നമ്മളിൽ പലർക്കും, ഒരു കപ്പ് ചായ ഇല്ലാതെ രാവിലെ ഉറക്കം ഉണരുക ബുദ്ധിമുട്ടാണ്. പലരും ഒരു കപ്പ് ചായ കുടിച്ചാണ് കിടക്കയിൽനിന്നും എഴുന്നേൽക്കാറുള്ളത്. മലയാളികളുടെ ജീവിതത്തിൽ ചായയ്ക്ക് അത്രയധികം സ്ഥാനമുണ്ട്. ചായ മികച്ചൊരു പാനീയമായി തോന്നിയേക്കാം, പക്ഷേ അത് ഉപയോഗിച്ച് ദിവസം ആരംഭിക്കുന്നത് എല്ലായ്പ്പോഴും ആരോഗ്യത്തിന് നല്ലതല്ല. വെറും വയറ്റിൽ ചായ കുടിക്കുമ്പോൾ ശരീരത്തിന് യഥാർത്ഥത്തിൽ എന്താണ് സംഭവിക്കുന്നതെന്ന് നോക്കാം.
- വയറിന് അസ്വസ്ഥത ഉണ്ടാക്കാം
രാവിലെ ഉറക്കം എഴുന്നേറ്റ ഉടൻ ചായ കുടിക്കുന്നത് അസിഡിറ്റിക്ക് കാരണമാകും, പ്രത്യേകിച്ച് വെറും വയറ്റിൽ. ചായയിലെ കഫീൻ ആസിഡ് ഉൽപാദനത്തെ ഉത്തേജിപ്പിക്കുന്നു. ഇത് ആമാശയ പാളിയെ പ്രകോപിപ്പിക്കുകയും അസ്വസ്ഥത ഉണ്ടാക്കുകയും ചെയ്യും. എന്നാൽ, ഇഞ്ചി, ഏലം തുടങ്ങിയ സുഗന്ധവ്യഞ്ജനങ്ങൾ ചായയിൽ ചേർക്കുന്നതിലൂടെ ഈ പ്രശ്നം മറികടക്കാനാകും.
- പോഷകങ്ങൾ ആഗിരണം ചെയ്യുന്നത് തടയുന്നു
ചായയിൽ ടാന്നിൻസ് എന്ന സംയുക്തങ്ങൾ അടങ്ങിയിരിക്കുന്നു. അതിനാൽ, ചായ ആദ്യം കുടിക്കുമ്പോൾ ശരീരത്തിന്റെ പ്രധാന പോഷകങ്ങൾ ആഗിരണം ചെയ്യാനുള്ള കഴിവ് കുറച്ചേക്കാം, പ്രത്യേകിച്ച് ഇരുമ്പ് അടങ്ങിയ ഭക്ഷണങ്ങൾ കഴിക്കുകയാണെങ്കിൽ. ആരോഗ്യകരമായ ഭക്ഷണം കഴിക്കുന്നുണ്ടെങ്കിൽ പോലും ചായ ഉപയോഗിച്ച് ദിസം തുടങ്ങുന്നത് പോഷക ഉപഭോഗത്തെ ബാധിച്ചേക്കാം.
- നിർജലീകരണം
ചായ ജലാംശം നൽകുന്നതായി തോന്നുമെങ്കിലും, കഫീന് നേരിയ ഡൈയൂററ്റിക് ഗുണങ്ങളുണ്ട്. അതായത് ഇടയ്ക്കിടെ മൂത്രമൊഴിക്കുന്നതിന് കാരണമാകുന്നു. രാത്രിയിൽ മണിക്കൂറുകളോളം ഉറങ്ങുന്നതിനാൽ ശരീരത്തിൽ ഇതിനകം തന്നെ നിർജലീകരണം സംഭവിച്ചിട്ടുണ്ട്. രാവിലെ ഉണരുമ്പോൾ ആവശ്യത്തിന് വെള്ളം കുടിക്കാതെ ചായ കുടിക്കുന്നത് നിർജലീകരണത്തിന് കാരണമാകും.
- ഊർജത്തെ ബാധിച്ചേക്കാം
ചായ താൽക്കാലിക ഊർജം നൽകിയേക്കാം, എന്നാൽ കഫീനും പഞ്ചസാരയും ചേർക്കുന്നത് ദിവസത്തിന്റെ അവസാനത്തിൽ ക്ഷീണത്തിന് കാരണമാകും. അമിതമായ അളവിൽ വെറും വയറ്റിൽ കുടിക്കുന്നത് ഊർജ നഷ്ടത്തിലേക്ക് നയിച്ചേക്കാം.
- ദന്താരോഗ്യത്തെ ബാധിച്ചേക്കാം
ഉണർന്ന ഉടനെ ചായ കുടിക്കുന്നത് പല്ലുകളിൽ കറ ഉണ്ടാക്കുകയും കാലക്രമേണ ഇനാമലിനെ ദുർബലപ്പെടുത്തുകയും ചെയ്യും. കാരണം, ചായയിൽ ചേർക്കുന്ന പഞ്ചസാര വായിലെ ബാക്ടീരിയകളെയും വളർത്തുന്നു, ഇത് പല്ലുകൾ കേടാകാനുള്ള സാധ്യത വർധിപ്പിക്കുന്നു. രാവിലെ പല്ല് തേക്കാതെ ചായ കുടിക്കുകയാണെങ്കിൽ ദന്താരോഗ്യത്തെ ബാധിക്കാനുള്ള സാധ്യത വളരെ കൂടുതലാണ്.
