സ്ഥിര നിക്ഷേപങ്ങൾക്ക് പലരും ബാങ്കുകളെയാണ് ആശ്രയിക്കുന്നത്. ഉയർന്ന പലിശ നിരക്കിനൊപ്പം സമ്പാദ്യത്തിന് സുരക്ഷിതത്വം ലഭിക്കുന്നുവെന്നതിനാലാണ് ബാങ്ക് എഫ്ഡികൾ ഏറെ ജനപ്രിയമായി തീർന്നത്. ബാങ്കുകളെ പോലെ തന്നെ ഉയർന്ന പലിശ നിരക്കുകൾ നൽകുന്ന സ്കീമുകൾ പോസ്റ്റ് ഓഫീസും വാഗ്ദാനം ചെയ്യുന്നുണ്ട്. സർക്കാർ പിന്തുണയുള്ളതിനാൽ നിക്ഷേപങ്ങൾ സുരക്ഷിതമാണ്. ഇത്തരത്തിൽ ബാങ്ക് എഫ്ഡികളെക്കാൾ ഉയർന്ന റിട്ടേൺ നൽകുന്ന 5 പോസ്റ്റ് ഓഫീസ് സ്കീമുകളെ പരിചയപ്പെടാം.
- പോസ്റ്റ് ഓഫീസ് പ്രതിമാസ വരുമാന പദ്ധതി (POMIS)
പ്രതിമാസ വരുമാനമാണ് നിങ്ങൾ ആഗ്രഹിക്കുന്നതെങ്കിൽ പോസ്റ്റ് ഓഫീസ് പ്രതിമാസ വരുമാന പദ്ധതിയിൽ ചേരാം. ഈ സ്കീം എല്ലാ മാസവും പലിശ നേരിട്ട് നിങ്ങളുടെ അക്കൗണ്ടിലേക്ക് എത്തിക്കുന്നു. 18 വയസ്സിനു മുകളിലുള്ളവർക്ക് ഈ സ്കീമിൽ ചേരാവുന്നതാണ്. ബാങ്ക് എഫ്ഡികളെക്കാൾ ഉയർന്ന പലിശ നൽകുന്നു. നിലവിൽ 7.4% ആണ് പലിശ നിരക്ക്.
- സീനിയർ സിറ്റിസൺസ് സേവിംഗ്സ് സ്കീം (SCSS)
മുതിര്‍ന്ന പൗരന്മാര്‍ക്കായി പ്രത്യേകമായി രൂപകല്‍പ്പന ചെയ്ത ഒരു ചെറുകിട സമ്പാദ്യ പദ്ധതിയാണ് സീനിയര്‍ സിറ്റിസണ്‍സ് സേവിംഗ്സ് സ്കീം (SCSS). ഓരോ പാദത്തിലും പലിശ നിരക്ക് പരിഷ്‌കരിക്കുമെങ്കിലും, നിലവില്‍ 8.2% പലിശ നിരക്കാണ് ഈ പദ്ധതി നല്‍കുന്നത്. പോസ്റ്റ് ഓഫീസിലോ ബാങ്കിലോ ഒരു എസ്.സി.എസ്.എസ്. അക്കൗണ്ട് തുറക്കാം. ഇതിന് അഞ്ച് വര്‍ഷത്തെ കാലാവധിയുണ്ട്, മൂന്ന് വര്‍ഷത്തേക്ക് കൂടി നീട്ടാനുള്ള സൗകര്യവുമുണ്ട്. ഈ പദ്ധതിയിലെ ഏറ്റവും കുറഞ്ഞ നിക്ഷേപം 1,000 രൂപയാണ്, പരമാവധി 30 ലക്ഷം രൂപ വരെ നിക്ഷേപിക്കാം. ഒരു മുതിര്‍ന്ന പൗരന് ഒറ്റയ്‌ക്കോ ജോയിന്റായോ ഒരു എസ്.സി.എസ്.എസ്. അക്കൗണ്ട് തുറക്കാവുന്നതാണ്. ഓരോ പാദത്തിലും പലിശ ലഭിക്കുന്നതാണ്.
