മിച്ചല്‍ സ്റ്റാര്‍ക്കിനു ഇംഗ്ലണ്ടിന്റെ മറുപടിയെത്തി, നായകന്‍ ബെന്‍ സ്റ്റോക്‌സിലൂടെ ! ആഷസ് ഒന്നാം ടെസ്റ്റിന്റെ ഒന്നാം ദിനം കളി നിര്‍ത്തുമ്പോള്‍ ആതിഥേയരായ ഓസ്‌ട്രേലിയ ഒന്‍പത് വിക്കറ്റ് നഷ്ടത്തില്‍ 123 എന്ന നിലയില്‍ തകര്‍ന്നുനില്‍ക്കുകയാണ്. ഇംഗ്ലണ്ടിന്റെ ഒന്നാം ഇന്നിങ്‌സ് സ്‌കോറില്‍ നിന്ന് 49 റണ്‍സ് അകലെയാണ് ഇപ്പോഴും ഓസ്‌ട്രേലിയ.
പെര്‍ത്തില്‍ നടക്കുന്ന ഒന്നാം ടെസ്റ്റില്‍ ടോസ് ലഭിച്ച ഇംഗ്ലണ്ട് ആദ്യം ബാറ്റ് ചെയ്യാന്‍ തീരുമാനിക്കുകയായിരുന്നു. മിച്ചല്‍ സ്റ്റാര്‍ക്ക് കൊടുങ്കാറ്റായി ആഞ്ഞടിച്ചപ്പോള്‍ ഇംഗ്ലണ്ട് 172 നു ഓള്‍ഔട്ട്. ഹാരി ബ്രൂക്ക് (61 പന്തില്‍ 52), ഒലി പോപ്പ് (58 പന്തില്‍ 46), ജാമി സ്മിത്ത് (22 പന്തില്‍ 33), ബെന്‍ ഡക്കറ്റ് (20 പന്തില്‍ 21) എന്നിവരൊഴികെ എല്ലാവരും രണ്ടക്കം കാണാതെ പുറത്തായി. സാക് ക്രൗലി (പൂജ്യം), ജോ റൂട്ട് (പൂജ്യം), ബെന്‍ സ്റ്റോക്സ് (ആറ്) എന്നിവര്‍ പൂര്‍ണമായി നിരാശപ്പെടുത്തി. ഓസ്ട്രേലിയയ്ക്കായി പേസര്‍ മിച്ചല്‍ സ്റ്റാര്‍ 12.5 ഓവറില്‍ ഏഴ് വിക്കറ്റ് നേടി. സ്‌കോട്ട് ബോളണ്ടിനു രണ്ടും കാമറൂണ്‍ ഗ്രീനിനു ഒരു വിക്കറ്റും.
മറുപടി ബാറ്റിങ്ങില്‍ ഓസ്‌ട്രേലിയയ്ക്കും തുടക്കംമുതല്‍ അടിതെറ്റി. ജോഫ്ര ആര്‍ച്ചറാണ് ഇംഗ്ലണ്ടിനായി വിക്കറ്റ് വേട്ടയ്ക്കു തുടക്കമിട്ടത്. പിന്നീട് ഇംഗ്ലണ്ട് നായകന്‍ ബെന്‍ സ്റ്റോക്സ് എത്തി കങ്കാരുക്കളുടെ കഥ കഴിച്ചു. ആറ് ഓവറില്‍ 23 റണ്‍സ് വഴങ്ങി അഞ്ച് വിക്കറ്റുകള്‍ സ്റ്റോക്സ് നേടി. ആര്‍ച്ചറും ബ്രണ്ടന്‍ കാഴ്‌സും രണ്ട് വീതം വിക്കറ്റുകള്‍ നേടി. അലക്‌സ് കാരി (26 പന്തില്‍ 26) ആണ് ഓസ്‌ട്രേലിയയുടെ ടോപ് സ്‌കോറര്‍. കാമറൂണ്‍ ഗ്രീന്‍ (50 പന്തില്‍ 24), ട്രാവിസ് ഹെഡ് (35 പന്തില്‍ 21) എന്നിവരും പൊരുതി നോക്കി. സ്റ്റീവ് സ്മിത്ത് (49 പന്തില്‍ 17) നിരാശപ്പെടുത്തി.
ബാറ്റിങ്ങില്‍ നിറംമങ്ങിയ ഇംഗ്ലണ്ട് നായകന്‍ ബൗളിങ്ങില്‍ തനിസ്വഭാവം പുറത്തെടുത്തെന്നാണ് ആരാധകര്‍ പറയുന്നത്. ബാറ്റിങ്ങില്‍ ഫോം ഔട്ട് ആയാല്‍ ബൗളിങ്ങില്‍, ബൗളിങ്ങില്‍ ഫോംഔട്ട് ആയാല്‍ ബാറ്റിങ്ങില്‍ എന്നതാണ് വര്‍ഷങ്ങളായി സ്റ്റോക്സ് ഇംഗ്ലണ്ടിനായി ചെയ്യുന്നതെന്ന് ആരാധകര്‍ പറയുന്നു. 12 പന്തുകള്‍ നേരിട്ട് ആറ് റണ്‍സ് മാത്രമാണ് ബാറ്റിങ്ങില്‍ സ്റ്റോക്‌സിനു നേടാനായത്.
