മലയാളത്തിൽ പുതിയ ഇൻഡസ്ട്രിയൽ ഹിറ്റ് പിറന്നിരിക്കുന്നു. കല്യാണി പ്രിയദർശനെ കേന്ദ്ര കഥാപാത്രമാക്കി ഡൊമിനിക് അരുൺ സംവിധാനം ചെയ്ത ‘ലോകഃ – ചാപ്റ്റർ 1 ചന്ദ്ര’ വേൾഡ് വൈഡ് 265 കോടിക്കു മുകളിൽ കളക്ഷൻ നേടിയതോടെയാണ് ഇൻഡസ്ട്രിയൽ ഹിറ്റ് സ്റ്റാറ്റസ് നേടിയത്. മോഹൻലാൽ ചിത്രം ‘എമ്പുരാനെ’ മറികടന്നാണ് ലോകഃയുടെ നേട്ടം.
മലയാളത്തിൽ ആദ്യ ഒരു കോടി ചിത്രം പിറക്കുന്നത് മമ്മൂട്ടിയിലൂടെയാണ്. 1982 ൽ റിലീസ് ചെയ്ത ‘ഈ നാട്’ ആണ് മലയാളത്തിന്റെ ആദ്യ ഇൻഡസ്ട്രിയൽ ഹിറ്റ്. തൊട്ടടുത്ത വർഷം ജോഷി സംവിധാനം ചെയ്ത ‘ആ രാത്രി’ 1.15 കോടിയോടെ ‘ഈ നാടി’ന്റെ കളക്ഷൻ മറികടന്നു. ഫാസിൽ സംവിധാനം ചെയ്ത മോഹൻലാൽ ചിത്രം ‘എന്റെ മാമ്മാട്ടിക്കുട്ടിയമ്മയ്ക്ക്’, ജിജോ പുന്നൂസിന്റെ അത്ഭുതചിത്രം ‘മൈ ഡിയർ കുട്ടിച്ചാത്തൻ’ എന്നിവയും വലിയ വിജയങ്ങളായിരുന്നു.
1987ൽ ജോഷി സംവിധാനം ചെയ്ത മമ്മൂട്ടി ചിത്രം ‘ന്യൂഡൽഹി’യിലൂടെയാണ് മലയാളത്തിലെ ആദ്യ രണ്ട് കോടി പിറക്കുന്നത്. അതേ വർഷം തന്നെ കെ.മധു സംവിധാനം ചെയ്ത മോഹൻലാൽ ചിത്രം ‘ഇരുപതാം നൂറ്റാണ്ട്’ മമ്മൂട്ടിയുടെ ന്യൂഡൽഹിയുടെ കളക്ഷൻ മറികടന്നു.
1988 ൽ കെ.മധു സംവിധാനം ചെയ്ത ‘ഒരു സിബിഐ ഡയറിക്കുറിപ്പ്’ എന്ന സിനിമയിലൂടെ മലയാളത്തിലെ ആദ്യ മൂന്ന് കോടി ചിത്രത്തിലും മമ്മൂട്ടിയുടെ കയ്യൊപ്പുണ്ടായി. കേരളത്തിനു പുറത്ത് വലിയ രീതിയിൽ ശ്രദ്ധിക്കപ്പെട്ട മലയാള സിനിമ കൂടിയാണ് സിബിഐ സീരിസിലെ ആദ്യ ചിത്രമായ സിബിഐ ഡയറിക്കുറിപ്പ്.
ടി.ഹരിഹരൻ സംവിധാനം ചെയ്ത ‘ഒരു വടക്കൻ വീരഗാഥ’ 1989 ൽ കളക്ട് ചെയ്തത് 4.07 കോടിയാണ്. മലയാളത്തിലെ ആദ്യ നാല് കോടിയും മമ്മൂട്ടിയിലൂടെ തന്നെ. 1991 ൽ മോഹൻലാലിനെ നായകനാക്കി പ്രിയദർശൻ ഒരുക്കിയ കിലുക്കത്തിലൂടെ ആദ്യ അഞ്ച് കോടി സിനിമയെന്ന നേട്ടം കൈവരിച്ചു.
1991 ൽ ഗോഡ്ഫാദർ (5.5 കോടി), 1992 ൽ തലസ്ഥാനം (എട്ട് കോടി), 1995 ൽ ദി കിങ് (12 കോടി), 1996 ൽ ഹിറ്റ്‌ലർ (15.67 കോടി), 1997 ൽ അനിയത്തിപ്രാവ് (16 കോടി), 1997 ൽ ചന്ദ്രലേഖ (17 കോടി), അതേ വർഷം തന്നെ ആറാം തമ്പുരാൻ (18 കോടി) എന്നീ സിനിമകളും ഇൻഡസ്ട്രിയൽ ഹിറ്റുകളായി.
രണ്ടായിരം മുതൽ മോഹൻലാലിന്റെ ആധിപത്യമാണ് ബോക്‌സ്ഓഫീസിൽ കണ്ടത്. മലയാളത്തിന്റെ ആദ്യ 20 കോടി ചിത്രമായി രണ്ടായിരത്തിൽ റിലീസ് ചെയ്ത മോഹൻലാലിന്റെ നരസിംഹം. ഷാജി കൈലാസ് ആയിരുന്നു സംവിധാനം. രണ്ടായിരത്തിനു ശേഷമുള്ള മമ്മൂട്ടിയുടെ ഏക ഇൻഡസ്ട്രിയൽ ഹിറ്റ് 2005 ൽ റിലീസ് ചെയ്ത അൻവർ റഷീദ് ചിത്രം രാജമാണിക്യം ആണ്. മലയാളത്തിലെ ആദ്യ 25 കോടിയെന്ന നേട്ടവും രാജമാണിക്യം കൈവരിച്ചു. 2008 ൽ മൾട്ടിസ്റ്റാർ ചിത്രം ട്വന്റി 20 (32.75 കോടി) ഇൻഡസ്ട്രിയൽ ഹിറ്റായി. മലയാളത്തിലെ ആദ്യ 50 കോടി ചിത്രം 2013 ൽ പുറത്തിറങ്ങിയ ദൃശ്യം ആണ്. മോഹൻലാലിനെ നായകനാക്കി ജീത്തു ജോസഫ് സംവിധാനം ചെയ്ത ദൃശ്യത്തിനു കേരളത്തിനു പുറത്തും വലിയ ശ്രദ്ധ നേടാൻ സാധിച്ചു. 2016 ൽ വൈശാഖ് സംവിധാനം ചെയ്ത ‘പുലിമുരുകനിലൂടെ’ മോഹൻലാൽ മലയാളത്തിന്റെ ആദ്യ 100 കോടി ക്ലബിൽ ഒന്നാമതെത്തി. 2019 ൽ റിലീസ് ചെയ്ത മോഹൻലാൽ ചിത്രം ലൂസിഫർ ഇൻഡസ്ട്രിയൽ ഹിറ്റായിരുന്നു. ജൂഡ് ആന്റണി ജോസഫ് സംവിധാനം ചെയ്ത 2018, ചിദംബരത്തിന്റെ മഞ്ഞുമ്മൽ ബോയ്‌സ് എന്നിവയ്ക്കു ശേഷം ഈ വർഷം റിലീസ് ചെയ്ത എമ്പുരാൻ 265 കോടിയോടെ ഇൻഡസ്ട്രിയൽ ഹിറ്റ് സ്റ്റാറ്റസ് നേടി. ഇപ്പോൾ എമ്പുരാനെ തകർത്ത് ലോകഃയും.
