രുചിയുടെയും മണത്തിന്റെയും കാര്യത്തിൽ ഇന്ത്യൻ അടുക്കളയിൽ കറിവേപ്പിലയ്ക്ക് ഒരു പ്രത്യേക സ്ഥാനമുണ്ട്. കറികൾക്ക് സ്വാദും മണവും നൽകുന്ന ഈ ചെറിയ ഇലകൾ നിരവധി ആരോഗ്യ ഗുണങ്ങൾ ഒളിപ്പിച്ചുവെച്ച ഒരു ഔഷധ കലവറ കൂടിയാണ്. കറിവേപ്പില വൈറ്റമിനുകൾ, ധാതുക്കൾ, ആന്റിഓക്സിഡന്റുകൾ എന്നിവയാൽ സമ്പുഷ്ടമാണ്. അതുകൊണ്ട് തന്നെ ഇത് ഭക്ഷണത്തിൽ നിന്ന് എടുത്തുമാറ്റി കളയേണ്ട ഒന്നല്ല.
കറിവേപ്പിലയിലെ പോഷക ഘടകങ്ങൾ
കറിവേപ്പിലയിൽ വൈറ്റമിൻ എ,ബി, (ബി 2, ബി 6, ബി 12), ഇ, സി തുടങ്ങിയ പോഷകങ്ങൾ ധാരാളം അടങ്ങിയിട്ടുണ്ട്. കാൽസ്യം, ഫോസ്ഫറസ്, ഇരുമ്പ്, സിങ്ക് തുടങ്ങിയ ധാതുക്കളും, കൊഴുപ്പിന്റെ ഓക്സീകരണം തടയാനും കോശങ്ങളെ സംരക്ഷിക്കാനും സഹായിക്കുന്ന ആന്റിഓക്സിഡന്റുകളും അടങ്ങിയിട്ടുണ്ട്.
പ്രധാന ആരോഗ്യ ഗുണങ്ങൾ
കറിവേപ്പില പതിവായി ഭക്ഷണത്തിൽ ഉൾപ്പെടുത്തുന്നത് ശരീരത്തിന് പലവിധത്തിൽ ഗുണം ചെയ്യും. പ്രധാനപ്പെട്ട ആരോഗ്യ ഗുണങ്ങൾ ഇവയാണ്.
- ദഹനം മെച്ചപ്പെടുത്തുന്നു
കറിവേപ്പില ദഹന എൻസൈമുകളെ ഉത്തേജിപ്പിക്കുകയും അതുവഴി ഭക്ഷണം കാര്യക്ഷമമായി ദഹിക്കാനും സഹായിക്കുന്നു. ദഹനക്കേട്, മലബന്ധം, ഗ്യാസ് തുടങ്ങിയ പ്രശ്നങ്ങൾ ലഘൂകരിക്കാൻ ഇത് ഫലപ്രദമാണ്. തിലെ നാരുകൾ കുടലിന്റെ ആരോഗ്യം നിലനിർത്താനും മലവിസർജ്ജനം സുഗമമാക്കാനും സഹായിക്കുന്നു. ദഹന പ്രശ്നങ്ങൾ അകറ്റാൻ കറിവേപ്പില ചേർത്ത മോര് കുടിക്കുന്നത് ഉത്തമമാണ്.
- പ്രമേഹത്തെ നിയന്ത്രിക്കുന്നു
കറിവേപ്പിലയ്ക്ക് ‘ഹൈപ്പോഗ്ലൈസെമിക്’ ഗുണങ്ങളുണ്ട്. ഇത് രക്തത്തിലെ പഞ്ചസാരയുടെ അളവിനെ നിയന്ത്രിക്കാൻ സഹായിക്കും. രക്തത്തിലേക്ക് ഗ്ലൂക്കോസ് പുറത്തുവിടുന്നതിന്റെ അളവ് നിയന്ത്രിക്കുന്നതിലൂടെ പ്രമേഹമുള്ളവർക്ക് ഇത് ഒരു പരിധി വരെ ആശ്വാസം നൽകുന്നു. വെറും വയറ്റിൽ ഫ്രഷ് കറിവേപ്പില ചവച്ചരച്ച് കഴിക്കുന്നത് പ്രമേഹ നിയന്ത്രണത്തിന് നല്ലതാണ്.
- ഹൃദയാരോഗ്യം സംരക്ഷിക്കുന്നു
കറിവേപ്പിലയിലെ ആന്റിഓക്സിഡന്റുകൾ രക്തത്തിലെ ചീത്ത കൊളസ്ട്രോളിന്റെ ഓക്സീകരണം തടയാൻ സഹായിക്കുന്നു. ഇത് എൽഡിഎൽ കൊളസ്ട്രോളിന്റെ അളവ് കുറയ്ക്കുകയും നല്ല കൊളസ്ട്രോളിന്റെ അളവ് വർദ്ധിപ്പിക്കുകയും ചെയ്യുന്നു. ഹൃദ്രോഗ സാധ്യത കുറയ്ക്കാനും രക്തചംക്രമണം മെച്ചപ്പെടുത്താനും ഇത് സഹായിക്കും.
