതയെ ബാധിക്കും. കടം നിയന്ത്രിക്കാൻ കഴിയാത്തത് തിരിച്ചടവുകളെ ബാധിക്കുകയും ക്രെഡിറ്റ് കാർഡ് ഉപയോഗിക്കുന്നവരിൽ മാനസിക ആഘാതം ഉണ്ടാക്കുകയും ചെയ്യുന്നു. അതുകൊണ്ടാണ്, പുതിയ ക്രെഡിറ്റ് കാർഡ് ലഭിക്കുന്നതിന് മുമ്പുതന്നെ, വായ്പയെടുക്കാൻ ആഗ്രഹിക്കുന്നവർ അവരുടെ തിരിച്ചടവുകൾ ആസൂത്രണം ചെയ്യുകയും, അവരുടെ ചെലവുകൾ കണക്കാക്കുകയും, ജീവിതത്തിലും ചെലവിലും അച്ചടക്കം പാലിക്കുകയും ചെയ്യണമെന്ന് വിദഗ്ധർ നിർദേശിക്കുന്നത്.
ക്രെഡിറ്റ് കാർഡ് കടത്തിൽനിന്നും രക്ഷപ്പെടുന്നതിനുള്ള 5 വഴികൾ അറിഞ്ഞിരിക്കാം.
- മൊത്തം കടം വിലയിരുത്തുക
എല്ലാ ക്രെഡിറ്റ് കാർഡ് അക്കൗണ്ട് ബാലൻസുകളും ഒരു കടലാസിൽ എഴുതിവെച്ചുകൊണ്ട് ആരംഭിക്കുക. ഓരോ ക്രെഡിറ്റ് കാർഡ് തിരിച്ചടവും അടയ്ക്കാൻ ബാക്കിയുള്ള ബാധകമായ പലിശ നിരക്ക് പരിശോധിക്കുക. നിങ്ങളുടെ പണം എവിടെയാണ് ഏറ്റവും കൂടുതൽ ചോർന്നുപോകുന്നതെന്ന് ശ്രദ്ധാപൂർവ്വം തിരിച്ചറിയുക, അതായത്, നിങ്ങളിൽ നിന്ന് ഏറ്റവും ഉയർന്ന പലിശ നിരക്കുകൾ ഈടാക്കുന്ന തിരിച്ചടവ്. അത് ആദ്യം ക്ലോസ് ചെയ്യുക.
- ഉയർന്ന പലിശ നിരക്കുള്ള കാർഡുകൾക്ക് മുൻഗണന നൽകുക
ഏറ്റവും ഉയർന്ന പലിശ നിരക്കുള്ള ക്രെഡിറ്റ് കാർഡുകൾ ആദ്യം ക്ലിയർ ചെയ്യുന്നതിൽ ശ്രദ്ധ കേന്ദ്രീകരിക്കുക. ഇത് കാലക്രമേണ മൊത്തത്തിലുള്ള പലിശ ചെലവ് കുറയ്ക്കാൻ സഹായിക്കുന്നു. ഈ രീതിയിൽ, മൊത്തത്തിലുള്ള കടബാധ്യത ഗണ്യമായി കുറയ്ക്കുന്നുവെന്ന് ഉറപ്പാക്കാൻ കഴിയും.
- ഏകീകരണം പരിഗണിക്കുക
ഉയർന്ന പലിശ നിരക്കുള്ള ഒന്നിലധികം ക്രെഡിറ്റ് കാർഡുകൾ ഉണ്ടെങ്കിൽ, ഒരു വ്യക്തിഗത വായ്പയോ ബാലൻസ് ട്രാൻസ്ഫർ ഓഫറോ പരിഗണിക്കാവുന്നതാണ്. കുറഞ്ഞ പലിശ നിരക്കിൽ മൊത്തത്തിലുള്ള കടം ഏകീകരിക്കുന്നത് തിരിച്ചടവുകൾ ലളിതമാക്കുകയും ചെലവുകൾ കുറയ്ക്കുകയും അനുബന്ധ സങ്കീർണതകൾ ഇല്ലാതാക്കുകയും ചെയ്യുന്നു. ഇങ്ങനെ ചെയ്യുന്നതിനു മുൻപ് ഒരു സാമ്പത്തിക ഉപദേഷ്ടാവുമായി സംസാരിക്കുക.
- തിരിച്ചടവ് രീതി പ്ലാൻ ചെയ്യുക
നിങ്ങളുടെ ചെലവ് രീതികൾ അവലോകനം ചെയ്ത് ശമ്പളത്തിന്റെയോ വരുമാനത്തിന്റെയോ ഒരു നിശ്ചിത തുക കടം തിരിച്ചടവിനായി നീക്കിവയ്ക്കുന്ന ഒരു പ്രതിമാസ ബജറ്റ് സൃഷ്ടിക്കുക. കുടിശിക നിങ്ങളുടെ ക്രെഡിറ്റ് പരിധിയുടെ 30% ൽ താഴെയാകുന്നതുവരെ പുതിയ വാങ്ങലുകൾ ഒഴിവാക്കുക.
- ആവശ്യമെങ്കിൽ ചർച്ച നടത്തുകയോ ഒത്തുതീർപ്പാക്കുകയോ ചെയ്യുക
തിരിച്ചടവുകൾ അമിതമാണെന്നും നിങ്ങളുടെ നിലവിലെ സാമ്പത്തിക ശേഷിക്ക് അപ്പുറമാണെന്നും തോന്നിയാൽ പരിഭ്രാന്തരാകരുത്. നിങ്ങളുടെ വായ്പാ സ്ഥാപനവുമായി ബന്ധപ്പെടുക. വായ്പക്കാർക്ക് ‘സ്ട്രക്ചേർഡ് സെറ്റിൽമെന്റുകൾ’ അല്ലെങ്കിൽ ‘ഹാർഡ്ഷിപ്പ് പ്ലാനുകൾ’ എന്നിവ നൽകുന്നതിന് ബാങ്കുകളും ധനകാര്യ സ്ഥാപനങ്ങളും അവസരമൊരുക്കുന്നുണ്ട്. പ്രത്യേകിച്ചും, നിങ്ങൾ തെറ്റുകൾ തിരുത്താനും കുടിശ്ശികകൾ ശ്രദ്ധാപൂർവ്വം തീർക്കാനും തയ്യാറാണെങ്കിൽ.
