ന്യൂഡൽഹി: വോട്ടർ പട്ടിക ക്രമക്കേടിൽ വീണ്ടും മാധ്യമ സമ്മേളനവുമായി രാഹുൽ ഗാന്ധി. കോൺഗ്രസിന് വോട്ട് ചെയ്യുന്നവരെ ആസൂത്രിതമായി നീക്കി വോട്ട് കൊള്ളയ്ക്ക് 101 ശതമാനം തെളിവുണ്ടെന്നും രാഹുൽ. മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെയും രാഹുൽ ആഞ്ഞടിച്ചു. ഇത്തവണ പരാതിക്കാരെയും നേരിട്ട് ഹാജരാക്കിയാണ് രാഹുൽ മാധ്യമങ്ങളെ കണ്ടത്.
“നൂറ് ശതമാനം സത്യത്തിന്റെ പിന്തുണയില്ലാതെ ഈ വേദിയിൽ ഞാൻ ഒന്നും പറയാൻ പോകുന്നില്ല. എന്റെ രാജ്യത്തെ സ്നേഹിക്കുന്ന ഒരാളാണ് ഞാൻ, എന്റെ ഭരണഘടനയെ സ്നേഹിക്കുന്നു, ജനാധിപത്യ പ്രക്രിയയെ സ്നേഹിക്കുന്നു, ആ പ്രക്രിയയെ ഞാൻ സംരക്ഷിക്കുന്നു. നിങ്ങൾക്ക് നിർണ്ണയിക്കാൻ കഴിയുന്ന 100% തെളിവുകളുടെ അടിസ്ഥാനത്തിലല്ലാത്ത ഒന്നും ഞാൻ ഇവിടെ പറയാൻ പോകുന്നില്ല.” രാഹുൽ വ്യക്തമാക്കി.
LIVE: Special Press Conference – Vote Chori Factory https://t.co/ne8cdFCnMs
— Rahul Gandhi (@RahulGandhi) September 18, 2025
‘ കര്‍ണാടകയിലെ മണ്ഡലമാണ് അലന്ദ്. ഈ മണ്ഡലത്തിലെ 6018 വോട്ടുകള്‍ ഇല്ലാതാക്കാന്‍ ചിലര്‍ ശ്രമിച്ചിരിക്കുന്നു. 2023 ലെ തിരഞ്ഞെടുപ്പില്‍ അലന്ദ് മണ്ഡലത്തിലെ എത്ര വോട്ടുകള്‍ ഇതുപോലെ ഇല്ലാതാക്കിയിട്ടുണ്ടെന്ന് നമുക്ക് അറിയില്ല. ഉറപ്പായും 6018 ല്‍ കൂടുതല്‍ ആയിരിക്കും അത്. എങ്കിലും ചില വോട്ടുകള്‍ ഇല്ലാതാക്കിയവരെ അവിചാരിതമായി നമുക്ക് മനസിലായിട്ടുണ്ട്. തന്റെ അമ്മാവന് വോട്ട് ഇല്ലാത്തതായി ഒരു ബൂത്ത് ലെവല്‍ ഓഫീസറുടെ ശ്രദ്ധയില്‍പ്പെട്ടു. പരിശോധനയില്‍ അമ്മാവന്റെ വോട്ട് ഇല്ലാതാക്കിയിട്ടുണ്ടെന്നും സമീപവാസിയാണ് ഇത് ചെയ്തതെന്നും മനസിലായി. അയല്‍വാസിയോടു ഇത് ചോദിച്ചപ്പോള്‍ അദ്ദേഹമല്ല വോട്ട് ഇല്ലാതാക്കിയതെന്ന് വ്യക്തമായി. അതിനര്‍ത്ഥം ചില ബാഹ്യശക്തികള്‍ ഇടപെട്ട് ഇത്തരത്തില്‍ വോട്ടുകള്‍ ഇല്ലാതാക്കിയിട്ടുണ്ട് എന്നാണ്,’ രാഹുല്‍ പറഞ്ഞു.
മഹാരാഷ്ട്രയിലെ രജൂര മണ്ഡലത്തില്‍ 6,850 വോട്ടുകള്‍ കൂട്ടിച്ചേര്‍ത്തിട്ടുണ്ടെന്നാണ് രാഹുല്‍ പറയുന്നത്. കൂട്ടിച്ചേര്‍ക്കപ്പെട്ട വോട്ടര്‍മാരുടെ വിവരം പരിശോധിക്കുമ്പോള്‍ പല പേരുകള്‍ക്കൊപ്പവും നല്‍കിയിരിക്കുന്ന ഫോണ്‍ നമ്പറുകള്‍ കൃത്യമല്ല. വ്യാജ ലോഗിന്‍ ഉപയോഗിച്ചാണ് തട്ടിപ്പ് നടത്തിയിരിക്കുന്നത്. വോട്ടര്‍ പട്ടികയില്‍ നിന്ന് നീക്കം ചെയ്യുന്നതും കൂട്ടിച്ചേര്‍ക്കുന്നതും യഥാര്‍ഥ വോട്ടര്‍മാര്‍ അറിയാതെ ആണെന്നും രാഹുല്‍ ആരോപിച്ചു.
വോട്ടര്‍ പട്ടികയില്‍ നിന്ന് ആളുകളെ നീക്കുന്നതു വ്യക്തികള്‍ ഒറ്റയ്ക്കൊറ്റയ്ക്കു ചെയ്യുന്നതല്ലെന്നും ഇതിനായി പ്രത്യേക സോഫ്റ്റ് വെയര്‍ ഉപയോഗിക്കുകയാണെന്നും രാഹുല്‍ ആരോപിച്ചു. സോഫ്റ്റ് വെയറിന്റെ സഹായത്തോടെ കേന്ദ്രീകൃതമായി നടപ്പാക്കുന്ന പ്രവൃത്തിയാണിത്. കര്‍ണാടകയ്ക്കു പുറത്തുള്ള കോള്‍ സെന്ററുകള്‍ വഴിയാണു ക്രമക്കേടുകള്‍ നടന്നത്. കര്‍ണാടകയിലും മഹാരാഷ്ട്രയിലും മാത്രമല്ല, ഹരിയാനയിലും യുപിയിലും വോട്ടു കൊള്ള നടന്നുവെന്നും രാഹുല്‍ ആരോപിച്ചു.
