‘കാന്ത’ സിനിമയുടെ പ്രൊമോഷന്‍ പരിപാടികളില്‍ പങ്കെടുക്കുന്ന നടന്‍ ദുല്‍ഖര്‍ സല്‍മാന്‍ ആരാധകര്‍ കേള്‍ക്കാന്‍ ആഗ്രഹിക്കുന്ന തന്റെ സ്വകാര്യ വിശേഷങ്ങളും പങ്കുവയ്ക്കുകയാണ്. തന്റെ വാപ്പിച്ചിയും മലയാളത്തിന്റെ പ്രിയനടനുമായ മമ്മൂട്ടിയ്‌ക്കൊപ്പം ‘ലയണ്‍ കിങ്’ സിനിമ കണ്ട അനുഭവം ദുല്‍ഖര്‍ ഒരു അഭിമുഖത്തില്‍ വെളിപ്പെടുത്തി.
‘ആണുങ്ങള്‍ മറ്റുള്ളവരുടെ മുന്‍പില്‍ കരയാന്‍ പാടില്ല എന്നു പറയുന്നതില്‍ എന്താണ് അഭിപ്രായം?’ എന്ന് യുട്യൂബ് അഭിമുഖത്തിനിടെ ദുല്‍ഖറിനോടു ചോദിക്കുകയായിരുന്നു. വ്യക്തിജീവിതത്തില്‍ താന്‍ വളരെ വൈകാരിക വ്യക്തിയാണെന്നും പലപ്പോഴും കരഞ്ഞിട്ടുണ്ടെന്നും ദുല്‍ഖര്‍ വെളിപ്പെടുത്തി. താനും വാപ്പിച്ചിയും ഒരുമിച്ച് കരഞ്ഞ അനുഭവവും താരം തുറന്നുപറഞ്ഞു.
‘ലയണ്‍ കിങ്’ സിനിമ കാണുന്നതിനിടെ അതിലെ മുഫാസ എന്ന കഥാപാത്രം മരിക്കുന്ന സീനില്‍ താന്‍ കരഞ്ഞെന്ന് ദുല്‍ഖര്‍ പറയുന്നു. ‘ മുഫാസ മരിച്ചപ്പോള്‍ എന്റെ കണ്ണുനിറഞ്ഞു. തിരിഞ്ഞു നോക്കുമ്പോള്‍ വാപ്പിച്ചിയും കരയുകയായിരുന്നു,’ ദുല്‍ഖര്‍ പറഞ്ഞു.
സിനിമയിലേക്ക് എത്തുമ്പോള്‍ വാപ്പിച്ചിയുടെ ലെഗസിയോടു നീതി പുലര്‍ത്താന്‍ സാധിക്കില്ലെന്നാണ് താന്‍ കരുതിയിരുന്നതെന്നും ദുല്‍ഖര്‍ പറയുന്നു. ‘ അദ്ദേഹം ഇടയ്ക്ക്, എനിക്ക് നിന്റെ പ്രായമായിരുന്നപ്പോള്‍, 42 വയസുള്ളപ്പോള്‍, രണ്ട് നാഷണല്‍ അവാര്‍ഡ് ഉണ്ടായിരുന്നു എന്നു പറയും. അതിനോട് എങ്ങനെയാണ് മത്സരിക്കാനാവുക. ഞങ്ങള്‍ സ്‌കൂളില്‍ പഠിക്കുമ്പോള്‍ അദ്ദേഹം അവാര്‍ഡ് ഷോയ്ക്ക് പോകുമ്പോള്‍ പറയും, നോക്ക് ഞാന്‍ എന്റെ ജോലിയില്‍ ബെസ്റ്റ് ആണ്. നിങ്ങളുടെ ക്ലാസില്‍ നിങ്ങളാണോ ബെസ്റ്റ്? ഞാനും സഹോദരിയും അത് കേട്ട് നില്‍ക്കും. അദ്ദേഹം അതൊക്കെയാണ് ചെയ്യാറുള്ളത്,’ ദുല്‍ഖര്‍ പറഞ്ഞു.
തുടക്കസമയത്ത് അഭിനയത്തിലേക്ക് വരാന്‍ ഭയപ്പെട്ടിരുന്നു. പ്രതീക്ഷകള്‍ക്കൊത്ത് ഉയരാന്‍ സാധിക്കുമോ എന്നതായിരുന്നു ആശങ്ക. ജീവിതത്തില്‍ സിനിമ തനിക്കു ഓപ്ഷന്‍ അല്ലായിരുന്നെന്നും പിന്നീട് അങ്ങോട്ട് എത്തിപ്പെടുകയായിരുന്നെന്നും ദുല്‍ഖര്‍ കൂട്ടിച്ചേര്‍ത്തു.
