2000ൽ രാജീവ് മേനോൻ സംവിധാനത്തിൽ പുറത്തിറങ്ങിയ കണ്ടുകൊണ്ടേൻ കണ്ടുകൊണ്ടേൻ എന്ന റൊമാന്റിക് മ്യൂസിക്കൽ ഡ്രാമ, തമിഴ് സിനിമയിലെ മോഡേൺ ക്ലാസ്സിക്കുകളിൽ ഒന്നാണ്. മമ്മൂട്ടി, ഐശ്വര്യ റായ്, തബു, അജിത് കുമാർ, അബ്ബാസ് എന്നിവരാണ് പ്രധാന വേഷങ്ങളിൽ എത്തിയത്. ഏറെ പ്രേക്ഷകപ്രീതി നേടിയ ചിത്രമാണ് കണ്ടുകൊണ്ടേൻ കണ്ടുകൊണ്ടേൻ. താര നിരയോടൊപ്പം ചിത്രത്തിൽ എ ആർ റഹ്മാൻ ചിട്ടപ്പെടുത്തിയ ഗാനങ്ങൾ ഇന്നും ആളുകൾക്ക് ഒരുപാട് പ്രിയപ്പെട്ടതാണ്. അടുത്തിടെ, പ്രശസ്ത മാധ്യമപ്രവർത്തകൻ സുധീർ ശ്രീനിവാസന് നൽകിയ അഭിമുഖത്തിൽ സംവിധായകൻ രാജീവ് മേനോൻ, ചിത്രത്തിന്റെ കാസ്റ്റിംഗ് കഥകൾ വെളിപ്പെടുത്തിയിരുന്നു.
കാസ്റ്റിംഗിൽ തനിക്ക് ഏറ്റവും ബുദ്ധിമുട്ട് അനുഭവപ്പെട്ടത് കണ്ടുകൊണ്ടേൻ കണ്ടുകൊണ്ടേൻ എന്ന ചിത്രത്തിലെ മമ്മൂട്ടി അവതരിപ്പിച്ച മേജർ ബാല എന്ന കഥാപാത്രത്തിനാണ്.സിനിമയുടെ കാസ്റ്റിംഗ് നടക്കുമ്പോൾ, ബാലയുടെ വേഷം ചെയ്യാൻ പല പ്രമുഖ നടന്മാരെയും സമീപിച്ചപ്പോൾ തിരസ്കരണമാണ് ഉണ്ടായതെന്നും ഏറ്റവും ഒടുവിലാണ് മമ്മൂട്ടിയിലേക്ക് എത്തിയത് എന്നും രാജീവ് മേനോൻ വെളിപ്പെടുത്തി.
ഐശ്വര്യ റായ് അവതരിപ്പിച്ച മീനാക്ഷി എന്ന പെൺകുട്ടിയെ മാറി നിന്ന് സ്നേഹിക്കുന്ന മേജർ ബാല എന്ന കഥാപാത്രത്തിന് ഇന്ന് ഏറെ ആരാധകരുണ്ട്. മീനാക്ഷിയുടെ ജീവിതത്തിലെ പ്രതിസന്ധികളിൽ എല്ലാം നായികയ്ക്ക് താങ്ങായി നിൽക്കുന്ന മെഗാസ്റ്റാറിന്റെ കഥാപാത്രത്തെ ഇന്ന് സോഷ്യൽ മീഡിയ വിളിക്കുന്നത് “ഗ്രീൻ ഫ്ലാഗ്” നായകൻ എന്നാണ്. പക്ഷെ സിനിമയുടെ കാസ്റ്റിംഗ് സമയത്ത്, പല നായകന്മാർക്കും മേജർ ബാല എന്ന കഥാപാത്രത്തെ ഇഷ്ടപ്പെട്ടിരുന്നില്ല.
ബാല ഒരു കള്ളുകുടിയനാണ്, ഒരു കാൽ നഷ്ടപ്പെട്ട പട്ടാളക്കാരനാണ് എന്നതാണ് ആ കഥാപാത്രത്തിന്റെ സൗന്ദര്യം. പക്ഷെ ആ ഒരു കാരണം പറഞ്ഞാണ് അന്നത്തെ ചില പ്രമുഖ നായകന്മാർ ആ റോൾ ഒഴിവാക്കിയത്. ഒരു കാലില്ലാത്ത ആളായി അഭിനയിക്കാൻ താത്പര്യമില്ല എന്ന് തുറന്നു പറഞ്ഞവരുണ്ട്. പക്ഷെ മമ്മൂട്ടി ഒരിക്കൽ പോലും അതൊന്നും കാര്യമാക്കിയതേയില്ല,” രാജീവ് മേനോൻ വെളിപ്പെടുത്തി.
