നമ്മുടെ രാജ്യത്ത് വിദ്യാഭ്യാസ ചെലവ് ഏറിവരികയാണ്. സ്കൂൾ ഫീസ് ഇനത്തിൽ രക്ഷകർത്താക്കൾ വലിയൊരു തുകയാണ് ഓരോ വർഷവും നൽകേണ്ടതായി വരുന്നത്. 99 ശതമാനം ഇന്ത്യൻ രക്ഷിതാക്കളും സ്കൂൾ ഫീസിനായി ലക്ഷങ്ങൾ ചെലവഴിക്കേണ്ടി വരുന്നതായാണ് കണക്കുകൾ കാണിക്കുന്നത്. സ്കൂൾ ഫീസ് ഇനത്തിൽ ലക്ഷങ്ങൾ മുടക്കുന്നത് തലവേദനായി മാറുന്നത് ഒഴിവാക്കാൻ എസ്ഐപിയിൽ നിക്ഷേപിക്കുന്നത് സഹായിക്കും.
ദീർഘകാല സമ്പത്ത് കെട്ടിപ്പടുക്കുന്നതിനുള്ള ലളിതവും എന്നാൽ ഫലപ്രദവുമായ മാർഗമായി മ്യൂച്വൽ ഫണ്ടുകളിലെ സിസ്റ്റമാറ്റിക് ഇൻവെസ്റ്റ്മെന്റ് പ്ലാൻ (SIP) മാറിയിട്ടുണ്ട്. എല്ലാ മാസവും ഒരു നിശ്ചിത തുക എസ്ഐപിയിൽ നിക്ഷേപിക്കുന്നത് കുട്ടികളുടെ വിദ്യാഭ്യാസം സുരക്ഷിതമാക്കുന്നതിനുള്ള നല്ലൊരു മാർഗമാണ്. പ്രതിമാസം 10,000 രൂപ 10 വർഷത്തെ എസ്ഐപി പ്ലാനിൽ നിക്ഷേപിക്കുന്നതിലൂടെ നിങ്ങളുടെ കുട്ടിയുടെ വിദ്യാഭ്യാസത്തിനുള്ള തുക പൂർണമായും കണ്ടെത്താൻ സഹായിക്കും.
അവർക്ക് 22 വയസ് തികയുമ്പോഴേക്കും 50 ലക്ഷം നിങ്ങളുടെ കൈയിൽ കിട്ടും. വിദ്യാഭ്യാസ വായ്പകളുടെ തലവേദനയോ മറ്റു സമ്മർദമോ അനുഭവിക്കാതെ എസ്ഐപിയുടെ കോമ്പൗണ്ടിങ് കരുത്തിൽ നിങ്ങൾക്ക് സാമ്പത്തിക ഭദ്രത നേടാനാകും.
10 വർഷം കൊണ്ട് 50 ലക്ഷം നേടുന്നത് എങ്ങനെ?
നിങ്ങളുടെ കുട്ടി ജനിക്കുമ്പോൾ തന്നെ പ്രതിമാസം 10,000 എന്ന നിരക്കിൽ ഒരു എസ്ഐപി ആരംഭിക്കുക. 10 വർഷത്തേക്ക് എല്ലാ വർഷവും SIP 10 ശതമാനം വർധിപ്പിക്കുക. 10 വർഷത്തിനുശേഷം സംഭാവനകൾ നിർത്തുക. 10 മുതൽ 22 വയസ് വരെ പ്രതിമാസം 25,000 പിൻവലിക്കുക.
പത്ത് വർഷത്തിനുള്ളിൽ നിങ്ങളുടെ നിക്ഷേപം 19.12 ലക്ഷം ആയിരിക്കും. അപ്പോഴേക്കും നിക്ഷേപ തുക 32.69 ലക്ഷമായി വളരും. അടുത്ത 12 വർഷത്തിനുള്ളിൽ വിദ്യാഭ്യാസത്തിനായി നിങ്ങൾ 36 ലക്ഷം പിൻവലിക്കും, എന്നിട്ടും അക്കൗണ്ടിൽ 51 ലക്ഷം ബാക്കിയുണ്ടാവും. പിൻവലിക്കുമ്പോഴും കോമ്പൗണ്ടിംഗ് പ്രവർത്തിക്കുന്നു. ശേഷിക്കുന്ന കോർപ്പസ് വളർന്നു കൊണ്ടേയിരിക്കും.
മറുവശത്ത്, 10 വർഷത്തേക്ക് 11% പലിശ നിരക്കിൽ 36 ലക്ഷം രൂപ വിദ്യാഭ്യാസ വായ്പയ്ക്ക് പ്രതിമാസം 50,000 ഇഎംഐ വരും. ഇത് എസ്ഐപി പിൻവലിക്കലുകളുടെ ഇരട്ടിയാണ്, കൂടാതെ പലിശയും കൂടുതലാണ്. അതിനാൽ, വിദ്യാഭ്യാസ ആവശ്യങ്ങൾക്കായി എസ്ഐപി നേരത്തെ തുടങ്ങുന്നതാണ് ഉചിതം.
ചില ടിപ്സുകൾ
കുറഞ്ഞ ചെലവിലുള്ള ഇൻഡെക്സ് ഫണ്ടുകൾ ഉപയോഗിക്കുക, അടിയന്തര സാഹചര്യങ്ങളിൽ ലിക്വിഡിറ്റി നിലനിർത്തുക, വർഷം തോറും പുരോഗതി അവലോകനം ചെയ്യുക എന്നിവയാണ് ചില നുറുങ്ങുകൾ.
