ഡൽഹി: ഇന്ത്യയിലെ ബാങ്കുകളിൽ പുതിയ നോമിനേഷൻ നിയമങ്ങൾ നടപ്പിലാക്കിയിരിക്കുകയാണ് ആർബിഐ. അക്കൗണ്ട് ഉടമകളുടെ മരണശേഷം, അവരുടെ സമ്പാദ്യം കൈമാറുന്നത് ലളിതമാക്കാൻ സഹായിക്കും വിധമാണ് പുതിയ മാറ്റമെന്നാണ് ആർബിഐ അവകാശപ്പെടുന്നത്. വിവിധ സാമ്പത്തിക ഇടപാടുകളുമായി ബന്ധപ്പെട്ട നോമിനേഷൻ നിയമങ്ങൾ ഏകീകരിച്ചുകൊണ്ടാണ് പുതിയ നിയമം നിലവിൽ വന്നിരിക്കുന്നത്. മ്യൂച്വൽ ഫണ്ടുകൾ, ഇൻഷപറൻസ്, ഡീ-മാറ്റ് അക്കൗണ്ടുകൾ എന്നിവയ്ക്കും നിക്ഷേപ അക്കൗണ്ടുകൾ, സേഫ് കസ്റ്റഡി വസ്തുക്കൾ, ബാങ്ക് ലോക്കറുകൾ എന്നിവയ്ക്കെല്ലാം പുതിയ നിയമം ബാധകമാണ്.
പുതിയ നോമിനേഷൻ നിയമങ്ങളനുസരിച്ച് ഒരു അക്കൗണ്ട് ഉടമയ്ക്ക് നാല് നോമിനികളെ വരെ നിശ്ചയിക്കാം. റിസർവ് ബാങ്കിന്റെ പുതിയ ബാങ്കിംഗ് വ്യവസ്ഥാ (ഭേദഗതി) നിയമമനുസരിച്ചാണ് നോമിനികളെ നിശ്ചയിക്കുന്നതുമായി ബന്ധപ്പെട്ട് സമഗ്രമായ മാറ്റം വന്നിരിക്കുന്നത്. 2025 നവംബർ 1 മുതലാണ് ഇത് രാജ്യത്ത് നിലവിൽ വന്നത്.
നിയമത്തിലെ വ്യവസ്ഥകൾ പ്രകാരം നോമിനികളെ നിശ്ചയിക്കുന്നതിന് രണ്ടു രീതികൾ ആർബിഐ മുന്നോട്ടുവെയ്ക്കുന്നുണ്ട്. ഒന്നാമത്തേത് നിക്ഷേപ അക്കൗണ്ടുകൾക്ക് മാത്രം ബാധകമായ നിയമമാണ്. ഒരേസമയം നാമനിർദ്ദേശം നൽകുന്നതാണ് ഈ രീതി. ഇതിൽ ഒരേ സമയം 4 പേരെ വരെ നോമിനികളായി നിശ്ചയിക്കാം. ഓരോരുത്തർക്കും എത്ര ശതമാനം വിഹിതം ലഭിക്കണമെന്ന് അക്കൗണ്ട് ഉടമയ്ക്ക് തീരുമാനിക്കാം. ഉദാഹരണത്തിന് ഒരാൾ തന്റെ രണ്ട് കുട്ടികളെ നാമനിർദ്ദേശം ചെയ്യുന്നുവെങ്കിൽ, അത് ഓരോരുത്തർക്കും 50% വിഹിതം നൽകുന്ന വിധത്തിൽ ക്രമീകരിക്കാം.
രണ്ടാമത്തേത് തുടർച്ചയായ നാമനിർദ്ദേശം എന്ന രീതിയാണ്(ഇത് നിക്ഷേപങ്ങൾ, ലോക്കറുകൾ, സേഫ് കസ്റ്റഡി എന്നിവയ്ക്ക് ബാധകമാണ്). ആദ്യ നോമിനി മരിച്ചാൽ, അടുത്തയാൾക്ക് യോഗ്യത ലഭിക്കും. ഇത്തരത്തിൽ മുൻഗണനാക്രമത്തിൽ പരമാവധി 4 നോമിനികളെ പട്ടികപ്പെടുത്തുന്നതാണ് ഈ രീതി. നിയമപരമായ കാലതാമസങ്ങളും തർക്കങ്ങളും ഒിവാക്കാൻ ഇത് സഹായിക്കുന്നു.
അവകാശികളില്ലാത്ത അക്കൗണ്ടുകൾ 10 വർഷത്തിനു ശേഷമാകും ഡിപ്പോസിറ്റർ എഡ്യൂക്കേഷൻ ആൻഡ് അവയർനെസ് ഫണ്ടിലേക്ക് (DEAF) മാറ്റുക. ഇതിനുശേഷം ഇത് ആർബിഐ ആകും കൈകാര്യം ചെയ്യുക.
