മെറ്റാ എഐയുടെ പുതിയ ശബ്ദമായി ബോളിവുഡ് താരം ദീപിക പദുക്കോൺ കരാറൊപ്പിട്ടു. സോഷ്യൽ മീഡിയയിലെ ഒരു വീഡിയോയിലൂടെയാണ് ദീപിക ഈ സഹകരണം പ്രഖ്യാപിച്ചത്. എഐ അസിസ്റ്റൻ്റിന് ശബ്ദം നൽകുന്ന ആദ്യത്തെ ഇന്ത്യൻ സെലിബ്രിറ്റികളിൽ ഒരാളാണ് ദീപിക. പുതിയ സംരംഭത്തെക്കുറിച്ച് ഇൻസ്റ്റാഗ്രാമിൽ താരം ആവേശം പ്രകടിപ്പിച്ചു.
“ഇത് വളരെ മികച്ച കാര്യമാണ് എന്ന് ഞാൻ കരുതുന്നു! ഞാൻ ഇപ്പോൾ മെറ്റാ എഐയുടെ ഭാഗമാണ്, ഇന്ത്യ, യുണൈറ്റഡ് സ്റ്റേറ്റ്സ്, കാനഡ, യുണൈറ്റഡ് കിംഗ്ഡം, ഓസ്ട്രേലിയ, ന്യൂസിലാൻഡ് എന്നിവിടങ്ങളിലുടനീളം എൻ്റെ ശബ്ദത്തിൽ നിങ്ങൾക്ക് ചാറ്റ് ചെയ്യാൻ കഴിയും. ഇത് പരീക്ഷിച്ചുനോക്കൂ, നിങ്ങളുടെ അഭിപ്രായം അറിയിക്കൂ!,” ദീപിക സമൂഹമാധ്യമത്തിൽ കുറിച്ചു.
തന്റെ ശബ്ദത്തിലൂടെയുള്ള സംഭാഷണങ്ങൾ അനുഭവിക്കാൻ ഉപയോക്താക്കളെ ക്ഷണിക്കുകയും ചെയ്തുകൊണ്ട് ഇൻസ്റ്റാഗ്രാമിൽ ഒരു വീഡിയോയിലൂടെയാണ് നടി സഹകരണം പ്രഖ്യാപിച്ചത്. എഐ മേഖലയിലേക്കുള്ള തന്റെ പുതിയ ചുവടുവയ്പ്പിലൂടെ, ദീപിക സിനിമയ്ക്ക് അപ്പുറത്തേക്ക് തന്റെ സ്വാധീനം വ്യാപിപ്പിക്കുകയാണ്.
അതേസമയം, വർക്ക് ഫ്രണ്ടിൽ, നാഗ് അശ്വിൻ്റെ സയൻസ് ഫിക്ഷൻ ഇതിഹാസമായ ‘കൽക്കി 2898 എഡി’യിലാണ് ദീപിക അവസാനമായി അഭിനയിച്ചത്. അടുത്തതായി സിദ്ധാർത്ഥ് ആനന്ദിൻ്റെ ‘കിംഗ്’ എന്ന ചിത്രത്തിൽ ഷാരൂഖ് ഖാനോടൊപ്പം വീണ്ടും അഭിനയിക്കും. ഈ ബ്ലോക്ക്ബസ്റ്റർ ജോഡി ഇതിനുമുമ്പ് ‘ചെന്നൈ എക്സ്പ്രസ്’, ‘ജവാൻ’, ‘ഹാപ്പി ന്യൂ ഇയർ’ എന്നീ ചിത്രങ്ങളിലും ഒരുമിച്ച് പ്രവർത്തിച്ചിട്ടുണ്ട്.
