കൊച്ചി: ദീപ്തി മേരി വർഗീസിന്റെ നേതൃത്വത്തിൽ ഇന്ന് ഉച്ചയ്ക്ക് ആരംഭിക്കുന്ന റോഡ് ഷോയിൽ എഐസിസി ജനറൽ സെക്രട്ടറി ദീപാ ദാസ് മുൻഷി പങ്കെടുക്കും. ഇന്ന് ഉച്ചയ്ക്ക് രണ്ട് മണിക്കാണ് ദീപ്തി മേരി വർഗീസിന്റെ റോഡ് ഷോ ജനതാ റോഡിൽ ആരംഭിക്കുന്നത്. വൈകുന്നേരം 4 മണിക്ക് പാലാരിവട്ടം തമ്മനം റോഡിലെ തേജസ് ഓഡിറ്റോറിയത്തിന് അടുത്തുള്ള കോൺഗ്രസിന്റെ സെൻട്രൽ ഇലക്ഷൻ കമ്മിറ്റി ഓഫീസിന് സമീപത്ത് വെച്ച് ദീപാ ദാസ് മുൻഷി റോഡ് ഷോയുടെ ഭാഗമാകും.
തദ്ദേശ തെരഞ്ഞെടുപ്പിൽ മത്സരിക്കുന്ന സംഘടനാ ചുമതലയുള്ള എഐസിസി അംഗം ദീപ്തി മേരി വർഗീസിന്റെ റോഡ് ഷോയിലാണ് ദീപാ ദാസ് മുൻഷി പങ്കെടുക്കുക. കൊച്ചി കോർപ്പറേഷനിലെ നിലവിലെ കൗൺസിലറും അഭിഭാഷകയുമാണ് ദീപ്തി. കൊച്ചി കോർപ്പറേഷനിലെ (ഡിവിഷൻ 34) വാർഡ് സ്റ്റേഡിയം ഡിവിഷനിൽ നിന്നാണ് ദീപ്തി മേരി വർഗീസ് ജനവിധി തേടുന്നത്. ശക്തമായ രാഷ്ട്രീയ നിലപാടുകളുടെ പേരിൽ ജനശ്രദ്ധയാകർഷിച്ച കോൺഗ്രസ് നേതാവാണ് ദീപ്തി.
