അടിയന്തര ആവശ്യങ്ങൾ നിറവേറ്റാനായി പലരും പേഴ്സണൽ ലോണുകളെയാണ് ആശ്രയിക്കുന്നത്. വ്യക്തി വായ്പയ്ക്കു പുറമേ മറ്റു നിരവധി വായ്പാ ഓപ്ഷനുകളും ഉണ്ട്. അവയിലൊന്ന് പിപിഎഫ് അധിഷ്ഠിത വായ്പകളാണ്. പിപിഎഫ് അധിഷ്ഠിത വായ്പകൾ സുരക്ഷിതവും കുറഞ്ഞ പലിശ നിരക്കുള്ളതും പിപിഎഫ് ബാലൻസിന്റെ 25% ആയി പരിമിതപ്പെടുത്തിയതുമാണ്. എന്നാൽ, ഒരു വ്യക്തിഗത വായ്പ സുരക്ഷിതമല്ലാത്തതും കടം വാങ്ങുന്നയാളുടെ ക്രെഡിറ്റ് യോഗ്യതയെ അടിസ്ഥാനമാക്കിയുള്ളതുമാണ്. വിവാഹം, യാത്ര, വിദ്യാഭ്യാസം, മെഡിക്കൽ സർജറികൾ തുടങ്ങിയ വലിയ സാമ്പത്തിക ആവശ്യങ്ങൾക്ക് വ്യക്തിഗത വായ്പകൾ അനുയോജ്യമാണ്.
പിപിഎഫ് വായ്പ
പിപിഎഫ് തുകയിൽ നിന്നു ലോണെടുക്കുന്നവരും, എടുക്കാൻ ആഗ്രഹിക്കുന്നവരും അനവധിയാണ്. ഒരു പിപിഎഫ് അക്കൗണ്ട് ഉടമയ്ക്ക് മൂന്നാമത്തെ സാമ്പത്തിക വർഷത്തിനു ശേഷം മാത്രമാണ് വായ്പ എടുക്കാൻ സാധിക്കുക. ഒരു വ്യക്തിക്ക് മുഴുവൻ ഡെപ്പോസിറ്റിന് വായ്പ ലഭിക്കില്ല. രണ്ടാം വർഷത്തിന്റെ അവസാനം ആകെയുള്ള തുകയുടെ 25 ശതമാനമാണ് പരമാവധി ലഭിക്കുക.
സർക്കാർ അതാത് കാലങ്ങളിൽ നിശ്ചയിക്കുന്ന പലിശ നിരക്കിനേക്കാൾ ഒരു ശതമാനം അധികമാണ് പിപിഎഫ് അക്കൗണ്ടിലെ വായ്പയ്ക്ക് പലിശ ഈടാക്കുന്നത്. ഒരിക്കൽ വായ്പാപലിശ നിശ്ചിയിച്ചു കഴിഞ്ഞാൽ തിരിച്ചടവ് തീരുന്നതു വരെ ഇത് സ്ഥിരമായി നില നിൽക്കും. വായ്പ അനുവദിച്ച മാസം മുതൽ മൂന്നു വർഷത്തിനുള്ളിൽ പ്രിൻസിപ്പൽ തുക തിരികെ അടയ്ക്കണം. വായ്പാ തുക മൊത്തമായോ, രണ്ടോ അതിലധികമോ മാസ തവണകളായോ ഇവ മൂന്നു വർഷത്തിനുള്ളിൽ തിരിച്ചടയ്ക്കാം. വായ്പാ തിരിച്ചടവ് മുടങ്ങുകയോ, ഭാഗികമായി മാത്രം തിരിച്ചടയ്ക്കുകയോ ചെയ്താൽ പലിശനിരക്കുകളിൽ വർധനയുണ്ടാകും.
വ്യക്തിഗത വായ്പകളുടെ അപകടസാധ്യതകൾ എന്തൊക്കെയാണ്?
വ്യക്തിഗത വായ്പ എടുക്കുന്നതിനു മുമ്പ്, വായ്പകളുമായി ബന്ധപ്പെട്ട അപകടസാധ്യതകളും പരിമിതികളും വ്യക്തമായി മനസിലാക്കണം. ഉയർന്ന പലിശ നിരക്കുകൾ, ഈടിനുള്ള അപകടസാധ്യതകൾ, ക്രെഡിറ്റ് സ്കോറുകളെ ബാധിക്കുന്ന കാര്യങ്ങൾ, തിരിച്ചടവ് കൃത്യസമയത്ത് നടത്തിയില്ലെങ്കിൽ ക്രെഡിറ്റ് പ്രൊഫൈലുകളെ ബാധിക്കാനുള്ള സാധ്യത, കടം കൂടാനും മാനസിക പ്രശ്നങ്ങൾക്കും സാധ്യത എന്നിവ വ്യക്തിഗത വായ്പയ്ക്ക് അപേക്ഷിക്കുന്നതിന് മുമ്പ് കടം വാങ്ങുന്നയാൾ തീർച്ചയായും മനസിലാക്കുകയും പരിഗണിക്കുകയും ചെയ്യേണ്ട കാര്യങ്ങളാണ്.
ചുരുക്കി പറഞ്ഞാൽ, പിപിഎഫിന്മേലുള്ള വായ്പ താങ്ങാനാവുന്ന വായ്പാ ഓപ്ഷനാണ്. ഇത് വായ്പക്കാർക്ക് മിതമായ തുകകൾ നൽകുകയും അവരുടെ ഹ്രസ്വകാല ബാധ്യതകൾ നിറവേറ്റാൻ സഹായിക്കുകയും ചെയ്യും. അതേസമയം, വ്യക്തിഗത വായ്പകൾ ഉയർന്ന പലിശ നിരക്കിൽ വലിയ തുകകൾ വായ്പക്കാർക്ക് നൽകുന്നു. പക്ഷേ വേഗത്തിൽ വായ്പ ലഭിക്കുന്നു.