- സുകന്യ സമൃദ്ധി യോജന (SSY)
മാതാപിതാക്കൾക്ക് പെൺമക്കളുടെ ഭാവിക്കായി നിക്ഷേപിക്കാനും അവർക്ക് നല്ലൊരു ജീവിതം നേടിക്കൊടുക്കാനും സഹായിക്കുന്നതാണ് ഈ സ്കീം. ഉയർന്ന പലിശ നിരക്കാണ് ഈ പദ്ധതി വാഗ്ദാനം ചെയ്യുന്നത്. 8.2 ശതമാനമാണ് നിലവിൽ പദ്ധതിയുടെ പലിശ നിരക്ക്. പെൺകുട്ടികൾക്കുള്ള മാതാപിതാക്കൾക്ക് ഏതെങ്കിലും അംഗീകൃത ബാങ്കിലോ പോസ്റ്റ് ഓഫീസിലോ സുകന്യ സമൃദ്ധി അക്കൗണ്ട് തുറക്കാൻ സാധിക്കും. 10 വയസ് വരെയുള്ള പെൺകുട്ടികൾക്കായി നിയമപരമായ ഒരു രക്ഷിതാവിന് സുകന്യ സമൃദ്ധി യോജന അക്കൗണ്ടുകൾ തുറക്കാൻ കഴിയും. കുട്ടിക്ക് 18 വയസ് തികയുന്നതുവരെ ഈ അക്കൗണ്ടുകൾ രക്ഷിതാവിന്റെ നിയന്ത്രണത്തിലായിരിക്കും. വര്‍ഷം 250 രൂപയാണ് കുറഞ്ഞ നിക്ഷേപം. പ്രതിവര്‍ഷം ഒന്നരലക്ഷം രൂപ വരെ കുട്ടികളുടെ പേരില്‍ അക്കൗണ്ടില്‍ നിക്ഷേപിക്കാം. 15 വര്‍ഷമാണ് നിക്ഷേപ കാലാവധി.
- ദേശീയ സേവിംഗ്സ് സർട്ടിഫിക്കറ്റ് (NSC)
പോസ്റ്റ് ഓഫീസിന്റെ നാഷണൽ സേവിംഗ്സ് സ്കീം അല്ലെങ്കിൽ നാഷണൽ സേവിംഗ്സ് സർട്ടിഫിക്കറ്റ് സ്കീംജനപ്രിയമായ ചെറുകിട സമ്പാദ്യ പദ്ധതികളിൽ ഒന്നാണ്. കുറഞ്ഞത് 1,000 രൂപയാണ് നിക്ഷേപിക്കാൻ ആവശ്യം. പരമാവധി നിക്ഷേപ പരിധിയില്ല. കാലാവധി 5 വർഷമാണ്. നിക്ഷേപകന് നിക്ഷേപ തുകയ്ക്ക് ആനുസരിച്ച് ഉറപ്പായ വരുമാനം ലഭിക്കും. നിലവിൽ പലിശ നിരക്ക് 7.7% ആണ്. ഈ പലിശ നിരക്ക് കോമ്പൗണ്ടിംഗിന്റെ അടിസ്ഥാനത്തിലാണ് വാഗ്ദാനം ചെയ്യുന്നത്.
- പബ്ലിക് പ്രൊവിഡന്റ് ഫണ്ട് (പിപിഎഫ്)
പബ്ലിക് പ്രൊവിഡന്റ് ഫണ്ടില്‍ 7.10 ശതമാനമാണ് നിലവിലെ പലിശനിരക്ക്. നിക്ഷേപകര്‍ക്ക് പിപിഎഫ് അക്കൗണ്ടില്‍ ഒറ്റത്തവണയായോ, മാസ ഗഡുക്കളായോ തുക നിക്ഷേപിക്കാം. പബ്ലിക് പ്രൊവിഡന്റ് ഫണ്ട് സ്‌കീമിന് കീഴില്‍ പരമാവധി 12 തവണകളായി നിക്ഷേപം നടത്താനാണ് അനുവദിച്ചിരിക്കുന്നത്. കുറഞ്ഞത് 500 രൂപയും പരമാവധി 1.5 ലക്ഷം രൂപയും ഒരു വർഷം നിക്ഷേപിക്കാം. ലോക്ക് ഇൻ കാലയളവ് 15 വർഷമാണ്. ഈ സ്കീമിലെ പലിശ നികുതി രഹിതമാണ്.
