കോട്ടയം: ആര്‍എസ്എസ് ക്യാമ്പില്‍ നിന്ന് പീഡനത്തിനിരയായെന്നും അതുകാരണമുണ്ടായ മാനസികപ്രശ്‌നങ്ങളാണ് തന്റെ മരണത്തിന് കാരണമെന്നും വ്യക്തമാക്കി കോട്ടയം സ്വദേശിയായ യുവാവിന്റെ വീഡിയോ. മരണത്തിന് തൊട്ടുമുമ്പ് യുവാവ് ഇൻസ്റ്റഗ്രാമിൽ ബുധനാഴ്ച പുറത്തുവരുന്ന വിധം ഷെഡ്യൂൾ ചെയ്തു വെയ്ക്കുകയായിരുന്നു.
ആർഎസ്എസ് ക്യാമ്പിൽ വെച്ച് നിധീഷ് മുരളി എന്ന കണ്ണനിൽ നിന്ന് നിരന്തരമായ ലൈംഗിക പീഡനത്തിനിരയായെന്ന് യുവാവ് പറയുന്നു. താൻ ഒസിഡി പേഷ്യന്റ് ആണെന്നും ടാബ്ലെറ്റുകൾ കഴിക്കുന്നുണ്ടെന്നും ചെറുപ്പത്തിൽ അയൽവാസിയിൽ നിന്ന് തനിക്കുണ്ടായ ലൈംഗികാതിക്രമമാണ് തനിക്ക് ഈ അവസ്ഥ വരാൻ കാരണമെന്നും ഇദ്ദേഹം പറയുന്നു. കരഞ്ഞുകൊണ്ടായിരുന്നു യുവാവിന്റെ വീഡിയോ.
പല സ്ഥലത്തു നിന്നും ആണുങ്ങളിൽ നിന്നും പീഡനമേറ്റതായും ആർഎസ്എസുകാരുമായി ഒരിക്കലും ആരും ഇടപെടരുതെന്നും യുവാവ് പറയുന്നു. അവരുടെ ക്യാമ്പുകളിൽ ശാരീരിക പീഡനമാണ് നടക്കുന്നതെന്നും യുവാവ് പറഞ്ഞു. അവർ കുട്ടികളെ ഉപദ്രവിക്കുന്നവരാണെന്നും പലരും തുറന്നു പറയാത്തതാണെന്നും യുവാവ് പറയുന്നു.
“അതൊക്കെ ഉപദ്രവമാണെന്ന് എനിക്ക് മനസിലായത് തന്നെ കഴിഞ്ഞവര്‍ഷമാണ്. എന്തുചെയ്യാന്‍ പറ്റും. മരണംവരെ ഞാന്‍ അനുഭവിക്കും. ഒരുവിധത്തിലാണ് ഞാന്‍ ജീവിക്കുന്നത്, ഒരുവിധത്തില്‍. ജീവിക്കാന്‍ വയ്യ എനിക്ക്. ശരിക്കും മടുത്തു”- യുവാവ് പറഞ്ഞ് വീഡിയോ അവസാനിപ്പിച്ചു.
കഴിഞ്ഞയാഴ്ചയാണ് 26 വയസ്സുള്ള സോഫ്റ്റുവെയർ എൻജിനീയർ ആയ ഈ യുവാവിനെ മരിച്ച നിലയിൽ കണ്ടെത്തിയത്. എൻഎം എന്നയാളാണ് മരണത്തിന് കാരണമെന്ന ആത്മഹത്യാ കുറിപ്പ് അന്ന് കണ്ടെത്തിയിരുന്നു. ഇതാരാണെന്ന അന്വേഷണത്തിലായിരുന്നു പൊലീസ്. അതിനിടെയാണ് അത് നിതീഷ് മുരളിയെന്നയാളാണെന്ന് വ്യക്തമാക്കുന്ന യുവാവിന്റെ തന്നെ വീഡിയോ ഇൻസ്റ്റഗ്രാമിലൂടെ പുറത്തുവന്നത്. യുവാവിന്റെ വീഡിയോ പുറത്തുവന്നതോടെ പ്രദേശത്തെ ആർഎസ്എസും പ്രതിരോധത്തിലായി.
ആത്മഹത്യ ഒന്നിനും പരിഹാരമല്ല, മാനസികാരോഗ്യ വിദഗ്ധരുടെ സഹായമാണ് തേടേണ്ടത്, ‘ദിശ’ ഹെല്‍പ് ലൈനില്‍ വിളിക്കുക Toll free helpline number: 1056, 0471-2552056
