നമ്മുടെ അടുക്കളയിലെ ഒരു പ്രധാനി ആണ് അയമോദകം. രുചിക്ക് പുറമെ ഔഷധഗുണങ്ങളുടെ കലവറ കൂടിയാണ് ഈ കുഞ്ഞൻ വിത്തുകൾ. ജലദോഷം, ചുമ, കഫക്കെട്ട് എന്നിവയ്ക്ക് അയമോദകം ഒരു മികച്ച പരിഹാരമാണെന്ന് പഴമക്കാർ പറയാറുണ്ട്. അയമോദകത്തിലെ പ്രധാന ഘടകമായ തൈമോൾ ആണ് ഇതിന് ഔഷധഗുണം നൽകുന്നത്.
ശൈത്യകാലത്തെയും മഴക്കാലത്തെയും അസുഖങ്ങളെ പ്രതിരോധിക്കാൻ നമ്മുടെ അടുക്കളയിലുള്ള ഈ കുഞ്ഞൻ വിത്ത് ഏറെ ഫലപ്രദമാണ്. ഇതിന് ബാക്ടീരിയകളെയും അണുക്കളെയും നശിപ്പിക്കാനുള്ള കഴിവുണ്ട്. അയമോദകം എങ്ങനെയാണ് ജലദോഷവും ചുമയും അകറ്റുന്നതെന്നും ഉപയോഗിക്കേണ്ട രീതികളെക്കുറിച്ചും അറിയാം.
ശ്വാസതടസ്സം നീക്കുന്നു: ജലദോഷം വരുമ്പോൾ ശ്വാസനാളങ്ങളിൽ ഉണ്ടാകുന്ന വീക്കം കുറയ്ക്കാനും ശ്വാസോച്ഛ്വാസം സുഗമമാക്കാനും അയമോദകം സഹായിക്കുന്നു.
ചുമ കുറയ്ക്കുന്നു: അയമോദകം ഒരു പ്രകൃതിദത്ത കഫ് സിറപ്പ് പോലെ പ്രവർത്തിക്കുന്നു. ഇത് തൊണ്ടയിലെ അസ്വസ്ഥത കുറയ്ക്കുകയും ചുമയുടെ ആവൃത്തി കുറയ്ക്കുകയും ചെയ്യുന്നു.
കഫം പുറത്തുകളയുന്നു: ശ്വാസകോശത്തിൽ അടിഞ്ഞുകൂടിയിരിക്കുന്ന കഫത്തെ ഇളക്കി പുറത്തുകളയാൻ അയമോദകത്തിന് പ്രത്യേക കഴിവുണ്ട്.
ഉപയോഗിക്കേണ്ട രീതികൾ
അയമോദകം ഇട്ട് ആവി പിടിക്കുക: തിളച്ച വെള്ളത്തിൽ ഒരു ടീസ്പൂൺ അയമോദകം ഇട്ട് ആവി പിടിക്കുന്നത് മൂക്കടപ്പും ശ്വാസതടസ്സവും മാറാൻ സഹായിക്കും.
അയമോദക വെള്ളം: ഒരു കപ്പ് വെള്ളത്തിൽ ഒരു ടീസ്പൂൺ അയമോദകം ഇട്ട് തിളപ്പിക്കുക. വെള്ളം പകുതിയായി വറ്റിയ ശേഷം അരിച്ചെടുത്ത് ഇളം ചൂടോടെ കുടിക്കാം.
അയമോദകവും ശർക്കരയും: അയമോദകം ചതച്ചതും അല്പം ശർക്കരയും ചേർത്ത് ദിവസവും രണ്ട് നേരം കഴിക്കുന്നത് വരണ്ട ചുമയ്ക്ക് ആശ്വാസം നൽകും.
ശ്രദ്ധിക്കേണ്ട കാര്യങ്ങൾ
അയമോദകം ഗുണപ്രദമാണെങ്കിലും ചില കാര്യങ്ങൾ ശ്രദ്ധിക്കണം. അമിതമായി ഉപയോഗിച്ചാൽ വയറിൽ എരിച്ചിലോ അസിഡിറ്റിയോ ഉണ്ടാകാൻ സാധ്യതയുണ്ട്. ഗർഭിണികൾ അയമോദകം വലിയ അളവിൽ ഉപയോഗിക്കുന്നതിന് മുൻപ് ഡോക്ടറുടെ ഉപദേശം തേടണം. ആസ്ത്മ പോലുള്ള വിട്ടുമാറാത്ത ശ്വാസകോശ രോഗങ്ങളുള്ളവർ മരുന്നുകൾക്ക് പകരമായി ഇതൊരിക്കലും ഉപയോഗിക്കരുത്. മരുന്നുകൾക്കൊപ്പം ഒരു സഹായമായി മാത്രം ഉപയോഗിക്കുക.
