ചെന്നൈ: ഒരു രാഷ്ട്രം, ഒരു തെരഞ്ഞെടുപ്പ് ജനാധിപത്യത്തെ കൊല്ലുമെന്നും അതിർത്തി നിർണ്ണയം ദക്ഷിണേന്ത്യയെ ദുർബലപ്പെടുത്തുമെന്നും നടൻ വിജയ്. 2026 ലെ തമിഴ്‌നാട് നിയമസഭാ തിരഞ്ഞെടുപ്പിന് മുന്നോടിയായി ടിവികെയുടെ പ്രചാരണത്തിന് തുടക്കം കുറിച്ച് അരിയല്ലൂരിൽ നടത്തിയ സമ്മേളനം ഉദ്‌ഘാടനം ചെയ്തു സംസാരിക്കുകയായിരുന്നു അദ്ദേഹം.
നിർദ്ദിഷ്ട അതിർത്തി നിർണ്ണയ പ്രക്രിയയെയും വിജയ് വിമർശിച്ചു. പ്രത്യേകിച്ച് തമിഴ്‌നാട് പോലുള്ള ദക്ഷിണേന്ത്യൻ സംസ്ഥാനങ്ങളിലെ പ്രതിപക്ഷ പാർട്ടികളെ ദുർബലപ്പെടുത്തുക എന്ന ലക്ഷ്യത്തോടെയാണ് ഇത് നടത്തിയതെന്ന് അദ്ദേഹം അവകാശപ്പെട്ടു.
ഒരേസമയം തിരഞ്ഞെടുപ്പുകൾ നടത്തുക എന്ന ആശയം രാജ്യത്തിന്റെ ഫെഡറൽ ഘടനയെ ദുർബലപ്പെടുത്തുക മാത്രമല്ല, സംസ്ഥാന സർക്കാരുകളുടെ പിരിച്ചുവിടലിലേക്ക് നയിക്കുകയും ചെയ്യുമെന്ന് വിജയ് പറഞ്ഞു. അത്തരമൊരു നീക്കം തിരഞ്ഞെടുപ്പ് കൃത്രിമത്വത്തിന് വഴിയൊരുക്കുമെന്ന് അദ്ദേഹം ആശങ്ക പ്രകടിപ്പിച്ചു, ഇത് ഭരണകക്ഷിക്ക് അന്യായമായ നേട്ടം നൽകുമെന്ന് അദ്ദേഹം അവകാശപ്പെട്ടു.
“ഒരു രാഷ്ട്രം, ഒരു തിരഞ്ഞെടുപ്പ്” എന്ന ആശയത്തിലൂടെ, എല്ലാ സംസ്ഥാന സർക്കാരുകളെയും പിരിച്ചുവിട്ട് ഒരേസമയം തിരഞ്ഞെടുപ്പുകൾ നടത്താനാണ് അവർ ആലോചിക്കുന്നത്. നിരവധി കൃത്രിമങ്ങൾ നടത്താൻ കഴിയുമെന്ന് അവർ വിശ്വസിക്കുന്നു. ഇതിനെ ജനാധിപത്യത്തിന്റെ കൊലപാതകം എന്നാണ് വിളിക്കേണ്ടതെന്നും വിജയ് പറഞ്ഞു.
