പൃഥ്വിരാജിനെ നായകനാക്കി ജയന്‍ നമ്പ്യാര്‍ സംവിധാനം ചെയ്ത ‘വിലായത്ത് ബുദ്ധ’ ബോക്‌സ്ഓഫീസില്‍ ഞെരുങ്ങുന്നു. ആദ്യദിനം ലഭിച്ച സമ്മിശ്ര പ്രതികരണങ്ങള്‍ക്കു പിന്നാലെ കളക്ഷന്‍ കുത്തനെ ഇടിയുകയാണ്. റിലീസിനു ശേഷമുള്ള ആദ്യ വീക്കെന്‍ഡിലും കാര്യമായ നേട്ടമുണ്ടാക്കാന്‍ പൃഥ്വിരാജ് ചിത്രത്തിനു സാധിച്ചില്ല.
റിലീസ് ചെയ്തു നാല് ദിവസം കൊണ്ട് 3.79 കോടി മാത്രമാണ് വിലായത്ത് ബുദ്ധയുടെ ഇന്ത്യ നെറ്റ് കളക്ഷന്‍. റിലീസ് ദിനം 1.7 കോടി കളക്ട് ചെയ്ത ചിത്രത്തിനു അടുത്ത മൂന്ന് ദിവസം കൊണ്ട് മൂന്ന് രണ്ട് കോടി നേടാനെ സാധിച്ചിട്ടുള്ളൂ. ശനിയാഴ്ച ഒരു കോടിയും ഞായറാഴ്ച 75 ലക്ഷവുമാണ് ചിത്രത്തിന്റെ ഇന്ത്യ നെറ്റ് കളക്ഷന്‍. ആദ്യ തിങ്കളാഴ്ചയായ ഇന്നലെ 50 ലക്ഷത്തില്‍ താഴെ മാത്രമേ ചിത്രം നേടിയിട്ടുള്ളൂ.
ജി.ആര്‍.ഇന്ദുഗോപന്റെ നോവലിനെ ആസ്പദമാക്കിയാണ് ‘വിലായത്ത് ബുദ്ധ’ ഒരുക്കിയിരിക്കുന്നത്. ഏതാണ്ട് മൂന്ന് മണിക്കൂര്‍ ദൈര്‍ഘ്യമാണ് ചിത്രത്തിനുള്ളത്. പൃഥ്വിരാജിനൊപ്പം ഷമ്മി തിലകന്‍ സുപ്രധാന വേഷത്തിലെത്തിയിരിക്കുന്നു.
അതേസമയം കിഷ്‌കിന്ധാ കാണ്ഡം, കേരള ക്രൈം ഫയല്‍സ് 2 എന്നിവയ്ക്കു ശേഷം ദിന്‍ജിത്ത് അയ്യത്താന്‍ – ബാഹുല്‍ രമേശ് കൂട്ടുകെട്ട് ഒന്നിച്ച ‘എക്കോ’ ബോക്‌സ്ഓഫീസില്‍ അതിശയിപ്പിക്കുകയാണ്. സാക്‌നില്‍ക് റിപ്പോര്‍ട്ട് പ്രകാരം നാല് ദിവസം കൊണ്ട് എട്ട് കോടിക്കടുത്താണ് ‘എക്കോ’ ആഭ്യന്തര ബോക്‌സ്ഓഫീസില്‍ നിന്ന് വാരിക്കൂട്ടിയത്. റിലീസ് ദിനം 80 ലക്ഷം മാത്രമായിരുന്നു കളക്ഷന്‍. എന്നാല്‍ ശനിയാഴ്ചയിലേക്ക് എത്തിയപ്പോള്‍ അത് 1.85 കോടിയായി. ഞായറാഴ്ച മാത്രം മൂന്ന് കോടിക്കു മുകളില്‍ കളക്ഷന്‍ നേടാന്‍ ചിത്രത്തിനു സാധിച്ചു. റിലീസിനു ശേഷമുള്ള ‘മണ്‍ഡേ ടെസ്റ്റ്’ 1.85 കോടിയോടെ പാസാകാനും എക്കോയ്ക്കു സാധിച്ചു. ‘എക്കോ’യുടെ വേള്‍ഡ് വൈഡ് കളക്ഷന്‍ 10 കോടി കടന്നിട്ടുണ്ട്.
സന്ദീപ് പ്രദീപ് കേന്ദ്ര കഥാപാത്രത്തെ അവതരിപ്പിച്ചിരിക്കുന്ന ‘എക്കോ’ ഒരു മിസ്റ്ററി ത്രില്ലറാണ്. വിനീത്, നരെയ്ന്‍, ബിനു പപ്പു, അശോകന്‍, ബിയാന മോമിന്‍, രഞ്ജിത്ത് ശേഖര്‍ തുടങ്ങിയവരാണ് മറ്റു പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.
