Nelvin Gok
‘മുഹമ്മദ് കുട്ടി’യെന്നു വേഗത്തില്‍ ആവര്‍ത്തിച്ചു പറഞ്ഞുനോക്കിയാല്‍ മമ്മൂട്ടിയാകും. മുഹമ്മദ് കുട്ടിയെ ‘മമ്മൂട്ടി’യെന്ന കുറിയ പേരിലേക്ക് കോളേജ് സുഹൃത്തുക്കള്‍ മാറ്റിയപ്പോള്‍ അതുതന്നെയാകട്ടെ തന്റെ ഐഡന്റിറ്റിയെന്നു ആ പൊടിമീശക്കാരന്‍ കരുതിക്കാണും. അപ്പോഴും ഭാവിയില്‍ ആ പേര് നടന്‍, സൂപ്പര്‍സ്റ്റാര്‍, മെഗാസ്റ്റാര്‍, ഭരത്, പത്മശ്രീ തുടങ്ങിയ വിശേഷണങ്ങളാല്‍ അലംകൃതമാകുമെന്ന് മുഹമ്മദ് കുട്ടിയോ അയാളുടെ സുഹൃത്തുക്കളോ കരുതിക്കാണില്ല.
ഒടുവില്‍ തന്നെ ‘മമ്മൂട്ടി’യാക്കിയ ആ സുഹൃത്തിനെ മമ്മൂട്ടി തന്നെ മലയാളികള്‍ക്കു പരിചയപ്പെടുത്തി കൊടുത്തു. ‘ദാണ്ടെ അവിടെയിരിപ്പുണ്ട്’ ആള്‍ക്കൂട്ടത്തിലേക്കു വിരല്‍ചൂണ്ടി മമ്മൂട്ടി തന്റെ കോളേജ് കാലത്തെ സുഹൃത്തിനെ വേദിയിലേക്ക് വിളിപ്പിച്ചു. പേര് ശശിധരന്‍, തമാശയ്ക്കു വിളിച്ചൊരു പേര് കാലവും അതിര്‍ത്തികളും കടന്ന് ചര്‍ച്ചയാകുമെന്നും വര്‍ഷങ്ങള്‍ക്കു ശേഷം ആ മമ്മൂട്ടി തന്നെ ഇങ്ങനെ ചേര്‍ത്തുപിടിക്കുമെന്നും ശശിധരന്‍ കരുതി കാണില്ല.
മമ്മൂട്ടിയുടെ വ്യക്തിജീവിതത്തിനു എപ്പോഴുമൊരു എക്സ്‌ക്ലൂസിവിറ്റി ഉണ്ട്. ചാന്‍സ് തെണ്ടി നടന്നാണ് ഇവിടെ എല്ലാവരും നടന്‍മാരായതെന്ന് ബെസ്റ്റ് ആക്ടറില്‍ മോഹന്‍ പറയുന്നത് വെറുതെയല്ല. മുഹമ്മദ് കുട്ടി ‘മമ്മൂട്ടി’യായത് അങ്ങനെ ചാന്‍സ് തെണ്ടി നടന്നാണ്. സംശയമുള്ളവര്‍ക്കു മമ്മൂട്ടി കരണ്‍ ഥാപ്പറിനു നല്‍കിയ പഴയൊരു അഭിമുഖം കണ്ടാല്‍ മനസിലാകും. മമ്മൂട്ടി മമ്മൂട്ടിയെ കുറിച്ചുള്ള എക്സ്‌ക്ലൂസിവിറ്റി റിവീല്‍ ചെയ്യുമ്പോള്‍ അതിനൊരു സിനിമാറ്റിക് എക്സ്പീരിയന്‍സ് നല്‍കാന്‍ കഴിയുന്നുണ്ട്. ശശിധരനെ കുറിച്ച് പറയുന്ന മമ്മൂട്ടി അശോക് കുമാര്‍ ആയതാണോ ബാലനെ കുറിച്ച് പറയുന്ന അശോക് കുമാര്‍ മമ്മൂട്ടിയായതാണോ എന്നു തോന്നുമാറ് അതിനൊരു ചന്തമുണ്ട്…! മുഹമ്മദ് കുട്ടിയായ മമ്മൂട്ടി ‘മമ്മൂട്ടി’യായ ‘കഥ പറയുമ്പോള്‍’ സ്‌ക്രീനില്‍ സിനിമ കാണുന്നൊരു സുഖം.
