മലയാളി താരം സഞ്ജു സാംസണെ ചെന്നൈ സൂപ്പര്‍ കിങ്‌സ് ട്രേഡിങ്ങിലൂടെ സ്വന്തമാക്കി. കളിക്കാരെ നിലനിര്‍ത്താനുള്ള സമയപരിധിക്കു ഒരു ദിവസം മാത്രം ശേഷിക്കെയാണ് താര കൈമാറ്റ ജാലകത്തിലൂടെ ചെന്നൈ സഞ്ജുവിനെ റാഞ്ചിയത്.
ട്രേഡിങ്ങില്‍ രണ്ട് പ്രമുഖ താരങ്ങളെ രാജസ്ഥാനു വിട്ടുനല്‍കാന്‍ ചെന്നൈ തീരുമാനിച്ചു. വെറ്ററന്‍ ഓള്‍റൗണ്ടര്‍ രവീന്ദ്ര ജഡേജയും ഇംഗ്ലണ്ട് താരം സാം കറാനുമാണ് ചെന്നൈ വിട്ട് രാജസ്ഥാനിലേക്ക് എത്തുക. ട്രേഡിങ്ങിനു ബിസിസിഐയുടെ അംഗീകാരം ലഭിച്ചാല്‍ ഉടന്‍ പ്രാബല്യത്തില്‍ വരും. രാജസ്ഥാനും ചെന്നൈയും തമ്മിലുള്ള ട്രേഡിങ്ങിനു ബിസിസിഐയുടെ അന്തിമ അംഗീകാരം കൂടി ലഭിച്ചാല്‍ മതിയെന്ന് ദ് ഹിന്ദു റിപ്പോര്‍ട്ട് ചെയ്യുന്നു. കഴിഞ്ഞ മെഗാ താരലേലത്തിനു മുന്നോടിയായി സഞ്ജുവിനെ 18 കോടിക്കാണ് രാജസ്ഥാന്‍ നിലനിര്‍ത്തിയത്. ഇതേ തുകയ്ക്കു തന്നെയാണ് രവീന്ദ്ര ജഡേജയെ ചെന്നൈ നിലനിര്‍ത്തിയത്. ലേലത്തില്‍ 2.40 കോടിക്ക് സാം കറാനെ സ്വന്തമാക്കുകയും ചെയ്തു.
നിലവില്‍ രാജസ്ഥാനു എട്ട് വിദേശ താരങ്ങളുണ്ട്. സാം കറാന്‍ കൂടി എത്തുമ്പോള്‍ ഇത് ഒന്‍പത് ആകും. ഐപിഎല്‍ നിയമപ്രകാരം ഇതില്‍ നിന്ന് ഒരു വിദേശ താരത്തെ രാജസ്ഥാന്‍ റിലീസ് ചെയ്യും. ജോഫ്ര ആര്‍ച്ചര്‍, ഷിമ്രോണ്‍ ഹെറ്റ്മയര്‍, വനിന്ദു ഹസരംഗ, മഹീഷ് തീക്ഷണ, ഫസല്‍ഹഖ് ഫറൂഖി, ക്വെന മാപ്ഹാക, നന്ദ്രേ ബര്‍ജര്‍, ലുഹാന്‍ ദേ പ്രേട്ടോറിയസ് എന്നിവരാണ് രാജസ്ഥാന്റെ വിദേശ താരങ്ങള്‍. കഴിഞ്ഞ മെഗാ താരലേലത്തിനു മുന്നോടിയായി രാജസ്ഥാന്‍ നിലനിര്‍ത്തിയ വെസ്റ്റ് ഇന്‍ഡീസ് താരം ഷിമ്രോണ്‍ ഹെറ്റ്മയറെ റിലീസ് ചെയ്‌തേക്കുമെന്നാണ് പുറത്തുവരുന്ന റിപ്പോര്‍ട്ടുകള്‍.
2021 ല്‍ രാജസ്ഥാന്‍ നായകനായ സഞ്ജു 67 മത്സരങ്ങളില്‍ 33 എണ്ണത്തില്‍ ടീമിനെ ജയത്തിലെത്തിച്ചു. രാജസ്ഥാന്റെ ഏറ്റവും വലിയ റണ്‍വേട്ടക്കാരനും സഞ്ജു തന്നെ. റിയാന്‍ പരാഗ് ആയിരിക്കും ഇനി രാജസ്ഥാനെ നയിക്കുക. 2021 ലാണ് സഞ്ജു രാജസ്ഥാന്റെ ക്യാപ്റ്റനാകുന്നത്. 2024 സീസണില്‍ രാജസ്ഥാനു വേണ്ടി സഞ്ജു 531 റണ്‍സ് അടിച്ചു.