- മുടിയുടെ ആരോഗ്യത്തിന്
കറിവേപ്പിലയുടെ ഏറ്റവും അറിയപ്പെടുന്ന ഗുണങ്ങളിൽ ഒന്നാണിത്. മുടികൊഴിച്ചിൽ കുറയ്ക്കുന്നതിനും മുടി വളർച്ചയെ പ്രോത്സാഹിപ്പിക്കുന്നതിനും ഇത് സഹായിക്കുന്നു. ഇതിലെ ബീറ്റാ കരോട്ടിനും പ്രോട്ടീനും മുടിയിഴകൾക്ക് ബലം നൽകുന്നു. കറിവേപ്പിലയിട്ട് കാച്ചിയ എണ്ണ തേക്കുന്നത് അകാല നര ഒഴിവാക്കാനും മുടിക്ക് സ്വാഭാവിക നിറം നൽകാനും തലയോട്ടിയുടെ ആരോഗ്യം മെച്ചപ്പെടുത്താനും സഹായിക്കും.
- കരളിന്റെ സംരക്ഷണത്തിന്
കറിവേപ്പിലയ്ക്ക് ‘ഹെപ്പറ്റോപ്രൊട്ടക്റ്റീവ്’ ഗുണങ്ങൾ ഉണ്ടെന്ന് പഠനങ്ങൾ തെളിയിക്കുന്നു. ഓക്സിഡേറ്റീവ് സമ്മർദ്ദം മൂലമുണ്ടാകുന്ന കേടുപാടുകളിൽ നിന്നും വിഷവസ്തുക്കളിൽ നിന്നും കരളിനെ സംരക്ഷിക്കാൻ ഇത് സഹായിക്കുന്നു. വൈറ്റമിൻ എ,സി എന്നിവ കരളിന്റെ പ്രവർത്തനം മെച്ചപ്പെടുത്താൻ സഹായിക്കും.
- കാഴ്ചശക്തി വർദ്ധിപ്പിക്കുന്നു
കറിവേപ്പിലയിൽ ധാരാളമായി അടങ്ങിയിട്ടുള്ള വൈറ്റമിൻ എ കണ്ണിന്റെ ആരോഗ്യത്തിന് അത്യന്താപേക്ഷിതമാണ്. ദിവസേനയുള്ള ഭക്ഷണത്തിൽ കറിവേപ്പില ഉൾപ്പെടുത്തുന്നത് കാഴ്ചശക്തി വർദ്ധിപ്പിക്കാനും പ്രായവുമായി ബന്ധപ്പെട്ട കാഴ്ചക്കുറവ് കുറയ്ക്കാനും സഹായിക്കും.
- വിളർച്ച തടയുന്നു
ഇരുമ്പിന്റെയും ഫോസ്ഫറസിന്റെയും നല്ലൊരു സ്രോതസ്സാണ് കറിവേപ്പില. ശരീരത്തിലെ ഇരുമ്പിന്റെ അളവ് വർദ്ധിപ്പിക്കാൻ ഇത് സഹായിക്കുന്നതിനാൽ വിളർച്ച (അനീമിയ) തടയുന്നതിൽ കറിവേപ്പില ഒരു പ്രധാന പങ്ക് വഹിക്കുന്നു.
കറിവേപ്പില എങ്ങനെ ഉപയോഗിക്കാം?
കറികളിൽ ചേർക്കുന്നതിന് പുറമെ കറിവേപ്പില ഉപയോഗിക്കാനുള്ള ചില എളുപ്പവഴികൾ ഇവയാണ്.
വെറും വയറ്റിൽ ചവയ്ക്കുക: രാവിലെ വെറും വയറ്റിൽ 3-4 കറിവേപ്പില കഴിക്കുന്നത് ദഹനത്തിനും കൊളസ്ട്രോൾ നിയന്ത്രിക്കുന്നതിനും പ്രമേഹ നിയന്ത്രണത്തിനും നല്ലതാണ്.
കറിവേപ്പില ചായ/വെള്ളം: കറിവേപ്പില വെള്ളത്തിൽ തിളപ്പിച്ച് അരിച്ചെടുത്ത് കുടിക്കുന്നത് ദഹനം മെച്ചപ്പെടുത്താനും ശരീരത്തിന് ഉന്മേഷം നൽകാനും സഹായിക്കും.
കറിവേപ്പില പൊടി: ഉണക്കിപ്പൊടിച്ച കറിവേപ്പില ചട്ണിയായും, തൈരിലും സാലഡുകളിലും ചേർത്ത് കഴിക്കാം.
ചുരുക്കത്തിൽ, കറിവേപ്പില ഭക്ഷണത്തിന് രുചി കൂട്ടുന്നതിനൊപ്പം നമ്മുടെ ആരോഗ്യത്തിനും വലിയ തോതിൽ ഗുണം ചെയ്യുന്നു. അതുകൊണ്ട് ഇനി കറികളിൽ നിന്ന് കറിവേപ്പില എടുത്തുമാറ്റുന്നതിന് പകരം, ധൈര്യമായി കഴിക്കുക.