പണ്ട് നടന്‍ ശ്രീരാമനു നല്‍കിയ ഒരു അഭിമുഖത്തില്‍ മുഹമ്മദ് കുട്ടിയായ താന്‍ മമ്മൂട്ടിയായ കഥ പറയുന്നുണ്ട്. എന്തിലും പുതുമ തേടുന്ന ശീലം മമ്മൂട്ടിക്കു മാത്രമല്ല മുഹമ്മദ് കുട്ടിക്കും ഉണ്ടായിരുന്നു. മഹാരാജാസ് കോളേജില്‍ പഠിക്കാനെത്തിയപ്പോള്‍ ‘മുഹമ്മദ് കുട്ടി’യെന്ന പേരിനു എവിടെയോ എന്തോ ഒരു കുറവുണ്ടെന്നായി അയാള്‍ക്ക്. മുഹമ്മദ് കുട്ടി എന്ന തന്റെ പേര് ഒമർ ഷെരീഫ് എന്നാണെന്നു എല്ലാവരോടും പറഞ്ഞു. കേള്‍ക്കാനൊരു ഗമയൊക്കെയുണ്ട് ‘ഒമർ ഷെരീഫ്’. അങ്ങനെയിരിക്കെ കോളേജ് പഠനത്തിന്റെ ഒന്നാം വര്‍ഷത്തില്‍ തന്നെ ആ കള്ളി പൊളിഞ്ഞു.
വരാന്തയിലൂടെ നടക്കുമ്പോള്‍ മുഹമ്മദ് കുട്ടിയുടെ കോളേജ് ഐഡി കാര്‍ഡ് നിലത്തുവീണു. ഈ ഐഡി കാര്‍ഡില്‍ വടിവൊത്ത് എഴുതിയിരിക്കുന്നു ‘മുഹമ്മദ് കുട്ടി’ എന്ന്. ഐഡി കാര്‍ഡ് കൈയില്‍ കിട്ടിയ സുഹൃത്ത് ഒമർ ഷെരീഫിനെ നോക്കി പറഞ്ഞു ‘അയ്യേ നിന്റെ പേര് മമ്മൂട്ടിയെന്നാ’ ! ആദ്യം പറഞ്ഞതുപോലെ മുഹമ്മദ് കുട്ടിയെന്നു വേഗത്തില്‍ ആവര്‍ത്തിച്ചാല്‍ അത് ‘മമ്മൂട്ടി’യെന്നല്ലാതെ എന്താകാന്‍ ! ആ സുഹൃത്തിനെയാണ് മമ്മൂട്ടി ഹോര്‍ത്തൂസ് വേദിയില്‍ വെച്ച് മലയാളികള്‍ക്കു പരിചയപ്പെടുത്തി കൊടുത്തത്.
താന്‍ മമ്മൂട്ടിയാക്കിയ മുഹമ്മദ് കുട്ടി തന്നെ ആയിരങ്ങള്‍ക്കിടയില്‍ നിന്ന് ശശിധരന്‍ എന്ന് പേരെടുത്ത് വിളിച്ചതിന്റെ അത്ഭുതവും സന്തോഷവും ആ മുഖത്ത് കാണാം. ഓണ്‍ സ്‌ക്രീനില്‍ പ്രേക്ഷകരെ ആവേശം കൊള്ളിക്കുകയും കരയിപ്പിക്കുകയും ചിരിപ്പിക്കുകയും ചെയ്യുന്ന മമ്മൂട്ടി ഓഫ് സ്‌ക്രീനിലും ആവര്‍ത്തിച്ചു തന്റെ ‘ബ്രില്യന്‍സ്’. ശ്രീരാമനുമായുള്ള അഭിമുഖത്തില്‍ എനിക്ക് മമ്മൂട്ടിയെന്നു പേരിട്ട അവനിപ്പോള്‍ എവിട്യാണാവോ എന്നു മമ്മൂട്ടി ചോദിക്കുന്നുണ്ട്. വര്‍ഷം പത്തിരുപത് കഴിഞ്ഞെങ്കിലും ആ സുഹൃത്തിനെ മമ്മൂട്ടി കണ്ടെത്തിയിരിക്കുന്നു. ആള്‍ക്കൂട്ടത്തിനിടയിലെല്ലാം ബാലനു വേണ്ടി അശോക് കുമാര്‍ പരതിയതു പോലെ ശശിധരനു വേണ്ടി മമ്മൂട്ടിയും കണ്ണോടിച്ചു കാണും. ഒടുവില്‍ സുഖമുള്ളൊരു കാഴ്ചയായി കാലം അതും നിറവേറ്റി കൊടുത്തു..!
