മമ്മൂട്ടിയും മോഹന്‍ലാലും ഒന്നിച്ചെത്തിയ സൂപ്പര്‍ഹിറ്റ് ചിത്രമാണ് ‘നമ്പര്‍ 20 മദ്രാസ് മെയില്‍’. മോഹന്‍ലാല്‍ ടോണി കുരിശിങ്കല്‍ എന്ന നായകവേഷത്തെ അവതരിപ്പിച്ചപ്പോള്‍ മമ്മൂട്ടി ‘മമ്മൂട്ടി’യായി തന്നെ അഭിനയിച്ചു. ഇരുവരും ഒന്നിച്ചുള്ള സീനുകളെല്ലാം ആരാധകര്‍ വലിയ കൈയടിയോടെയാണ് തിയറ്ററുകളില്‍ സ്വീകരിച്ചത്. എന്നാല്‍ ഈ സിനിമ ചെയ്യണോ എന്ന കാര്യത്തില്‍ മമ്മൂട്ടിക്ക് സംശയമുണ്ടായിരുന്നു. പിന്നീട് മോഹന്‍ലാല്‍ തന്നെ ഇടപെട്ടാണ് മമ്മൂട്ടി നമ്പര്‍ 20 മദ്രാസ് മെയിലിന്റെ ഭാഗമാകുന്നത്.
ഈ ചിത്രത്തിന്റെ അസോസിയേറ്റ് ഡയറക്ടറായ വാസുദേവന്‍ ഗോവിന്ദന്‍കുട്ടി പഴയൊരു അഭിമുഖത്തിലാണ് ‘നമ്പര്‍ 20 മദ്രാസ് മെയില്‍’ മോഹന്‍ലാല്‍ – മമ്മൂട്ടി ചിത്രമായി മാറിയതിന്റെ പിന്നാമ്പുറം വെളിപ്പെടുത്തിയത്. തിരക്കഥാകൃത്ത് ഡെന്നീസ് ജോസഫും സംവിധായകന്‍ ജോഷിയും ചേര്‍ന്ന് സിനിമയിലെ സൂപ്പര്‍ താരത്തിന്റെ കഥാപാത്രം ചെയ്യാന്‍ ആരെ വേണമെന്ന ആലോചനയിലായിരുന്നു. മോഹന്‍ലാല്‍ നായകനായി എത്തുമ്പോള്‍ സൂപ്പര്‍താരത്തിന്റെ വേഷത്തിലേക്ക് മമ്മൂട്ടി തന്നെയാണ് ചേരുകയെന്ന് ഇരുവരും തീരുമാനിച്ചു. അസോസിയേറ്റ് ഡയറക്ടറായ വാസുദേവന്‍ ആണ് മമ്മൂട്ടിയോടു കഥ പറയാന്‍ പോയത്.
‘ നീ മറ്റവന്റെ (മോഹന്‍ലാല്‍) ആളല്ലേ..അവിടെ കൊണ്ടുപോയിട്ട് എന്നെ കൊച്ചാക്കാനല്ലേ?,’ എന്ന് മമ്മൂട്ടി തന്നോടു തമാശരൂപേണ ചോദിക്കുകയായിരുന്നെന്ന് വാസുദേവന്‍ പറയുന്നു. നല്ല കഥാപാത്രമാണ്, മമ്മൂക്ക ചെയ്താല്‍ നന്നാകുമെന്ന് താന്‍ പറഞ്ഞതായും വാസുദേവന്‍ വെളിപ്പെടുത്തി.
സംവിധായകന്‍ ജോഷിയും ഇക്കാര്യം പറയാനായി മമ്മൂട്ടിയെ വിളിച്ചിരുന്നു. ജോഷി സംസാരിച്ചിട്ടും മമ്മൂട്ടി പൂര്‍ണ സമ്മതം മൂളിയില്ല. ഒടുവില്‍ മോഹന്‍ലാല്‍ വിഷയത്തില്‍ ഇടപെട്ടു. മോഹന്‍ലാല്‍ വിളിച്ച ശേഷമാണ് മമ്മൂട്ടി ഈ പ്രൊജക്ടിലേക്ക് വരുന്നത്. തിരക്കഥ വായിച്ച ശേഷം ഈ കഥാപാത്രം ചെയ്യാമെന്ന് മമ്മൂട്ടി സമ്മതിക്കുകയായിരുന്നെന്നും വാസുദേവന്‍ വെളിപ്പെടുത്തി.
മമ്മൂട്ടിയും മോഹന്‍ലാലും ഒന്നിച്ചുള്ള ട്രെയിന്‍ സീനുകളാണ് ‘നമ്പര്‍ 20 മദ്രാസ് മെയിലിലെ’ പ്രധാന ആകര്‍ഷണം. ഇരുവരും പരസ്പരം മുത്തം കൊടുക്കുന്ന രംഗങ്ങളൊക്കെ ഏറെ കൈയടി വാരിക്കൂട്ടിയിരുന്നു.
