മുംബൈ: സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യയിൽ ഓഫിസർ ഗ്രേഡ് എ (അസിസ്റ്റന്റ് മാനേജർ) തസ്തികയിലേക്ക് അപേക്ഷകൾ ക്ഷണിച്ചു. വിവിധ വിഭാഗങ്ങളിലായി 110 ഒഴിവുകളാണ് ഉള്ളത്. ഒക്ടോബർ 30 മുതൽ ഓൺലൈനായി അപേക്ഷകൾ സമർപ്പിക്കാം. 62,500 മുതൽ 1,26,100 രൂപ വരെയാണ് ശമ്പളം.
അസിസ്റ്റന്റ് മാനേജർ ജനറൽ വിഭാഗത്തിൽ 56 ഒഴിവുകളാണ് ഉള്ളത്. ഏതെങ്കിലും വിഷയത്തിൽ ബിരുദാനന്തര ബിരുദം അല്ലെങ്കിൽ പിജി ഡിപ്ലോമ, ലോ/എൻജിനീയറിങ് ബിരുദം/സിഎ/സിഎഫ്എ/സിഎസ്/കോസ്റ്റ് അക്കൗണ്ടന്റ് എന്നിങ്ങനെയാണ് യോഗ്യത. ഐടി വിഭാഗത്തിൽ 22 ഒഴിവുകളാണുള്ളത്. ഏതെങ്കിലും വിഷയത്തിൽ എൻജിനീയറിങ് ബിരുദം അല്ലെങ്കിൽ ഏതെങ്കിലും വിഷയത്തിൽ ബിരുദവും കംപ്യൂട്ടർ സയൻസ്/കംപ്യൂട്ടർ ആപ്ലിക്കേഷൻ/ഇൻഫർമേഷൻ ടെക്നോളജിയിൽ പിജി ബിരുദവുമാണ് അപേക്ഷിക്കാനുള്ള യോഗ്യത.
ലീഗൽ വിഭാഗത്തിൽ 20 ഒഴിവുകളുണ്ട്. നിയമബിരുദമാണ് യോഗ്യത. റിസർച് വിഭാഗത്തിൽ നാലും ഒഫീഷ്യൽ ലാംഗ്വേജ് വിഭാഗത്തിൽ മൂന്നും ഒഴിവുകളുണ്ട്. എൻജിനീയറിങ്–സിവിൽ, എൻജിനീയറിങ് –ഇലക്ട്രിക്കൽ എന്നീ വിഭാഗങ്ങളിലും അവസരങ്ങളുണ്ട്. അപേക്ഷിക്കാനുള്ള കൂടിയ പ്രായപരിധി 30 വയസാണ്. രണ്ടു ഘട്ടമായുള്ള ഓൺലൈൻ പരീക്ഷയുടെയും ഇന്റർവ്യൂന്റെയും അടിസ്ഥാനത്തിലാണ് തിരഞ്ഞെടുപ്പ് നടത്തുക. കേരളത്തിൽ തിരുവനന്തപുരം, കൊച്ചി, കോഴിക്കോട്, ആലപ്പുഴ, കണ്ണൂർ, കോട്ടയം, തൃശൂർ എന്നീ ജില്ലകളിൽ പരീക്ഷാകേന്ദ്രങ്ങളുണ്ട്.
