ഡൽഹി: ഹരിയാനയിലെ വോട്ട് ചോരിയുമായി ബന്ധപ്പെട്ട വാര്‍ത്താസമ്മേളനത്തിൽ കേരളത്തിൽ നിന്നുള്ള ബിജെപി നേതാവിന്റെ വീഡിയോ പ്രദർശിപ്പിച്ച് ലോക്സഭാ പ്രതിപക്ഷ നേതാവ് രാഹുല്‍ ഗാന്ധി. ഇന്ന് ഉച്ചയ്ക്ക് 12-ന് എഐസിസി ആസ്ഥാനത്ത് നടത്തിയ പരിപാടിയിൽ വോട്ട് ചോരിയുമായി ബന്ധപ്പെട്ട് വിവിധ ബിജെപി നേതാക്കളുടെ വീരവാദങ്ങളുടെ വീഡിയോകൾ രാഹുൽഗാന്ധി പുറത്തുവിട്ടിട്ടുണ്ട്. ഇക്കൂട്ടത്തിലാണ് കേരളത്തിൽ നിന്നുള്ള ബിജെപി നേതാവ് ബി ഗോപാലകൃഷ്ണന്റെ പരാമർശങ്ങളും രാഹുൽഗാന്ധി ദേശീയതലത്തിൽ ചർച്ചയാക്കിയത്.
വാര്‍ത്താസമ്മേളനത്തില്‍ ബി ഗോപാലകൃഷ്ണന്‍ ഓഗസ്റ്റ് 22-ന് മാധ്യമങ്ങളോട് സംസാരിച്ചതിന്റെ വീഡിയോയാണ് രാഹുല്‍ഗാന്ധി കാണിച്ചത്. ജയിക്കാന്‍ ഉദ്ദേശിക്കുന്ന മണ്ഡലങ്ങളില്‍ പുറത്തുനിന്ന് ആളെ കൊണ്ടുവന്ന് താമസിപ്പിച്ച് വോട്ട് ചെയ്യിക്കാറുണ്ടെന്ന് ഗോപാലകൃഷ്ണന്‍ പറയുന്ന ദൃശ്യങ്ങളാണ് രാഹുൽ പുറത്തുവിട്ടത്.
‘ജയിക്കാന്‍ വേണ്ടി ഞങ്ങള്‍ വ്യാപകമായി വോട്ട് ചേര്‍ക്കും. ഞങ്ങള്‍ ജയിക്കാന്‍ ഉദ്ദേശിച്ച മണ്ഡലങ്ങളില്‍ ജമ്മുകശ്മീരില്‍നിന്ന് ആള്‍ക്കാരെ കൊണ്ടുവന്ന് ഒരുവര്‍ഷം താമസിപ്പിച്ച് വോട്ട് ചെയ്യിപ്പിക്കും. ഒരു സംശയവുമില്ല. അത് നാളെയും ചെയ്യിക്കും’ -എന്ന് ഗോപാലകൃഷ്ണൻ പറയുന്നതാണ് വീഡിയോ. തൃശൂരിൽ സുരേഷ്ഗോപി മത്സരിച്ച ലോക്സഭാ തെരഞ്ഞെടുപ്പിൽ വോട്ട് ചേർക്കൽ നടന്നെന്ന ആരോപണത്തിൽ പ്രതികരിക്കവേയായിരുന്നു ബി ഗോപാലകൃഷ്ണൻ ഇക്കാര്യം പറഞ്ഞത്.
ഇലക്ഷൻ കമ്മീഷന്റെ വിശ്വാസ്യത ചോദ്യം ചെയ്യപ്പെടുന്നതാണ് തന്റെ കണ്ടെത്തലുകളെന്ന മുഖവുരയോടെയാണ് രാഹുൽഗാന്ധിയുടെ വാർത്താ സമ്മേളനം ആരംഭിച്ചത്. 93174 തെറ്റായ മേൽവിലാസങ്ങൾ ഉപയോഗിച്ച് ഹരിയാനയിൽ വോട്ടുചേർത്തതായി രാഹുൽഗാന്ധി ആരോപിക്കുന്നു. ഇതോടൊപ്പം 5 ലക്ഷത്തിലധികം ഇരട്ടവോട്ടുകളും 19 ലക്ഷത്തിലധികം ബൾക്ക് വോട്ടുകളും അടങ്ങുന്നതാണ് 25 ലക്ഷത്തിലധികം വരുന്ന വോട്ട് ചോരിയെന്ന് രാഹുൽഗാന്ധി പറയുന്നു. ബിജെപി രാജ്യത്തിന്റെ ജനാധിപത്യ അടിത്തറ തകർത്തതായി രാഹുൽഗാന്ധി ആരോപിച്ചു. രാജ്യത്തിന്റെ ഭരണഘടന അപകടത്തിലാണെന്ന് രാഹുൽഗാന്ധി പറഞ്ഞു. വോട്ട് ചോരിക്ക് ഇരയായവരിൽ ചിലരുടെ വീഡിയോയിലൂടെയുള്ള സന്ദേശങ്ങൾ കൂടി ഉൾപ്പെടുത്തിയായിരുന്നു പ്രതിപക്ഷനേതാവിന്റെ വാർത്താ സമ്മേളനം.
ബ്രസീൽ മോഡലിന്റെ ഫോട്ടോ ഉപയോഗിച്ച് പോലും വോട്ട് ചോരി നടന്നു. ഒരു വീട്ടിൽ തന്നെ നൂറിലധികം വോട്ടർമാരെ ചേർത്തിരിക്കുന്നു. ഒരേ ഫോട്ടോ തന്നെ 200 ലധികം തവണ വോട്ടർപട്ടികയിൽ വിവിധ പേരുകൾക്കൊപ്പം ഇടംപിടിച്ചതായും രാഹുൽഗാന്ധി വാർത്താസമ്മേളനത്തിൽ ചൂണ്ടിക്കാണിക്കുന്നു.
