അപ്രതീക്ഷിതമായ സാമ്പത്തിക ആവശ്യങ്ങൾ നിറവേറ്റുന്നതിനായി പലരും ആശ്രയിക്കുന്നത് വ്യക്തിഗത വായ്പകളെയാണ്. ചുരുങ്ങിയ സമയത്തിനുള്ളിൽ ഈ വായ്പകൾ ലഭിക്കുന്നുവെന്നതാണ് ഇവയുടെ സവിശേഷത. എന്നിരുന്നാലും, വ്യക്തിഗത വായ്പയ്ക്ക് ഒരാൾ അപേക്ഷിക്കുമ്പോൾ വായ്പ നൽകുന്നവർ ചില കാര്യങ്ങൾ പരിഗണിക്കാറുണ്ട്. ഇതിൽ മുൻകാല തിരിച്ചടവ് ചരിത്രം, ക്രെഡിറ്റ് സ്കോറുകൾ, തൊഴിൽ ചരിത്രം, തിരിച്ചടവുകൾ മുടങ്ങിയത് തുടങ്ങി നിരവധി ഘടകങ്ങൾ ഉൾപ്പെടുന്നു.
ഇത്തരം പ്രധാന വശങ്ങൾ മനസിലാക്കുന്നത് വായ്പ അപേക്ഷ തിരസ്കരിക്കപ്പെടാതെ വായ്പ നേടാനുള്ള നിങ്ങളുടെ സാധ്യത വർധിപ്പിക്കും. വ്യക്തിഗത വായ്പ പലിശ നിരക്കുകൾ വ്യത്യസ്ത വായ്പാ സ്ഥാപനങ്ങളിൽ വ്യത്യാസപ്പെട്ടിരിക്കുന്നു. അവ വായ്പ തുകകൾ, വായ്പ നൽകുന്ന തരം, വായ്പ തരം, തിരിച്ചടവ് കാലാവധി തുടങ്ങിയ ഘടകങ്ങളെ ആശ്രയിച്ചിരിക്കുന്നു. പേഴ്സണൽ ലോൺ നേടാനുള്ള യോഗ്യതയെ ബാധിക്കുന്ന 5 ഘടകങ്ങൾ എന്തൊക്കെയാണെന്ന് നോക്കാം.
- ക്രെഡിറ്റ് സ്കോർ: ഉയർന്ന ക്രെഡിറ്റ് സ്കോർ, അതായത് 750-ൽ കൂടുതലുള്ളത് ക്രെഡിറ്റ് യോഗ്യതയെയും വിശ്വാസ്യതയെയും സൂചിപ്പിക്കുന്നു. വ്യക്തിഗത വായ്പയ്ക്കും ക്രെഡിറ്റ് കാർഡ് ലഭിക്കുന്നതിനുള്ള വർധിപ്പിക്കുന്നു.
- വരുമാന സ്ഥിരത: ജോലിയിലൂടെയോ സ്വയം തൊഴിലിലൂടെയോ വർഷങ്ങളോളം സ്ഥിരമായി ലഭിക്കുന്ന വരുമാനം വായ്പ നൽകുന്ന സ്ഥാപനങ്ങൾക്ക് നിങ്ങളുടെ തിരിച്ചടവ് ശേഷി ഉറപ്പുനൽകുന്നു. ഇത് ഒരു പോസിറ്റീവ് അടയാളമാണ്. കൂടാതെ, നിങ്ങളുടെ വിശ്വാസ്യതയെയും സത്യസന്ധതയെയും സൂചിപ്പിക്കുന്നു.
- നിലവിലുള്ള കടബാധ്യത: ഉയർന്ന കടം-വരുമാന അനുപാതം ഒരു അപേക്ഷകന്റെ യോഗ്യത കുറയ്ക്കും. കാരണം വായ്പ നൽകുന്ന സ്ഥാപനങ്ങൾ വായ്പ നൽകുന്നതിനു മുമ്പ് അപേക്ഷകന്റെ മൊത്തത്തിലുള്ള സാമ്പത്തിക ബാധ്യതകൾ പരിശോധിക്കുന്നു.
- ആവശ്യപ്പെടുന്ന വായ്പ തുകയും കാലാവധിയും: വലിയ വായ്പ തുകകൾക്കോ കൂടുതൽ തിരിച്ചടവ് കാലാവധികൾക്കോ സാധാരണയായി കർശനമായ പരിശോധനകളും സ്ഥിരീകരണങ്ങളും ആവശ്യമാണ്. കൂടുതൽ തിരിച്ചടവ് കാലാവധി ഉള്ളതിനാൽ, കടം വാങ്ങുന്നയാൾ ഉയർന്ന തുക പലിശയായി നൽകേണ്ടിവരും.
- തൊഴിൽ തരവും കാലാവധിയും: സ്ഥിര ജോലിയുള്ള ശമ്പളക്കാരായ വ്യക്തികൾക്ക് സ്വയം തൊഴിൽ ചെയ്യുന്ന വ്യക്തികളേക്കാൾ ഉയർന്ന യോഗ്യതാ സ്കോറുകൾ ഉണ്ടാകാൻ സാധ്യതയുണ്ട്. ഇതിനർത്ഥം വായ്പ നൽകുന്നവർ പണം കടം കൊടുക്കാൻ മടികാട്ടില്ല എന്നാണ്.
നല്ല ക്രെഡിറ്റ് പ്രൊഫൈൽ, ഉയർന്ന ക്രെഡിറ്റ് സ്കോർ, സ്ഥിരമായ വരുമാനം എന്നിവ ഒരാളുടെ വ്യക്തിഗത വായ്പാ യോഗ്യത വർധിപ്പിക്കുന്നതിന് നിർണായക ഘടകങ്ങളാണ്. എല്ലായ്പ്പോഴും പലിശ നിരക്കുകൾ താരതമ്യം ചെയ്യുക, ഗുണദോഷങ്ങൾ മനസ്സിലാക്കുക, ഏതെങ്കിലും വായ്പാ അപേക്ഷ സമർപ്പിക്കുന്നതിന് മുമ്പ് പ്രൊഫഷണൽ മാർഗനിർദ്ദേശം തേടുക.