“വലതു കാൽ യുദ്ധത്തിൽ നഷ്ടപ്പെട്ട പട്ടാളക്കാരനാണ് മേജർ ബാല. അത് കൊണ്ട് നടക്കുമ്പോൾ വലതു ഭാഗത്തേക്കാണ് ചേരിയേണ്ടത് എന്ന് മമ്മൂട്ടി ആദ്യം തീരുമാനിച്ചിരുന്നു. പക്ഷെ ചിലപ്പോൾ ഷൂട്ടിങ്ങിന് ഇടയ്ക്ക് ചിലപ്പോഴൊക്കെ അദ്ദേഹം അത് മറന്നു പോവും. ഒരു ദിവസം നോക്കുമ്പോഴുണ്ട്, അദ്ദേഹം ഇടത് ഭാഗത്തേക്ക് ചെരിഞ്ഞ് നടക്കുകയാണ്. എന്റെ അസിസ്റ്റന്റ് ഡയറക്ടർ അത് പറയണോ വേണ്ടയോ എന്ന് കൺഫ്യൂഷനിൽ ആയിപ്പോയി. പിന്നെ അദ്ദേഹം ചോദിക്കും, “ഞാൻ വലത് ഭാഗത്തേക്കാണോ, ഇടത് ഭാഗത്തേക്കാണോ ഞൊണ്ടേണ്ടത്,” എന്ന്. അത് ആ സമയത്ത് സെറ്റിലെ വലിയ തമാശകളിൽ ഒന്നായിരുന്നു,” സീനിയർ സംവിധായകൻ ഓർത്തെടുത്തു.
1811ൽ ഇംഗ്ലീഷ് നോവലിസ്റ്റായ ജെയിൻ ഓസ്റ്റിൻ എഴുതിയ ലോക പ്രശസ്ത നോവൽ ‘സെൻസ് ആൻഡ് സെന്സിബിലിറ്റി’യിൽ നിന്ന് പ്രചോദനം ഉൾക്കൊണ്ടാണ് രാജീവ് മേനോൻ കണ്ടുകൊണ്ടേൻ കണ്ടുകൊണ്ടേൻ എന്ന ചിത്രം ഒരുക്കിയത്. സൗമ്യ, മീനാക്ഷി എന്നീ പ്രധാന കഥാപാത്രങ്ങളെ അവതരിപ്പിച്ചത് ബോളിവുഡ് താരങ്ങളായ തബുവും, ഐശ്വര്യ റായിയുമാണ്. മീനാക്ഷിയാകാൻ മലയാളി താരം മഞ്ജു വാര്യരെ സംവിധായകൻ സമീപിച്ചെങ്കിലും, ദിലീപിനെ വിവാഹം ചെയ്യാൻ തീരുമാനിച്ച നടി ആ ഓഫർ വേണ്ടെന്ന് വയ്ക്കുകയായിരുന്നു. അതിന് ശേഷമാണ് ഐശ്വര്യയയിലേക്ക് എത്തുന്നത്.
മീനാക്ഷിയെ പ്രണയിക്കുന്ന മേജർ ബാലയായി മമ്മൂട്ടി എത്തിയപ്പോൾ, അജിത് കുമാറിന്റെ കൈയ്യിൽ മനോഹർ എന്ന യുവ സംവിധായകന്റെ റോൾ ഭദ്രമായിരുന്നു. ശ്രീകാന്ത് ആയി വേഷമിട്ടത് അബ്ബാസാണ്. ഇവരെ കൂടാതെ ശ്രീവിദ്യ, രഘുവരൻ, മണിവണ്ണൻ, ശ്യാമിലി, നിഴൽകൾ രവി, അനിതാ രത്‌നം, ഉണ്ണികൃഷ്ണൻ നമ്പൂതിരി, തുടങ്ങിയ ഒരു വലിയ താരനിര തന്നെയുണ്ടായിരുന്നു.
