ഉള്ളടക്കം കൊണ്ട് ശ്രദ്ധേയമായ സിനിമകള്‍ മലയാളത്തിനു സമ്മാനിച്ച നിര്‍മാണ കമ്പനിയാണ് ‘മമ്മൂട്ടി കമ്പനി’. അതേസമയം ബോക്‌സ്ഓഫീസില്‍ ‘മമ്മൂട്ടി കമ്പനി’ സിനിമകള്‍ക്കു വലിയ മുന്നേറ്റമുണ്ടാക്കാന്‍ സാധിക്കാത്തത് പോരായ്മയുമാണ്. മമ്മൂട്ടി കമ്പനി നിര്‍മിക്കുന്ന ഏഴാമത്തെ സിനിമയായ ‘കളങ്കാവല്‍’ നവംബര്‍ 27 നു തിയറ്ററുകളിലെത്തുമെന്ന് നേരത്തെ പ്രഖ്യാപിച്ചിരുന്നെങ്കിലും ഇപ്പോള്‍ സമൂഹമാധ്യമങ്ങളിലെ പ്രധാന ചര്‍ച്ചാവിഷയം ‘കളങ്കാവല്‍ വരുമോ ഇല്ലയോ’ എന്നതാണ്.
ഏതാണ്ട് ഒരു മാസം മുന്‍പ് തന്നെ റിലീസ് ഡേറ്റ് പ്രഖ്യാപിച്ച ചിത്രം റിലീസിനു അടുത്തെത്തിയപ്പോള്‍ പ്രൊമോഷന്‍ കുറഞ്ഞ നിലയിലാണ്. ഇതാണ് ആരാധകരെ ചൊടിപ്പിച്ചിരിക്കുന്നത്. അതിനിടയില്‍ റിലീസ് തിയതി മാറ്റിയതായും അഭ്യൂഹങ്ങളുണ്ട്. ‘കളങ്കാവല്‍’ റിലീസുമായി ബന്ധപ്പെട്ട് ഇത്തരം അഭ്യൂഹങ്ങള്‍ പ്രചരിക്കുമ്പോഴും മമ്മൂട്ടി കമ്പനി പ്രതികരിക്കാത്തതിലും ആരാധകര്‍ നിരാശരാണ്.
റിലീസിനു മുന്‍പ് മമ്മൂട്ടി കമ്പനി ചിത്രങ്ങള്‍ക്കു കാര്യമായ പ്രൊമോഷന്‍ ലഭിക്കുന്നില്ലെന്നാണ് വിമര്‍ശനം. മറ്റു നിര്‍മാണ കമ്പനികള്‍ നൂതന പ്രചാരണ രീതികളുമായി കളം പിടിക്കുമ്പോള്‍ മമ്മൂട്ടി കമ്പനി ചിത്രങ്ങള്‍ക്കു തണുപ്പന്‍ പ്രചരണ രീതികളാണ് തിരഞ്ഞെടുക്കുന്നതെന്നാണ് ആരാധകര്‍ കുറ്റപ്പെടുത്തുന്നത്.
പതിവിലും വിപരീതമായി ‘കളങ്കാവല്‍’ റിലീസ് വളരെ നേരത്തെ പ്രഖ്യാപിക്കാനും തിയറ്റര്‍ ചാര്‍ട്ടിങ് അതിവേഗം നടത്താനും ഇത്തവണ മമ്മൂട്ടി കമ്പനി പരിശ്രമിച്ചിരുന്നു. തുടക്കത്തിലെ ഈ ആവേശം റിലീസ് അടുക്കുമ്പോഴേക്കും നഷ്ടമായെന്നാണ് സമൂഹമാധ്യമങ്ങളില്‍ ആരാധകര്‍ കുറ്റപ്പെടുത്തുന്നത്. റിലീസുമായി ബന്ധപ്പെട്ട് പ്രചരണ പരിപാടികള്‍ സംഘടിപ്പിക്കാത്തത് നിര്‍മാണ കമ്പനിയുടെ പോരായ്മയാണെന്നും മമ്മൂട്ടി ആരാധകര്‍ കുറ്റപ്പെടുത്തുന്നു. മുന്‍പ് ഇറക്കിയ പോസ്റ്ററുകള്‍ തന്നെയാണ് റിലീസ് അടുക്കുമ്പോഴും പ്രൊമോഷന്റെ ഭാഗമായി സമൂഹമാധ്യമങ്ങളില്‍ പങ്കുവയ്ക്കുന്നത്. ഇതിനിടെ റിലീസ് നീട്ടുമെന്ന് അഭ്യൂഹങ്ങള്‍ പ്രചരിച്ചു. എന്നിട്ടും നിര്‍മാണ കമ്പനി ഇതേ കുറിച്ച് വ്യക്ത വരുത്താനും തയ്യാറായിട്ടില്ല. സിനിമ നന്നായാല്‍ മാത്രം മതി, ബോക്‌സ് ഓഫീസ് കളക്ഷന്‍ പ്രധാനമല്ലെന്ന തരത്തിലാണ് മമ്മൂട്ടി കമ്പനി സിനിമകളെ സമീപിക്കുന്നതെന്നും സിനിമ പ്രേമികള്‍ വിമര്‍ശിക്കുന്നു.
