Football Homepage Featured Sports

വീണ്ടും പ്രതിസന്ധി? മെസി നവംബറില്‍ എത്തില്ല, കാരണം വെളിപ്പെടുത്തി സ്‌പോണസര്‍മാര്‍

സൂപ്പര്‍താരം ലയണല്‍ മെസിയും 2022 ലോകകപ്പ് ജയിച്ച അര്‍ജന്റീന ടീമും കേരളത്തില്‍ കളിക്കാനെത്തുന്നതിന്റെ ത്രില്ലിലായിരുന്നു ഫുട്‌ബോള്‍ ആരാധകര്‍. എന്നാല്‍ നവംബറില്‍ നിശ്ചയിച്ചിരുന്ന അര്‍ജന്റീനയുടെ കേരളത്തിലെ കളികള്‍ നീണ്ടുപോകുമെന്നാണ് ഇപ്പോള്‍ ലഭിക്കുന്ന വിവരം. അര്‍ജന്റീന ടീം നവംബറില്‍ എത്തില്ലെന്ന് സ്‌പോണസര്‍മാരും സ്ഥിരീകരിച്ചു.

മത്സരം നടത്താന്‍ ഫിഫയുടെ അനുമതി ലഭിച്ചിട്ടില്ലെന്നാണ് സ്‌പോണസര്‍മാരില്‍ ഒരാളായ ആന്റോ അഗസ്റ്റിന്‍ പറയുന്നത്. ഫിഫ അനുമതി ലഭിക്കുവാനുള്ള കാലതാമസം പരിഗണിച്ച് നവംബര്‍ വിന്‍ഡോയിലെ കളി മാറ്റിവയ്ക്കാന്‍ അര്‍ജന്റീന ഫുട്ബോള്‍ അസോസിയേഷനുമായുള്ള (എഎഫ്എ) ചര്‍ച്ചയില്‍ ധാരണയായെന്ന് ആന്റോ അഗസ്റ്റിന്‍ സമൂഹമാധ്യമത്തിലൂടെ അറിയിച്ചു. പുതുക്കിയ തിയതി ഉടന്‍ ഔദ്യോഗികമായി അറിയിക്കുമെന്നും അദ്ദേഹം വ്യക്തമാക്കി.

ലോകകപ്പ് വിജയിച്ച അര്‍ജന്റീന ടീം നവംബറില്‍ കൊച്ചി ജവഹര്‍ലാല്‍ നെഹ്‌റു സ്റ്റേഡിയത്തില്‍ കളിക്കുമെന്നായിരുന്നു നേരത്തെ നടന്ന പ്രഖ്യാപനം. ഇതിനായി കൊച്ചി സ്റ്റേഡിയത്തില്‍ നവീകരണ ജോലികള്‍ ആരംഭിച്ചതുമാണ്. ഇതിനിടയിലാണ് ഫിഫയുമായി ബന്ധപ്പെട്ട പുതിയ പ്രതിസന്ധി.

നവംബറിനു ശേഷമുള്ള വിന്‍ഡോയില്‍ മെസിയും കൂട്ടരും കേരളത്തില്‍ എത്തുമെന്നാണ് ഇപ്പോള്‍ സ്‌പോണസര്‍മാരുടെ ഉറപ്പ്. നവംബറില്‍ അംഗോളയില്‍ മാത്രമാണ് അര്‍ജന്റീന സൗഹൃദ മത്സരം കളിക്കുകയെന്ന് അര്‍ജന്റീന മാധ്യമങ്ങളും റിപ്പോര്‍ട്ട് ചെയ്തിട്ടുണ്ട്. ഓസ്‌ട്രേലിയയെയാണ് കേരളത്തില്‍ അര്‍ജന്റീനയുടെ എതിരാളികളായി പരിഗണിച്ചിരുന്നത്. ഇരു ടീമുകളും തമ്മില്‍ രണ്ട് മത്സരങ്ങള്‍ കളിക്കാനായിരുന്നു ആലോചന. എന്നാല്‍ ഇപ്പോള്‍ പുറത്തുവരുന്ന റിപ്പോര്‍ട്ടുകള്‍ പ്രകാരം ഓസ്‌ട്രേലിയയുടെ കേരളത്തിലേക്കുള്ള വരവും അനിശ്ചിതത്വത്തിലാണ്. നവംബര്‍ 14, 18 തിയതികളില്‍ വെനസ്വേലയ്ക്കും കൊളംബിയയ്ക്കുമെതിരെ ഓസ്‌ട്രേലിയന്‍ ഫുട്‌ബോള്‍ ടീമിനു മത്സരങ്ങളുണ്ട്. ഇതിനുശേഷമുള്ള മത്സരങ്ങളുടെ കാര്യത്തില്‍ ഇതുവരെ തീരുമാനമായിട്ടില്ല.

കേരളത്തില്‍ എത്തുമെന്ന് സര്‍ക്കാരും സ്‌പോണസര്‍മാരും അവകാശപ്പെടുന്ന അര്‍ജന്റീന ടീമിലെ താരങ്ങള്‍ ഇവരാണ്: ലയണല്‍ മെസി, എമിലിയാനോ മാര്‍ട്ടിനെസ്, അലക്സിസ് മാക് അലിസ്റ്റര്‍, റോഡ്രിഗോ ഡി പോള്‍, നിക്കോളസ് ഒറ്റമെന്‍ഡി, ജൂലിയന്‍ അല്‍വാരസ്, ലൗത്താറോ മാര്‍ട്ടിനെസ്, ഗോണ്‍സാലോ മോന്റിയല്‍, നിക്കോളാസ് ടാഗ്ലിയാഫിക്കോ, ജുവാന്‍ ഫോയ്ത്ത്, മാര്‍ക്കസ് അക്യുന, എസക്യേല്‍ പലാസിയോസ്, ജിയോവാനി ലോ സെല്‍സോ, ലിയാന്‍ഡ്രോ പരേഡസ്, നിക്കോ ഗോണ്‍സാലസ്, തിയാഗോ അല്‍മാഡ, ക്രിസ്റ്റ്യന്‍ റൊമാറോ, നഹ്വല്‍ മൊളിന.

Related Posts