ന്യുഡൽഹി: നിർമ്മിത ബുദ്ധിയുടെ സഹായത്തോടെ സമൂഹമാധ്യമങ്ങളിൽ ഉയരുന്ന ഡീപ്പ് ഫേക്ക് വീഡിയോകൾക്ക് കടിഞ്ഞാണിടാൻ നിയമ നടപടിയുമായി കേന്ദ്രം. ഡീപ്പ്‌ഫേക്ക് വീഡിയോ, ചിത്രങ്ങൾ തുടങ്ങിയ വ്യാജ ആർട്ടിഫിഷൽ ഇന്റലിജൻസ് കണ്ടെന്റുകൾക്കെതിരെ കേന്ദ്ര സർക്കാർ നിയമനിർമ്മാണത്തിന് ഒരുങ്ങി. സോഷ്യൽ മീഡിയ പ്ലാറ്റ്ഫോമുകൾക്കും ഇത് സംബന്ധിച്ച നിർദേശം നൽകും. എ.ഐ കമ്പനികൾക്കും നിർമ്മിത ബുദ്ധി ഉപയോഗിച്ചുള്ള കണ്ടെന്റുകൾ നിർബന്ധമായും “എ.ഐ ജനറേറ്റഡ്” എന്ന് ലേബൽ ചെയ്യണമെന്ന് പുതിയ നിയമ നിർദ്ദേശത്തിൽ പരമാർശിക്കുന്നത്.
ജനറേറ്റീവ് എ.ഐ ഉപകരണങ്ങൾ ഉപയോഗിച്ച് മാനനഷ്ടം, ധന നാശം, തെറ്റായ വിവരം പ്രചരിപ്പിക്കുക, തിരഞ്ഞെടുപ്പുകളിൽ ഇടപെടൽ, വ്യക്തികളെ അനുകരിച്ച് ഫേക്ക് വീഡിയോകൾ നിർമ്മിക്കുക എന്നിങ്ങനെ കുറ്റകൃത്യങ്ങൾ വ്യാപകമാകുകയാണ്. വ്യാപക പരാതികൾ ഉയർന്ന് വന്ന പശ്ചാത്തലത്തിലാണ് പുതിയ നിയമനിർമ്മാണത്തിന് ഒരുങ്ങുന്നത്. ഇതോടെ എ.ഐ വീഡിയോകളേയും ഫേക്ക് വീഡിയോകളേയും ഒരു പരിധിവരെ തടയിടാൻ സാധിക്കും. ഡീപ്പ്‌ഫേക്ക് ഉള്ളടക്കം അപ്‌ലോഡ് ചെയ്യുന്ന ഉപയോക്താക്കൾ അതത് സോഷ്യൽ മീഡിയ പ്ലാറ്റ്ഫോമുകൾ അവ എ.ഐ ഉപയോഗിച്ച് സൃഷ്ടിച്ചതാണ് എന്ന വിവരം വ്യക്തമാക്കണമെന്നാണ് കേന്ദ്രം നിർദേശിക്കുന്നത്.
ഏകദേശം 100 കോടി ഇന്റർനെറ്റ് ഉപയോക്താക്കളുള്ള രാജ്യത്തിൽ, വ്യാജവാർത്തയും ഡീപ്പ്‌ഫേക്ക് കണ്ടെന്റും സമുദായങ്ങൾക്കിടയിലെ സംഘർഷങ്ങൾക്കിടയാകാനുള്ള സാധ്യത വലുതാണെന്നും കേന്ദ്ര നിരീക്ഷണം. അതിനാൽ തന്നെ ഇത്തരം ഡീപ്ഫേക്ക് വീഡിയോകൾക്കും എ.ഐ ചിത്രങ്ങൾക്കും കടിഞ്ഞാൺ വീഴുമെന്നും നിയമം നടപ്പിലാക്കുമെന്നുമാണ് കേന്ദ്രസർക്കാരിന്റെ മുന്നറിയിപ്പ്. പ്രത്യേകിച്ച് തിരഞ്ഞെടുപ്പ് സമയങ്ങളിൽ കണ്ടെന്റുകളുടെ സാധ്യത പരിശോധിക്കേണ്ടതിന്റെ ഉത്തരവാദിത്തവും വിലയിരുത്തണമെന്നും കേന്ദ്രം പറയുന്നു. സിനിമാ താരങ്ങളുടെ വരെ നിർമ്മിത ബുദ്ധി വീഡിയോകളും അശ്ലീല ചിത്രങ്ങളും സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്. ഇവയെല്ലാം പുതിയ നിയമത്തോടെ പിടിവീഴും.
